लूका 2

यीशु रा जन्म

(मत्ती 1:18-25)

1तियां दिन महाराजा पूरै रोमी देशा मन्ज जनगणना करनै रा हूक्म दिता। 2ऐह पैहली मणु री जनगणना तैस टैमैं भूई जैहणै किवरनियुस सीरिया परदेस रा राज्यपाल थू। 3ता सब मणु अपणा-अपणा नां लिखाणै तांई अपणै-अपणै पुरखा रै शहरा जो गै।

4यूसुफ भी गलील परदेसा रै नासरत शहरा थऊँ यहूदिया परदेसा मन्ज दाऊद रै नगरा बैतलहम जो गो, कजो कि सो राजा दाऊद रै परिवार रा अतै वंशा रा थू। 5सो अपणी गर्भवती मंगेतर मरियम जो भी अपणै सोगी नां लिखाणै तांई लेई गो। 6तंयारै तैड़ी रैहन्दै-रैहन्दै तैसारै लोकिणै रै दिन पूरै भूच्ची गै। 7मरियम अपणै पहलै पुत्रा जो जन्म दिता अतै फालडू मन्ज लपेटी करी गोरू री खुरली मन्ज सुलाई दिता, क्ओकि तियां जो सरांई मन्ज रैहणै जो जगह न मुळुरी थी।

स्वर्गदूता रा पाहला जो संदेश

8तैस इलाकै मन्ज कुछ पाहल थियै। सो अक्की बलड़ा मन्ज राती जो अपणै धणा रा पैहरा करू करदै थियै। 9ता अचानक ही प्रभु रा अक्क स्वर्गदूत तंयारै सामणै ईच्ची खडू अतै प्रभु रा तेज तंयारी चौं कनारी चमंकु, ऐह हेरी करी सो ड़री गै। 10पर स्वर्गदूतै बल्लू, “ड़रा मत! हुणा, अऊँ तुसिओ बड़ी खुशी रा सुसमाचार हुणान्दा जैड़ी कि सबी मणु तांई भुणीआ 11अज राजा दाऊद रै बैतलहम शहर मन्ज तूसु तांई अक्क उद्धारकर्ता पैदा भुआ अतै यही मसीहा प्रभु हा। 12तूसु तांई तसेरी ऐह पछैण हा कि तूसु अक्क बच्चा फालडू मन्ज लपेटुरा अतै खुरली मन्ज सुतुरा हेरना।” 13ता हेरदै-हेरदै ही तैस स्वर्गदूता सोगी मतै स्वर्गदूत प्रमात्मैं रा गुणगान करदै अतै कणैदैं हुजै कि,

14“स्वर्गा मन्ज प्रमात्मैं री महिमा भोआ,

अतै धरती पुर तियां मणु जो शान्ती मूल्ळा, जियां थऊँ सो खुश हा।”

15जैहणै स्वर्गदूत तैठी थऊँ स्वर्गा जो चली गै, ता पाअल अप्पू मन्ज बलणा लगै, “अईआ अहै बैतलहम जो चलदै अतै जैड़ी गल्ल प्रभुऐ असिओ दस्सिआ, तैसा गिच्ची करी हेरदै।” 16ता पाहलै तैहणै ही गिच्ची करी मरियम, यूसुफ अतै खुरली मन्ज सो बच्चा सुतुरा हेरू। 17अतै सो गल्ला मणु सितै लाई जैड़ी ऐस बच्चै रै बारै मन्ज स्वर्गदूतै दसुरी थी। 18पाहला री ईयां गल्ला हुणी करी सबी मणु जो हैरानी भूई। 19पर मरियम सबी गल्ला जो अपणै मनां मन्ज सोचदी रैई। 20जिआं कि पाहला जो दसुरा थू सो तियां ही हेरी हुणी करी प्रमात्मैं री महिमा अतै गुणगान करदै अपणै धणा बलै फिरी आये।

यीशु रा अर्पण

21बच्चै रै जन्म थऊँ बाद अठुऐं दिन जैहणै खतना करनै रा टैमं आ ता तैस बच्चै रा नां तिऐं यीशु रखू, जैडा कि स्वर्गदूतै तसेरी मौआ रै पेटा मन्ज ईणै थऊँ पैहलै ही दसुरा थू।#उत्प. 17:12; लैव्य. 12:3.

