लूका 3
3
यूहन्ना बपतिस्मा दिणैबाळै रा संदेश
(मत्ती 3:1-12; मरकुस 1:1-8; यूहन्ना 1:19-28)
1तिबिरियुस महाराजा रै पन्द्रमें साला मन्ज पुन्तियुस पिलातुस यहूदा परदेस रा राज्यपाल थू। तैस ही टैमैं हेरोदेस तैस रियासत रै चौं इलाकै थऊँ गलील इलाकै रा राजा थू। तसेरा अक्क भाई फिलिप्पुस इतूरैया अतै त्रखोनितिस ईयां दूनी इलाकै रा राजा थू। अतै अबिलेने जिलै पुर लिसानियास राज्य करू करदा थू। 2तैस टैमैं हन्ना अतै कैफा यरूशलेम शहरा मन्ज महायाजक थियै। यूहन्ना जैडा कि जकरिया रा पुत्र थू सो बियावान जगहा मन्ज रैहन्दा थू। तैस बलै प्रमात्मैं रा संदेसा पुजु। 3यूहन्ना यरदन नदी री कनारी अखै ब्रखै बसुरै परदेसा मन्ज ईच्ची करी, पापा री माफी तांयें पापा थऊँ मन फेरनै रै बपतिस्मा रा प्रचार करना लगा।
4जियां कि यशायाह नां रै भविष्यवक्ता रै पवित्रग्रन्था मन्ज लिखिऊरा:
“उूजाड़ जगहा थऊँ कोई हक्का पान्दा हुणु करदा कि,
‘प्रभु रा रस्ता तैयार करा, अतै ऐसा बत्ता जो सिधा भी करा।
5सब फाटी भरी गाहणी,
अतै सारै टिलै पलेन भूच्ची गाणै ऊबड़-खाबड़ रस्तै जो सिधा
अतै जैड़ै ऊचै निचै हिन सो चौरस बणाऐ गाणै हिन।
6अतै सब मणु तैस जो हेरना जैसिओ प्रमात्मैं उद्धार करनै तांयें भैजुरा हा।#यशा. 40:3-5.’”
7मणु री टोली री टोली यूहन्नै बलै बपतिस्मा लैणा ईन्दी थी। सो तियां जो बलदा थू, “हे कीड़ै सांई जहरीलै मणुओ, तूसु जो कुणी दस्सी दिता कि प्रमात्मैं रै ईणैबाळै गुस्सै थऊँ नह्ही पैय्आ। 8ठेरै तांयें सवूत देय्आ कि तुहै अपणै मन पापा थऊँ फेरै। पर अपणै-अपणै मना मन्ज ऐह सोचणा छड़ी देय्आ कि अब्राहम तून्दा पिता हा क्ओकि अऊँ तूसु सोगी सच बलदा कि प्रमात्मां ईयां पत्थरा थऊँ भी अब्राहम तांयें औलाद पैदा करी सकदा। 9अतै अबै कुहाड़ी रूखा रै मोळा पुर रखी दितुरी हा, ठेरै तांयें जैडा भी रुख खरा फळ ना दिन्दा तैस बड्ड़ी करी अगी मन्ज फूकी दिन्दै।”
10ता मणुऐ यूहन्नै थऊँ पूछु, “प्रमात्मैं री सजा थऊँ बचणै तांयें अहै कै करन?” 11तिनी तियां जो जवाव दिता, “जैस बलै दुई कुरतै भून सो तैस जो अक्क कुरता दी देआ जैस बलै अक्क भी नियां, अतै जैस बलै खाणै जो भोआ ता सो भी ईयां ही करा।” 12चुंगी लैणैं बाळै भी बपतिस्मा लैणा आये अतै पुछणा लगै, “हे गुरू अहै कै करन?” 13ता तिनी तियां जो बल्लू, “जैडा तूसु जो चुंगी लैणै तांई सरकारै दसुरी हा तैतनी ही लैऊ करै, पर धोखा धड़ी सितै तैत थऊँ मता मत लैन्दै।” 14फिरी सपाई भी तैस थऊँ पुछणा लगै, “अहै कै करन?” तिनी तियां जो बल्लू, “रिश्वत मत लैन्दै, ना ही कसी पुर झूठा मुकदमा चलान्दै अतै जतूणी तनखा तूसु जो मुलदीआ तैत मन्ज ही गुजारा करै।”
15जैहणै मणु मसीह री भाळा बैहुरै थियै ता यूहन्नै जो हेरी करी अपणै-अपणै मन मन्ज सोच विचार करना लगै कि करखी ऐह ही मसीहा ता नियां? 16ता यूहन्नै तियां जो बल्लू, “अऊँ ता तूसु जो पाणी सितै बपतिस्मा दिन्दा, पर जैडा ईणैबाळा सो ता मिन्जो थऊँ भी ताकतवर हा। अऊँ ता ऐस काबल भी नियां कि तसेरै जुटै रै तस्मै भी खोली सकू। तैस तूसु जो पवित्र आत्मा अतै अगी रा बपतिस्मा दिणा। 17अपणा त्रोंगळा तिनी हथै पकडुरा अतै तैस अपणी बगड़ी खरी करी सोती दिणी अतै कणक-कणक अपणै पेडू मन्ज कठेरनिआ अतै भू ऐसी अगी मन्ज फुकणा जैड़ी कि कदी भी हिहणै बाळी निआं।”
