मत्ती 26

ईशूए खलाफ छ़ल़

(मरकुस 14:1,2; लुका 22:1,2; युहन्ना 11:45-53)

1ज़ांऊं ईशू इना गल्ला बोली मुक्कअ, ता तेखअ लागअ सह आपणैं च़ेल्लै लै बोलदअ, 2“तम्हां का आसा थोघ कि दूई धैल़ै बाद आसा ओवार्णैओ थैर। हुंह मणछो शोहरू ढाकणअ क्रूसा दी मारना लै।”

3तेखअ बडै परोहित और मुखियै की काईफा नांओंए माहा परोहिते खोल़ै कठा हई एक पांच़ी। 4तिधी तिंयां लागै आप्पू मांझ़ै जोगा करदै कि ईशू ढाकणअ हाम्हां छ़ल़-कपट करी करै बी और सह पाणअ मारी। 5तेखअ लागै तिंयां इहअ बी बोलदै कि ओवार्णे जाचे धैल़ी निं हाम्हां इहअ करनी, इहअ निं हआ कि लोग करे हाल्लअ-गोल्लअ।

बेतनियाह गराऊंऐं ईशूए सीख

(मरकुस 14:3-9; युहन्ना 12:1-8)

6ज़ांऊं ईशू बेतनियाह गराऊंऐं शमौन कोल़्हे बमारी आल़े घरै त, 7ता एक बेटल़ी आई और संगमरमरे एकी भांडै दी एक खुशबूदार किम्मती तेल आणअ और ज़ांऊं ईशू रोटी खांदअ त बेठअ द, ता तेसा तरैल़अ तेऊए मुंडै। 8एता भाल़ी बोलअ रोशै मारै च़ेल्लै इहअ कि अह एतरी किम्मती तेल किल्है किअ एसा बरैबाद? 9अह सका त खास्सी किम्मती बिकी और तिन्नां ढबै सका तै दुखी दल़िदरा लै बांडी। 10अह गल्ल हेरी ईशू समझ़ी और तेऊ बोलअ तिन्नां लै इहअ, “एसा छ़ाडा, एसा किल्है करा तम्हैं तंग? ऐहा किअ मुल्है भलअ। 11गरीब रहणैं कबल्लै तम्हां ई संघै तम्हैं ज़ेभै च़ाहे तेभै सका तिन्नां लै दैई, पर हुंह निं तम्हां संघै कबल्लअ च़ाल्लअ रहई। 12एसा ज़ुंण अह मेरी देही दी खुशबूदार किम्मती तेल तरैल़अ, अह की एसा मेरी देही दाबणा लै तैरी। 13हुंह खोज़ा तम्हां का सत्त कि सारै संसारै ज़िधी बी मेरै बारै खुशीओ समाद प्रच़ार होए तिन्नां लोगा खोज़णअ एसरै बारै बी कि एसा मुल्है किज़ै किअ।”

करोती गराऊंओ यहूदो छ़ल़-कपट

(मरकुस 14:10,11; लुका 22:3-6)

14तेखअ बोलअ करोती गराऊंओ यहूदा नांओंए च़ेल्लै तिन्नां बारा मांझ़ै एकी बडै परोहिता सेटा डेऊई करै, 15“ज़ै हुंह ईशू थारै हाथै ढाकणैं दैंऊं, ता तम्हां मुल्है कै दैणअ?” तिन्नैं बोलअ इहअ कि ताल्है दैणैं तिह च़ंदीए सिक्कै तोली करै। 16ताऊं तेभी पोर्ही लागअ सह ईशू ढाकणें मोक्कै भाल़अ।

च़ेल्लै संघै आखरी रोटीए थैरो खिरीओ भोज़

(मरकुस 14:12-21; लुका 22:7-13,21-23; युहन्ना 13:21-30)