22जैहणै मूसा री व्यवस्था रै मुताबक मरियम रै शुद भूणै रै दिन पूरै भुएै, ता यूसुफ अतै मरियम तैसिओ यरूशलेम शहरा रै मन्दरा मन्ज प्रमात्मैं रै सामणै लेई गै। 23जियां कि प्रमात्मां री व्यवस्था मन्ज लिखुरा, “हर जठा पुत्र प्रभु तांई पवित्र ठहरला।” #निर्ग. 13:2,12. 24ता प्रमात्मां री व्यवस्था रै मुताबक “घुग्‍गी रा अक्क जोड़ा या फिरी कबूतरा रै दोई बच्चै लेई करी बलिदान करन।”#लैव्य. 12:8.

शमौन रा गीत

25यरूशलेम मन्ज शिमौन नां रा अक्क मणु बड़ा धर्मी अतै भक्त थू। सो पवित्र आत्मा सितै भरूरा थू। सो इस्त्राएल रै मणु रा छुटकारा दिणैबाळै मसीहा जो भाळू करदा थू। 26पवित्र आत्मा तैसिओ दसुरा थू कि, “जैहणै तिकर सो प्रमात्मैं रै मसीहा जो हेरी ना लैन्दा तऊं तिकर तसेरी मौत ना भूणी हा।” 27सो आत्मा री प्रेरणा सितै मन्दरा मन्ज आ। जैहणै माता-पिता यीशु जो मन्दरा मन्ज अन्दरा जो लेई करी आये कि व्यवस्था रै मुताबक भेंट चढ़ान। 28ता शमौने यीशु जो अपणी खोखा लैऊ अतै प्रमात्मैं रा धन्यवाद करीके बलणा लगु कि,

29“हे स्वामी, अबै तेरा सेवक

तेरै बचना रै मुताबक शान्ती सोगी मरी सकदा हा,

30कजो कि अबै मैंई अपणी हाख्री तेरा उद्धार हेरी लैऊआ।

31जैसिओ तैंई सब देशा रै मणु तांयें भैजू हा,#यशा. 40:5.

32कि सो यहूदी जो छड़ी करी गैर यहूदी#2:32 गैर यहूदी गैर यहूदी सो मणु हिन जैड़ै यीशु जो ना मन्दै अतै व्यवस्था जो भी ना मन्दै। तांई प्रमात्मैं रा ज्ञान दिणै तांई अक्क ज्योती हा,

अतै तेरै अपणै मणु इस्त्राएली तांई महिमा हा।”#यशा. 42:6; यशा. 49:6.

33यीशु रै बारै मन्ज ऐह गल्ला हुणी करी तसेरै माता पिता यूसुफ अतै मरियम हैरान भूच्ची गै। 34ता शमौने तियां जो अशीर्वाद दिता अतै मरियम सितै बल्लू, “हेर, ऐह बच्चा कई इस्त्राएली मणु तांई खात्‍मैं रा अतै कईआ तांई उद्धार रा चिन्ह भूणा। जसेरी व्जहा थऊँ सेरै वरोधा मन्ज गल्ला भूणी।#यशा. 8:14-15. 35जैत थऊँ कईआ मणु रै दिला री गल्ला रा पता लगणा। अक्क दुख भी तलवार सांईयै तेरै प्राणा जो भी चीरदी निकळी गाणीआ।”

