Intembauzyo 31
31
Lwiimbo lwa Devedi Kumweendelezi wanyimbo
1Njubila mulinduwe O Leza, ntausigwi nsoni ndazundwa,
mubululami bwako kondivuna.
2Kulindime ucenjeke kutwi kwako, fwambaana kundivuna,
ndomba lyakundisisikizya ube nduwe,
cikwabilizyo ciyumu cakundivuna ube nduwe.
3Masimpe, ndomba, mayubilo amatijilo aangu nduwe,
undeenzye akundisololela nkaambo kazina lyako.
4Undigwisye mutukole ntobanditeede, nkaambo nguzu zyangu nduwe.
5Muuya wangu nduupa mumaanza aako, ulasyomeka, O Mwami Leza, wandinununa.
6Aabo batobela mituni yabuyo ulibasulide,
mebo nsyoma buyo mu Mwami Leza.
7Muluyando lwako lutazungaani mwebotelwa akukondwa,
nkaambo nduwe oobona mapenzi aangu,
alimwi nduwe oozi mbuupenga moyo wangu.
8Nookandaaba kuli basinkondoma taaku,
wandipa busena bwakulyeendelela nduwe.
9Akaka, kondifwida luzyalo, O Mwami Leza, ndili mumapenzi mebo,
meso aangu aubila abuusu, moyo amubili wangu zyoonse zizwide mapenzi.
10Buumi bwangu bwamana abuusu, myaka yatwentana kukutongela,
akaambo kamilandu yangu nguzu zyandimanina, mwakali muzifuwa ndalebuka.
11Kuli basinkondoma boonse ndasampuka, abalo beenzuma baide kundiweela,
boonse bandizi batalika kundiyoowa, boonse bandibona mumigwagwa balatija.
12Ndaba mbuli muntu uufwide, ndalubwa, mbuli cibiya cifwide mbwindaba.
13Bantu banji ndabaswiilila kabavwiya, balandiyoosya mazuba oonse,
bapangana zyakundijaya.
14Pele nsyoma nduwe O Mwami Leza, ngamba kuti, “Nduwe Leza wangu.”
15Mumaanza aako momuli ziindi zyangu, kuli baabo bandipenzya basinkondoma kondivuna.
16Mebo ndemubelesi wako ndileleke, undivune muluyando lwako.
17O Leza, intausigwi nsoni, kuli nduwe nkwelilila,
ubausye nsoni basizibi, batolwe kwacivumwe kabauside.
18Baumuzye basikubeja, aabo baamba majwi akusampaula baluleme,
baamba cakulisumpula akuliyanda.
19Bubotu bwako mboyobwelede bakuswiilila mbupati,
balibubwene boonse mbocitila batijila kuli nduwe.
20Ulabavuna kumakanze aabantu akubasisa aawo mpobede,
kuzwa kumilaka yabasinkondonyina ulabasisa mucilawo cako.
21Aalumbwe Leza nkaambo wanditondezya luyando lwakwe,
luyando lwakwe lugambya, ndalisinkilizidwe mumapenzi
mbuli munzi uusinkilizidwe.
22Nkeyoowede ndakati, “Ndagwisigwa kuli nduwe.”
mbwindakakulilila buyo wakandiswiilila, wakandiswiilila
nindakakukumbila kuti undigwasye.
23Nobasalali bakwe amumuyandisye Mwami Leza lyoonse,
nkaambo basyomeka Leza ulababamba,
pele basikulisumpula ulababweedezezya milandu yabo.
24Amube aacamba, muyume, nyoonse nywebo nomulangila Mwami Leza.
Currently Selected:
Intembauzyo 31: Tonga96
Highlight
Share
Copy
Want to have your highlights saved across all your devices? Sign up or sign in
Tonga Bible © United Bible Societies, 1994.