17आखरी रोटीए थैरा का पैहली धैल़ी लागै च़ेल्लै ईशू का पुछ़दै, “हे प्रभू, तूह किधी च़ाहा कि हाम्हैं ताल्है ओवार्णे थैरो भोज़ बणांणें तैरी करे?” 18ईशू बोलअ तिन्नां लै, “तम्हैं डेओआ नगरी लै। तिधी भेटणअ तम्हां एक मणछ। तेऊ लै बोलै कि गूरू बोला इहअ कि मेरअ बगत आसा नेल़, और मुंह मनाऊंणअ तेरै घरै च़ेल्लै संघै एछी अह ओवार्णैओ थैर।” 19इहअ करै किअ च़ेल्लै बी ज़िहअ ईशू बोलअ तिहअ ई और ओवार्णे थैरो भोज़ तैर किअ।

20ज़ांऊं सान्ह पल़ी ता ईशू बेठअ तिन्नां बारा च़ेल्लै संघै रोटी खांदअ। 21ज़ांऊं तिंयां खांदै लागै, ता ईशू बोलअ तिन्नां लै, “हुंह खोज़ा तम्हां का सत्त कि तम्हां मांझ़ै बझ़ैल़णअ हुंह कसा एकी ज़ण्हैं ढाकणैं।” 22एसा गल्ला शूणीं हुऐ तिंयां हुऐ बडै भारी दुखी, और तिंयां लागै एक-एक करी करै बारी-बारी तेऊ का पुछ़दै, “हे गूरू सह हुंह किनी आसा?” 23ईशू दैनअ तिन्नां लै ज़बाब, “ज़ुंणी मुंह संघै एभै मेरै थाल़ू का खाअ, तेऊ ई बझ़ैल़णअ हुंह ढाकणैं। 24हुंह मणछो शोहरू ता मरनअ तेऊ ई साबै ज़िहअ मेरै बारै लिखअ द आसा। पर तेऊ मणछा लै एछणी बडी भारी खरी ज़हा हुंह ढाकणैं बझ़ैल़णअ। तेऊ लै त भलअ इहअ ई कि तेऊओ ज़ल्म ई नांईं हंदअ।” 25तेखअ करोती गराऊंओ यहूदा ज़ुंणी ईशू ढाकणैं लाअ त बझ़ैल़ी तेऊ बोलअ ईशू लै, “हे गूरू सह हुंह किनी आसा?” ईशू बोलअ तेऊ लै, “तंऐं हेरअ एभै बोली।”

प्रभू भोज़

(मरकुस 14:22-26; लुका 22:14-20; 1 कुरिन्थी 11:23-25)

26ज़ांऊं तिंयां रोटी खांदै बेठै ता ईशू परमेशरो शूकर करी करै रोटी चोल़ी और तिन्नां च़ेल्लै लै दैई करै बोलअ, “हुंज़ा, खाआ अह आसा मेरी देही।” 27तेखअ ईशू अंगूरे रसा करै भरअ द बतिल्लू हाथै च़कअ और परमेशरो शूकर करी करै आपणैं च़ेल्लै लै दैई बोलअ, “एता का झुटा तम्हैं सोभै। 28किल्हैकि अह आसा मेरअ लोहू, अह आसा परमेशरे मणछा नऊंईं करार। अह बहाऊंणअ तम्हां मांझ़ै कई मणछे पाप माफ करना लै बल़ीदान करी करै। 29हुंह बोला तम्हां लै इहअ कि अह अंगूरो रस निं मुंह तेभै तैणीं झुटणअ ज़ेभै तैणीं तम्हां सोभी संघै बेशी आपणैं बाप्पूए राज़ा दी नऊंअ अंगूरो रस निं झुटूं।” 30तेखअ नाठै ईशू और तेऊए च़ेल्लै ओवार्णे थैरे गिहा बोलदी बागै जैतून धारा लै।

पतरसे हुधणें बारै गल्ला प्रगट करनी

(मरकुस 14:27-31; लुका 22:31-34; युहन्ना 13:36-38)

