मरकुस 3

डुन्डै मणु जो ठीक करना

(मत्ती 12:9-14; लूका 6:6-11)

1यीशु फिरी यहूदी रै सभागार मन्ज गो; तैड़ी अक्क मणु थू जैसेरा हत्थ डुण्ड़ा थू। 2फरीसी मणु तैस पुर दोष लाणै तांयें मौके री तलाश मन्ज थियै अतै हेरना चाहन्दै थियै कि ऐह विश्रामदिन तैसिओ ठीक करदा कि ना। 3तिनी तैस डुन्डै मणु सोगी बल्लू, “सामणै ईच्ची करी खड़ी गा।”

4अतै यीशुऐ तियां जो बल्लू, “मूसा री व्यवस्था मन्ज कै लिखुरा विश्रामदिन भलाई करना खरा कि बुरा करना, प्राणा जो बचाणा खरा या मारना?” पर सो चुप रैह।

5तिनी तंयारै मना रै ढ़ीठपन थऊँ उदास भूच्ची करी जळणी सितै चंऊ कनारी हेरू, अतै तैस मणु सोगी बल्लू, “अपणा हत्थ अगो कर।” तिनी हत्थ अगो करू अतै सो ठीक भूच्ची गो। 6तैहणै फरीसी झट बाहर गिच्ची करी हेरोदेस राजा रै गुट रै मणु सोगी तसेरै वरोधा मन्ज योजना बणाणा लगै कि तसेरा किआं नाश करन।

भिड़ा रा यीशु पिचो चलना

7यीशु अपणै चेलै सोगी कफरनहूम शहरा जो छड़ी करी गलील झीला री कनारी चली गो अतै गलील परदेस थऊँ अक्क बड़ी भीड़ तसेरै पिचो चली पैई। 8यहूदिया परदेस यरूशलेम शहर, इदूमिया परदेस, यरदन नदी रै पारा थऊँ, सूर अतै सैदा शहरा रै नेड़ै तेड़ै थऊँ मणु री अक्क बड़ी भीड़ ऐह हुणी करी कि सो कियां हैरानी रै कम करदा हा, तैस बलै आई। 9तिनी अपणै चेलै सोगी बल्लू, “भिड़ा री वजह थऊँ अक्क हल्की जिनी किस्ती मिन्जो तांयें तैयार रखा ताकि भीड़ मिन्जो पुर चड़ी ही ना गच्छा।” 10क्ओकि तिनी मतै जो ठीक करूरा थू, ठेरैतांये जैतणै मणु रोगी थियै, तैसिओ छुणै तांयें तैस पुर चड़ी चलदै थियै, ताकि सो भी तैसिओ छुई करी ठीक भूच्ची गान। 11दुष्‍टात्मा भी, जैहणै तैसिओ हेरदी थी ता तैस अगो टिरी पैन्दी थी, अतै चिल्लाई करी बलदी थी कि तू प्रमात्मैं रा पुत्र हा; 12अतै तिनी दुष्‍टात्मा जो सख्त हूक्म दिता कि “मेरै बारै मन्ज कसी जो मत दसदै।”

बारह चेलै जो चुनणा

(मत्ती 10:1-4; लूका 6:12-16)

13फिरी यीशु पहाड़ा पुर चड़ी गो, अतै जिंआं जो सो चाहन्दा थू तियां जो अप्पू बलै हैदु; अतै सो तैस वलै आये। 14तैहणै तिनी बारह मणु जो चुणु अतै तियां जो प्रेरित बल्लू कि सो तैस सोगी रैहन, अतै सो तियां जो भैजा कि सो प्रचार करन, 15अतै दुष्‍टात्मा जो कढणै रा अधिकार रखन। 16सो ऐह बारह प्रेरित हिन शमौन जैसेरा नां तिनी पतरस रखू, 17जबदी रा पुत्र याकूब अतै तसेरा हल्का भाई यूहन्‍ना, जैसेरा नां तिनी बुअनरगिस मतलब “गर्जन रा पुत्र” रखू, क्ओकि सो जोशीलै थियै। 18अन्द्रियास, फिलिप्पुस, बरतुल्मै, मत्ती, थोमा, हलफई रा पुत्र याकूब, तद्दै, अतै शमौन कनानी 19अतै यहूदा इस्करियोती जिनी तैसिओ पकड़वाई भी दिता थू।

