मरकुस 4

बी बाणै बाळै रा उदाहरण

(मत्ती 13:1-9; लूका 8:4-8)

1यीशु फिरी गलील झीला रै कनारै उपदेश दिणा लगा अतै ऐसी भीड़ किटठी भूच्ची गई कि ता सो झीला मन्ज अक्की किस्ती पुर बैही गो, अतै पूरी भीड़ जमीना पुर झीला रै कनारै खड़ी रैई। 2अतै सो उदाहरण मन्ज बड़ी सारी गल्ला सखाणा लगु, अतै अपणै उपदेशा मन्ज तियां जो बल्लू,

3“हुणा! अक्क बी बाणैबाळा बी बाणा निकळू। 4बान्दै टैमैं कुछ बी बता रै कनारै पै अतै पखेरू ईच्ची करी सो चुगी लैऊ। 5कुछ बी पत्थरली जमीना पुर पै जैड़ी तैतिओ बड़ी मिट्टी ना मुळी अतै गहरी मिट्टी ना मुळन री वजह थऊँ, सो झट जमीं पैऊँ, 6अतै जैहणै सूरज निकळू ता सो फूकी गै, अतै जड़ ना पकड़णै री वजह थऊँ हुक्की गो। 7कुछ बी झिन्ड़ा मन्ज पै, अतै झिन्ड़ै सो जमीं करी दबाई दिता, अतै सो फलबन्त ना भुआ 8पर कुछ बी खरी जमीना पुर पै, अतै सो जमीं करी फलबन्त भुआ अतै कोई तीह गुणा, कोई सठ गुणा अतै कोई सौ गुणा फळै।”

9ता यीशुऐ बल्लू, “मेरी गल्ला ध्याना सोगी कन्‍ना खोली करी हुणी लेय्आ।”

उदाहरण रा उदेश्य

(मत्ती 13:10-17; लूका 8:9,10)

10जैहणै यीशु अकेला रैई गो, ता तसेरै साथी तियां बारह प्रेरितै तैस थऊँ ईयां उदाहरण रै बारै मन्ज पूछु 11तिनी तियां सितै बल्लू, “तुसिओ ता प्रमात्मैं रै राज्य रै भेदा री समझ दितुरी हा, पर बाहरा बाळै तांयें सब गल्ला उदाहरण मन्ज भुन्दी हिन। 12ठेरैतांये कि यशायाह भविष्‍यवक्ता री कताबा मन्ज लिखुरा हा,

“ ‘ऐह हेरी करी भी समझी ना पान

अतै हुणी करी भी ना समझन;

क्ओकि ऐसा ना भोआ कि ऐह अपणै पापा थऊँ फिरी ईन, अतै प्रमात्मां तियां जो माफी देय्आ।’ ” #यशा. 6:9-10; यिर्म. 5:21.

बी बाणैवाळै उदाहरण री व्याख्या

(मत्ती 13:18-23; लूका 8:11-15)

13यीशुऐ तियां सोगी बल्लू, “कै तुहै ऐह उदाहरण ना समझदै? ता फिरी होर सब उदाहरण जो कियां समझणा? 14बी बाणैबाळा किसान ऐस तरीकै हा जियां कोई प्रमात्मैं रा बचन हुणान्दा। 15कुछ मणु ऐस तरीकै हिन जियां बी रस्तै मन्ज पैऊरै हिन, मणु जैहणै तियैं बचन हुणु, ता शैतान झट ईच्ची करी तैस बचना जो चुकी लेई गान्दा हा। 16तियां ही जैड़ै बी पथरीली जमीना पुर पेऊरा हा, ऐह ईयां मणु सांईयै हिन जैड़ै बचन जो हुणी करी झट खुशी सोगी ग्रहण करी लैन्दै हिन। 17पर अपणै मना मन्ज गहराई थऊँ विस्वास ना करनै री वजह थऊँ थोड़ै ही दिन तांयें रैहन्दै हिन ऐत थऊँ बाद जैहणै बचन री वजह थऊँ क्‍लेश या सताव भुन्दा सो झट बचन पुर विस्वास करना छड़ी दिन्दै हिन। 18जैड़ै बी झिन्ड़ा मन्ज पेऊरा, ऐह तियां मणु सांईयै हिन जैड़ै बचन हुणदै पर, 19संसारा री चिन्ता, अतै धन रा धोखा, अतै होर चिजा रा लोभ तियां मन्ज इन्दा अतै सो बचन जो दबाई दिन्दै, अतै सो तियां कम्मा जो ना करी सकदै जैतिओ प्रमात्मां चाहन्दा। 20अतै जैडा बी खरी जमीना पुर पैऊ सो ऐसै मणु सांईयै हिन जैड़ै बचन जो हुणी करी विस्वास करदै अतै तियां कम्मा जो करदै हिन जैतिओ प्रमात्मां चाहन्दा। सो ऐसी फसल सांईयै फलदै कोई तीह गुणा, कोई सठ गुणा, कोई सौ गुणा।”