31तेखअ बोलअ ईशू तिन्नां लै, “तम्हैं हणैं आझ़ राची ई मुखा दूर किल्हैकि शास्त्रा दी आसा लिखअ द

‘मुंह पाणअ फुआल मारी

और छ़ुंडे भेडा छिंघणीं ओरी-पोरी।’

32 “पर मुंह डेऊणअ ज़िऊंदै हई करै तम्हां का पैहलै गलील लाक्कै लै।” 33एसा गल्ला शूणीं बोलअ पतरसै, “होर लागे ताह छ़ाडी करै डेऊंदै पर हुंह निं ताखा दूर डेऊंदअ।” 34ईशू बोलअ तेऊ लै, “हुंह खोज़ा ताखा सत्त कि आझ़ एसा ई राची मुर्गै दूई बारी बाशणैं का पैहलै हुधणअ तूह मेरै बारै चिई बारी।” 35पतरसै दैनअ ईशू लै ज़बाब, “ज़ै मुंह ता संघै मरनअ बी पल़े, तैबी निं हुंह तेरै बारै हुधदअ।” और इहअ ई बोलअ तिन्नैं होरी च़ेल्लै बी।

गतसमनीं दी प्राथणां

(मरकुस 14:32-42; लुका 22:39-46)

36तेखअ नाठअ ईशू गतसमनीं नांओंए ज़ैगा दी संघा बोलअ आपणैं च़ेल्लै लै, “इधी रहै तेभै तैणीं बेशी ज़ेभै तैणीं कि हुंह प्राथणां करी फिरी नां एछूं।” 37तेऊ निंयैं पतरस और जबदीओ शोहरू दुहै आप्पू संघा, और ईशूए भर्हुऐ गल़ दुखा दी। 38तेखअ बोलअ ईशू, “मेरअ ज़िऊ आसा बडअ दुखी इहअ कि मेरै च़ाल्लै ज़िहै प्राण निखल़ी, तम्हैं खल़्हिया इधी और बिहुदै रहा।”

39तेखअ नाठअ ईशू धख आजू संघा लागअ उटी बाखा प्राथणां करदअ, “हे परमेशर ज़ै हई सके ता; तै कर मुखा एसा घल़ी एऊ दुखा दूर। तैबी ज़िहअ हुंह च़ाहा तिहअ निं पर ज़िहअ तूह च़ाहा तिहअ लोल़ी हुअ।” 40तेखअ आअ ईशू तिन्नां चिई च़ेल्लै सेटा और तिंयां सुत्तै दै भाल़ी करै बोलअ तेऊ पतरसा लै, “तम्हैं एकी घल़ी बी निं बिहुदै रही सकै? 41बिहुदै रहा और प्राथणां करदै रहा लागी कि तम्हैं परिक्षा दी पल़ी करै पाप नां करे। आत्मां ता आसा तैर पर अह देही आसा दुबल़ी।” 42तेखअ नाठअ ईशू दुजी बारी प्राथणां करदअ और तेऊ की एही प्राथणां, “हे मेरै बाप्पू, ज़ै मेरै झुटै बाझ़ी अह दुखो बतिल्लू नांईं हटी सकदअ तै लोल़ी तेरी मरज़ी पूरी हुई।” 43तेखअ आअ सह भी आपणैं च़ेल्लै सेटा लै और तेऊ भाल़ै तिंयां घणीं निंजा सुत्तै दै। 44ईशू नाठअ तिन्नां छ़ाडी भी प्राथणां करदअ और सह ई गल्ल बोली प्राथणां दी चिऊथी बारी। 45तेखअ आअ भी ईशू आपणैं च़ेल्लै सेटा और तिन्नां लै बोलअ, “तम्हैं रहा सुत्ती! बतेर्है सुत्तै ऐबै! भाल़ा, सह घल़ी गई एछी। हुंह मणछो शोहरू लाअ पापी मणछे हाथै ढाकी। 46खल़ै उझ़िआ, च़ाल्ला, हेरा, ज़ुंणी हुंह ढाकी आसा लाअ द सह गअ एछी।”