18ईनी साहबै यूहन्ना खरी-खरी गल्ला हुणाई करी मणु जो सुसमाचार हुणान्दा रैऊ। 19(पर जैहणै यूहन्नै, गलील जिलै रै राजा हेरोदेस जो अपणै ही भाई फिलिप्पुस री घरावाळी हेरोदियास जो अपणी बणाणै रै बारै मन्ज अतै तियां सबी कुर्कम रै बारै मन्ज जैड़ै तिनी करूरै थियै दसु ता, 20हेरोदेसै यूहन्नै जो कैदी बणाई करी अक्क होर जुल्म करी दिता।)
यीशु रा बपतिस्मा
(मत्ती 3:13-17; मरकुस 1:9-11)
21सबी मणु रै बपतिस्मा लैणै थऊँ बाद जैहणै यीशु भी बपतिस्मा लेई करी प्रार्थना करना लगू ता, स्वर्ग खुली गो। 22ता पवित्र आत्मा शारीरिक रूप मन्ज कबूतरा रै रूपा मन्ज तैस पुर ऊतरू अतै अम्बरा थऊँ ऐह आकाशवाणी भूई, “तू मेरा प्यारा पुत्र हा अतै अऊँ तिजो थऊँ खुश हा।”
यीशु री वंशावली
(मत्ती 1:1-17)
23जैहणै यीशु प्रमात्मैं रै बचना री सेवा करना लगा ता सो लगभग कोई तिहा साला रा थू। जियां कि मणु यीशु जो यूसुफ रा पुत्र समझदै थियै ता तसेरी वंशावली ईयां हा कि, यीशु यूसुफ रा पुत्र थू अतै यूसुफ एली रा, 24एली मत्तात रा, मत्तात लेवी रा, लेवी मलकी रा, मलकी यन्ना रा, यन्ना यूसुफ थू। 25यूसुफ मत्तित्याह रा, अतै मत्तित्याह आमोस रा, आमोस नहूम रा, नहूम असल्याह रा, असल्याह नोगह रा, 26नोगह मात रा, मात मत्तित्याह रा, मत्तित्याह शिमी रा, शिमी योसेख रा, योसेख योदाह रा, 27योदाह यूहन्ना रा, यूहन्ना रेसा रा, रेसा जरूब्बाबिल रा, जरूब्बाबिल शालतियेल रा, शालतियेल नेरी रा,#एज्रा 3:2; नहे. 12:1. 28नेरी मलकी रा, मलकी अद्दी रा, अद्दी कोसाम रा, कोसाम इलमोदाम रा, इलमोदाम एर रा, 29एर यहोशुआ रा, यहोशुआ इलाजार रा, इलाजार योरीम रा, योरीम मत्तात रा, मत्तात लेवी रा, 30लेवी शमौन रा, शमौन यहूदाह रा, यहूदाह यूसुफ रा, यूसुफ योनान रा, योनान इलयाकीम रा, 31इलयाकीम मेलिया रा, मेलिया मिनाना रा, मिनाना मत्तात रा, मत्तात नातान रा, नातान दाऊद रा,#2 शमू. 5:14. 32अतै दाऊद यिशै रा, यिशै ओबेद रा, ओबेद बोअज रा, बोअज सलमोन रा, सलमोन नहशौन रा,#रूत 4:20-22. 33नहशौन अम्मीनादाब रा, अम्मीनादाब अरनी रा, अरनी हिस्रोन रा, हिस्रोन फिरिस रा, फिरिस यहूदाह रा,#1 इति. 2:1-14. 34यहूदाह याकूब रा, याकूब इसहाक रा, इसहाक अब्राहम रा, अब्राहम तिरह रा, तिरह नाहोर रा,#उत्प. 21:3; उत्प. 25:26; 1 इति. 1:28-34. 35नाहोर सरुग रा, सरुग रऊ रा, रऊ फिलिग रा, फिलिग एबिर रा, एबिर शिलह रा, 36शिलह केनान रा, केनान अरफक्षद रा, अरफक्षद शेम रा, शेम नूह रा, नूह लिमिक रा,#उत्प. 11:10-26; 1 इति. 1:24-27. 37लिमिक मथूशिलह रा, मथूशिलह हनोक रा, हनोक यिरिद रा, यिरिद महललेल रा, महललेल केनान रा, 38केनान एनोश रा, एनोश शेत रा, शेत आदम रा, अतै आदम प्रमात्मैं रा थू।#उत्प. 4:25; 5:32; 1 इति. 1:1-4.
Currently Selected:
लूका 3: GBKNT
Highlight
Share
Copy
Want to have your highlights saved across all your devices? Sign up or sign in
This work is licensed under Creative Commons Attribution-ShareAlike 4.0 License.