दीयै रा उदाहरण

(लूका 8:16-18)

21यीशुऐ तियां सितै बल्लू, “कै दीयै जो ठेरैतांये लेईंदै कि टोकरू थलै ढ़की करी या मन्जै थलै रखन? बल्कि ठेरैतांये लेईंदै हिन कि उच्ची जगह पुर रखन ताकि सबी जो लौ भोआ। 22क्ओकि जैड़ी गल्ला छिपुरी हिन सो प्रकट भूच्ची गाणी अतै जैडा कुछ गुप्त हा, सो भी प्रकट भूच्ची गाणा। 23मेरी गल्ला ध्याना सोगी कन्‍ना खोली करी हुणी लेय्आ।”

24यीशुऐ तियां सितै बल्लू, “चौकनै रेय्आ अतै ध्याना सितै हुणा। जैस नापा सितै तुसै नापदै हिन तैस ही नापा सितै तूसु तांयें भी नापया गाणा, बल्कि तुसिओ मता ही दिणा हा। 25क्ओकि जैड़ा मेरी शिक्षा जो हुणदै अतै समझदै हिन तियां जो होर समझ दिणिआ, पर जैड़ी ना हुणदै ता तियां बलै जैड़ी समझ हा सो भी तियां थऊँ लेई लैणीआ।”

उगणै बाळै बी रा उदाहरण

26फिरी तिनी बल्लू, “प्रमात्मैं रा राज्य इआं जिंआं कि कुणकी किसाने जमींना पुर बी बायै, 27सो हर दिन अपणा कम करीके राती सुन्दा अतै दिय्आ जागदा, पर तैसिओ पता भी ना लगदा कि सो बी इन्‍नै जमदै हिन। 28धरती अप्पू ही फसल दिन्दी हा, पैहलै लून्गा, फिरी हिल्लै, अतै हिल्लै मन्ज तैयार दाणा। 29पर जैहणै फसल पक्की गान्दी हा ता तैत मन्ज झट दराटी लगान्दै हिन, क्ओकि तैहणै फसल री वढाई रा टैमं ईच्ची रैहन्दा हा।”#योए. 3:13.

राई रै दाणै रा उदाहरण

(मत्ती 13:31-32-34; लूका 13:18,19)

30फिरी तिनी बल्लू, “अहै प्रमात्मैं रै राज्य रा उदाहरण कस सोगी दीन, अतै कस उदाहरण सोगी तसेरा बखान करन? 31सो राई रै दाणै रै बराबर हा; कि जैहणै जमीना मन्ज बान्दै हिन ता धरती रै सबी बीआ थऊँ हल्का भुन्दा, 32पर जैहणै बान्दै हिन, ता जंमी करी सबी साग सब्जी थऊँ बडा भूच्ची गान्दा हा, अतै तठेरी ऐसी बड़ी बड़ी डाळी नकैन्दी हिन, कि अम्बरा रै पखेरू भी तठेरी छाई मन्ज बसेरा करी सकदै हिन।”

33यीशु तियां जो ऐस तरीकै रै मतै सारै उदाहरण दि दिकरी तंयारी समझा अनुसार बचन हुणान्दा थू, 34अतै सो तियां सोगी उदाहरण मन्ज ही गल्ला करदा थू, पर एकान्त मन्ज सो अपणै चेलै जो सब उदाहरण रा अर्थ दसदा थू।

आँधी जो शान्त करना

(मत्ती 8:23-27; लूका 8:22-25)

35तैस ही दिन जैहणै सँझ भूई, ता तिनी चेलै सोगी बल्लू, “अईआ अहै झीला रै पारीयें कनारी जो किस्ती मन्ज चलदै।” 36अतै सो भिड़ा जो छड़ी करी अपणै चेलै सोगी किस्ती पुर चली पैऊ; अतै बाकी होर मणु भी होरी किस्ती पुर चलै। 37ता अक्क बडा तूफान चली आ, अतै लैहरा रै पाणी सितै किस्ती भरीणा लगी पैई। 38पर सो अप्पू पिछली कनारी गद्‍दी पुर सोऊँ करदा था। तैहणै चेलै तैस जो जगाई करी तैस सितै बल्लू, “हे गुरू, कै तिजो फिकर निय्आ, कि अहै मरना लगुरै हिन?”

39ता तिनी उूठी करी तूफाना जो झिड़कू, अतै तूफान सितै बल्लू, “शान्ती रख, रूकी गा।” ता तूफान रूकी गो अतै बडा चैन भूच्ची गो;

40अतै तिनी बल्लू, “तुहै कजो डरदै हिन? कै तुसिओ हल्ली तिकर विस्वास निय्आ?”#भज. 107:29.

41सो बड़ै ही डरी गै अतै अप्पू मन्ज बलणा लगै, “ऐह किना मणु हा कि तूफान अतै पाणी भी सेरै हूक्मा जो मन्दै हिन?”

Currently Selected:

मरकुस 4: GBKNT

Highlight

Copy