ईशू धोखै संघै ढाकणअ

(मरकुस 14:43-50; लुका 22:47-53; युहन्ना 18:3-12)

47ईशू त इहअ बोलदअ ई लागअ द कि यहूदा ज़ुंण बारा च़ेल्लै मांझ़ै एक त, सह आअ और तेऊ संघै आऐ बडै परोहिता और मुखियै छ़ाडै खास्सै लोग हाथै तलबारा और शोठै पाई। 48करोती गराऊंओ यहूदा त तिन्नां लै इहअ डाहअ द बोली कि ज़हा लै हुंह माख्खी दैंऊं, सह ई आसा ईशू तेऊ करै तम्हैं कैद। 49तिधी पुजधी सह तेभी ईशू सेटा लै आअ और बोलअ, “हे गूरू, नमस्ते” संघा तेऊ दैनी ईशू लै च़ुंज़ी माख्खी।

50ईशू बोलअ तेऊ लै, “हे साथी, ज़ेऊ कामां लै तूह आअ द आसा तेऊ कर।”

तेखअ तिंयां होर ईशू सेटा लै आऐ और तिन्नैं किअ ईशू कैद। 51ईशू नेल़ खल़्हुऐ दै च़ेल्लै मांझ़ै काढी एकी आपणीं तलबार और तेऊ बाही माहा परोहिते टैहलू लै ता तेऊओ कान शोटअ धरनीं।

52तेखअ बोलअ ईशू तेऊ लै, “आपणीं तलबार डाह काठी भितरी। किल्हैकि ज़ुंण होरी तलबारा करै मारा, तिंयां पाणै कसा होरी तलबारा ई करै मारी। 53तूह एसा गल्ला निं समझ़दअ आथी कि हुंह सका आपणैं बाप्पू का एही अरज़ बी करी कि स्वर्ग दूते छ़ाड बारा दला का बी खास्सै मुंह सेटा लै, ता सह सका एभी छ़ाडी? 54पर इहअ हणअ आसा ज़रूरी नांईं ता पबित्र शास्त्रे गल्ला किहअ करै हणीं पूरी?” 55तेखअ तेसा ई घल़ी ईशू तिन्नां लोगा लै बोलअ, “तम्हैं कै हुंह डाकू समझ़अ कि मुंह ढाकदै आसा तलबारा और शोठै पाई निखल़ै दै? हुंह ता हर धैल़ै तम्हां संघा मांदरै शिक्षा दैआ त, तेभै किल्है निं हुंह तम्हैं ढाकअ? 56पर ईंयां सोभै गल्ला हुई एते तैणीं कि परमेशरे गूरै बोली दी गल्ला पूरी होए।” तेखअ ठुर्है तिधा का सारै च़ेल्लै और ईशू डाहअ तिधी कल्ही।

माहा सभा दी ईशू

(मरकुस 14:53-65; लुका 22:54,55,63-71; युहन्ना 18:13,14,19-24)

57ईशू ढाकणैं आल़ै निंयं सह काईफा माहा परोहिता सेटा लै और तिधी आसा तै शास्त्री और मुखियै कठा हुऐ दै। 58पतरस बी नाठअ तिन्नां पिछ़ू-पिछ़ू माहा परोहिते खोल़ै तैणीं और तिन्नें टैहलू संघै रहअ फैंसलै न्हैल़अ बेठी।

59बडै परोहित और सारी सभा दी आसा तै सोभै लागै दै ईशू मारना लै इहै लोगा लोल़ै ज़ुंण तेऊए खलाफ झ़ुठी गवाही दैए। 60पर बडै भारी झ़ुठै गवाह आणै पर तेखअ बी निं तिन्नां ईशू मारना लै दोश भेटी निस्सअ। 61खिरी बोलअ दूई ज़ण्हैं इहअ, “एऊ बोलअ इहअ कि अह सका एऊ परमेशरे मांदरा ढोल़ी और चिई धैल़ै भितरी सका भी बणांईं।”

