Intembauzyo 30
30
Lwiimbo lwa Devedi lwakupegwa kwaŋanda ya Leza
1Mukuti wandigwasya O Mwami Leza ndakutembaula,
Toozumizya basinkondoma kuti bandiseke mumapenzi aangu.
2O Mwami Leza wangu nindakwiita, nindakwiita kuti undigwasye, wandiponya.
3Nduwe ookandigwisya kucuumbwe O Mwami Leza.
Wakacita kuti intayi mucilindi nduwe,
nduwe ookafutula buumi bwangu.
4Nobasalala bakwe Mwami Leza amumutembaule munyimbo,
amulilumbaizye zina lyakwe lisalala.
5Nkaambo ulakalala mukaindi kaniini buyo,
pele bubotu bwakwe mbwabuumi boonse,
kulila kulakonzya kutola busiku boonse, pele bwaca kuba lutangalo.
6Nindakakupukide ndakaamba kuti, “Taaku cinga candizungaanya.”
7Mububotu bwako, O Mwami Leza, okandikkazika,
okandikkazika mbuli cilundu ciyumu, pele nookalisisa ndakayoowa.
8Ndakakwiita O Mwami Leza, kuli Leza ndakalilila lugwasyo.
9“Ino kuli mpindu nzi mulufu lwangu, kuti naa ndaya kwacivumwe?
Sena vu alyalo inga lyakulumbaizya, nikuba kwaambilizya zyakusyomeka kwako?
10Ndiswiilile, undifwide luzyalo O Leza, kondigwasya, O Mwami Leza.”
11Kulila kwangu wakusandula kwaba kuzyana, wasamununa buumba bwangu wandipa kukondwa.
12Kukondwa kwakuti nkutembaule O Mwami Leza cakutangala,
njookulumbaizya lyoonse alyoonse O Mwami Leza wangu.
Currently Selected:
Intembauzyo 30: Tonga96
Highlight
Share
Copy
Want to have your highlights saved across all your devices? Sign up or sign in
Tonga Bible © United Bible Societies, 1994.