यीशु अतै शैतान

(मत्ती 12:22-32; लूका 11:14-23; 12:10)

20तैहणै यीशु अतै तसेरै चेलै कफरनहूम मन्ज तैस ही घरा मन्ज ठहरू जैड़ी सो रूकदा थू, अतै तैड़ी ऐतनी भीड़ इकट्ठी भूच्ची गई कि सो खाणा भी ना खाई सकै। 21जैहणै यीशु रै टबरा रै मणुऐ ऐह हुणु, ता सो तैसिओ पकड़णै तांयें निकळै क्ओकि सो बलदै थियै कि ऐह पागल हा।

22शास्त्री भी जैड़ै यरूशलेम थऊँ छुरै थियै, ऐह बलदै थियै कि “ऐस मन्ज शैतान हा,” अतै “ऐह मुख्य शैतान री मदद सोगी मणु थऊँ दुष्‍टात्मा जो कड़दा हा।”

23ठेरैतांये यीशु तियां जो नेड़ै हैदी करी तियां सोगी उदाहरण मन्ज कणैणा लगा, “शैतान कियां अपणी दुष्‍टात्मा जो कड़ी सकदा हा? 24अगर कसकि राज्य रै मणु मन्ज फूट पैई गच्छा, ता सो कियां टिकी सकदा हा? 25अतै अगर कसकि परिवार मन्ज फूट भोआ ता सो परिवार विखरी गान्दा हा? 26ठेरैतांये अगर शैतान अपणी ही दुष्‍टात्मा रै वरोध करा, ता सो टिकी ना सकदा? तसेरा ता अन्त ही भूच्ची गाणा। 27पर कोई भी मणु कसकि ताकतवर रै घरा मन्ज घुसड़ीकरी तसेरा घर ना लुटी सकदा, जैहणै तक कि सो तैस ताकतवर जो बनी ना लेय्आ तां सो तसेरै घरा जो लुटी सकदा हा। 28अऊँ तूसु सोगी सच बलदा हा मणु री औलादा रै सब पाप अतै बुराई जैडा सो करदै हिन, माफ भूच्ची गाणी हा, 29पर जैडा पवित्र आत्मा री बुराई करा, सो कदी भी माफ ना भूणा पर सो सदा रै पापा रा अपराधी बणदा हा।”

30यीशुऐ ऐह गल्ला तियां जो बल्ली, क्ओकि सो ऐह बलदै थियै कि सो “दुष्‍टात्मा रै वशा मन्ज हा।”

यीशु री माँ अतै भाई

(मत्ती 12:46-50; लूका 8:19-21)

31तैहणै तसेरी माता अतै हल्का भाई आये, अतै बाहर खड़ी करी तैसिओ हैदी भैजु। 32भीड़ तसेरै अखै-ब्रखै बैहुरी थी, अतै तियैं तैस सितै बल्लू, “गुरू, तुन्दी माता अतै भाई-बैहण बाहर हिन अतै तुसिओ तोपू करदै हिन।”

33यीशुऐ तियां जो जवाव दिता, “मेरी माता अतै भाई कुण हिन?” 34अतै अपणै अखै-ब्रखै बैहुरै री कनारी हेरी करी बल्लू, “हेरा, मेरी माता अतै भाई ऐह हिन। 35क्ओकि जैडा कोई प्रमात्मैं री इच्छा पुर चलदा, सो ही मेरा भाई, बैहण अतै माता हा।”

Currently Selected:

मरकुस 3: GBKNT

Highlight

Copy