62तेखअ माहा परोहितै खल़ै हई करै बोलअ, “तूह बोलदअ किल्है निं आथी? ईंयां लोग भाल़ तेरै खलाफ कै किज़ै बोला?” 63पर ईशू रहअ च़ुप्पी और तेखअ बोलअ माहा परोहितै, “हुंह दैआ ताल्है पबित्र ज़िऊंदै परमेशरे सोह कि, ज़ै तूह परमेशरो शोहरू मसीहा आसा; तै खोज़ हाम्हां का।”

64तेखअ बोलअ ईशू तेऊ लै, “तंऐं हेरअ आप्पै बोली, पर हुंह बोला तम्हां का इहअ बी कि एभा पोर्ही भाल़णअ तम्हां हुंह मणछो शोहरू सर्वशक्तिमान परमेशरे दैहणै बेठअ द और सरगे बादल़ा दी भाल़णअ तम्हां एछदअ।”

65तेखअ माहा परोहितै रोशै आपणअ च़ोल़अ धैल़ी करै बोलअ, “एऊ की परमेशरे निंदा, ऐबै निं हाम्हां कोही गवाहीए ज़रुरत आथी? तम्हैं सोभी बी हेरी अह गल्ला शूणीं कि अह बोला आप्पू लै परमेशर और इहअ करै की एऊ परमेशरे निंदा! 66तम्हां होरीए कै राऐ आसा?”

तिन्नैं होरी बोलअ, “अह आसा मारनै ई जोगी!” 67तेखअ थुकअ तिन्नैं ईशूए मुंहां लै, संघा कोई लागै तेऊ लै धमुक्कै बाहंदै। होरी ढोपी तेऊए आछी संघा लागै तेऊ लै च़ैंडै बाही करै इहअ बोलदै, 68“ज़ै तूह मसीहा आसा तै खोज़ हाम्हां का कि ताल्है कुंणी बाही?”

पतरसो हुधणअ

(मरकुस 14:66-72; लुका 22:56-62; युहन्ना 18:15-18,25-27)

69पतरस त बागै खोल़ै बेठअ द, तेऊ का लागी तिधी एक बेटल़ी इहअ पुछ़दी, “तुबी त एऊ गलीली ईशू संघै भाल़ी?”

70पतरसै किअ तिन्नां सोभी सम्हनै इहअ बोली करै नांईं, “तूह किज़ै बोला मुखा निं किछ़ी गल्लो थोघ आथी?”

71तेखअ नाठअ पतरस डेहल़ा बागै, तिधी बी बोलअ एकी होरी पतरसा भाल़ी करै तिन्नां होरी का, “अह बी त नासरत गराऊंए ईशू संघै।” 72पतरसै किअ सोह काढी करै नांईं कि हुंह निं तेऊ मणछा बछ़ैणदअ बी आथी।

73थोल़ी घल़ी बाद ज़ुंण तिधी आसा तै, तिन्नैं बोलअ पतरसा सेटा एछी करै, “तेरअ बोल च़ाल खोल्हा तेरअ इहअ भेद कि तूह आसा ज़रूर तिन्नां ई मांझ़ै एक।”

74तेखअ लागअ पतरस भी सफाई दैंदअ और सोह काढदअ कि हुंह निं तेऊ मणछा बछ़ैणदअ ई आथी, और तेभी बाशअ मुर्गअ बी।

75पतरसा फिरी सह गल्ल आद ज़ुंण ईशू तेऊ लै बोली ती, “मुर्गै दुजी बारी बाशणैं का पैहलै हुधणअ ताह मेरै बारै चिई बारी।” सह नाठअ तिधा का बागै और सह लागअ हिंह करै लेरा लांदअ।

Currently Selected:

मत्ती 26: OSJNT

Highlight

Copy