हन्ना री यीशु रै बारै मन्ज गवाही

36अशेरा रै गोत्रा थऊँ फनूएल नां रै अक्की मणु री कुल्ळी जसारा नां हन्ना थू, भविष्‍यवक्ता थी। सो बुढ़ी भूच्ची गछूरी थी। तैसै सता साल तिकर ही सुहाग करूरा थू। 37अतै सो चौरासी साल थऊँ विधवा थी। सो मन्दरा मन्ज ही रैहन्‍दी थी अतै प्रमात्मां सोगी दिन रात प्रार्थना, भजन अतै व्रत करदी रैन्हदी थी 38जैहणै शिमौन, मरियम अतै यूसुफ सोगी कणैऊ करदा थू, ता तैस टैमैं हन्ना भी तैठी आई अतै प्रभु प्रमात्मैं रा धन्यवाद करना लगी। सो तियां सबी सितै ऐस बच्चै यीशु रै बारै मन्ज बलणा लगी जैड़ै यरूशलेम मन्ज प्रमात्मैं रै मसीहा रै ईणै थऊँ मिलणै बाळै छुटकारै री भाळ करू करदै थियै।#यशा. 52:9. 39व्यवस्था रै मुताबक सब कुछ करनै थऊँ बाद यीशु रै माता-पिता अपणै गलील परदेसा रै नासरत नगरा जो फिरी गै। 40बच्चा मोटीन्‍दा गो अतै आत्मा मन्ज बलवान भुन्दा गो। सो ज्ञानवान भूणा लगू अतै प्रमात्मैं रा अशीर्वाद तैस पुर थू।

बारह साला रा यीशु स्याणै ज्ञानी मणु मन्ज

41यीशु रै माता-पिता हर साल फसह रा त्यौहार मनाणै तांई यरूशलेम शहरा जो गान्हदै थियै।#निर्ग. 12:24-27; व्य. 16:1-8. 42जैहणै यीशु बारह साला रा भुआ ता सो फिरी रीति रै मुताबक त्यौहार मनाणा यरूशलेम जो गै। 43जैहणै त्यौहार मुक्‍की गो ता सो अपणै घरा जो फिरी आये। पर यीशु यरूशलेम मन्ज ही रैई गो। ऐसा गल्ला रा तसेरै माता-पिता जो पता ना थू। 44तियैं सोचु यीशु, असु सोगी चलुरै मणु सोगी भूणा। तियैं अक्की दिन रा सफर कट्‍टी दिता। जैहणै तियां जो पता लगू कि यीशु सोगी नियां ता सो तैसिओ अपणै रिशतैदारा अतै जान-पहचान बाळै मणु मन्ज तोपणा लगै। 45पर जैहणै सो ना मुळु ता सो तोपदै-तोपदै यरूशलेम जो फिरी गै। 46तोपदै-तोपदै त्रियै धैङै बाद तियैं सो मन्दरा मन्ज प्रचार करनै बाळै रै मन्जै बैहुरा अतै तियां सोगी सवाल जवाव करदा हेरू। 47जैतणै मणु तसेरी गल्ला हुणु करदै थियै सो सब तसेरै सवाला जवावा थऊँ हैरान परेशान थियै। 48ता तसेरै माता-पिता तैसिओ हेरी करी हैरान भुएै अतै माता बलणा लगी, “हे पुत्रा तैंई असु सोगी इन्या कओ करू? अऊँ अतै तेरा पिता तिजो तोपदै-तोपदै परेशान भूच्ची गच्छुरै थियै।” 49“ओ मेरिऐ माता, तुहै मिन्जो कओ तोपू करदै थियै? कै तुसिओ पता निआ कि मिन्जो अपणै पिता रै घरा मन्ज भूणा जरूरीआ?” 50पर जैडा यीशुऐ बल्लू सो तंयारी समझा मन्ज कुछ भी ना आ। 51पर सो तियां सोगी चली गो। सो नासरत मन्ज पुजै अतै यीशु माता-पिता रा आज्ञाकारी वणी करी रैऊ। पर तसेरी माता ये सारी गल्ला अपणै दिला मन्ज रखी।

52अतै यीशु जवान भुन्दा गो अतै ज्ञान, डील-डौल मन्ज अतै प्रमात्मैं अतै मणु रै अशीर्वाद सितै अगो बड़दा गो।#1 शमू. 2:26; नीति. 3:4.

Currently Selected:

लूका 2: GBKNT

Highlight

Copy