Intembauzyo 27
27
Lwa Devedi
1Mwami Leza ngomunununi alufutuko lwangu, kunyina ngweyooyoowa,
Mwami Leza ncecikwabilizyo cabuumi bwangu, kunyina ngweyooyoowa,
2Nibaswena basikucita zibi kuti bazoondilwane akundizazaula,
basola kundivumpa basinkondoma bandilwana, balalebwa bawidaansi.
3Nikuba kuti impi yoonse indisinkilizye, tuuduntauki moyo wangu pe,
nkondo niindivumbukila ndicinoosyoma Leza.
4Ndikumbila cintu comwe ku Mwami Leza,
ndikumbila kuti ndikakkale muŋanda ya Mwami Leza mubuumi bwangu boonse,
nkekomba nkaambo kabubotu bwa Mwami Leza, nkemukomba muŋanda yakwe.
5Uyoondiyubika muciindi camapenzi, uyoondisisa mucikombelo cakwe,
uyoondibikka nkaliibe andomba.
6Basinkondoma bandizingulukide njoobazunda,
njoopaizya mucikombelo cakwe, nkepozomoka cakukondwa,
njootembaula Leza munyimbo.
7Swiilila jwi lyangu nekwiita O Leza, kondifwida luzyalo, ndivune.
8Wakaamba kuti, “Amundiyandaule.” Mebo ndakati, “Ndinookuyandaula, O Mwami Leza.”
9Utalisisi kuzwa kuli ndime, utanditandi mubukali ndemubelesi wako,
nduwe mugwasyi wangu, utandikaki nikuba kundilekelezya, O Mwami Leza mufutuli wangu.
10Nikuba kuti taata abaama bandisowa, uyoonditambula Mwami Leza.
11Ndiiisye nzila zyako O Mwami Leza, kondeenzya mumukondo wabululami,
nkaambo basinkondoma mbanji.
12Utandaabi kuli basikundilwana, mbanji bandikonga akundilengelezya twaambo.
13Ndicizuminine eeci cakuti, njoobona bubotu bwa Mwami Leza, kubusena kuli baumi.
14Syoma mu Mwami Leza, zumina koba aalulangilo, syoma mu Mwami Leza.
Currently Selected:
Intembauzyo 27: Tonga96
Highlight
Share
Copy
Want to have your highlights saved across all your devices? Sign up or sign in
Tonga Bible © United Bible Societies, 1994.
