Intembauzyo 28
28
Lwa Devedi
1Ndakwiita, O Mwami Leza, omwaala wangu, kutabi mbuli kuti tondimvwide,
ndaba mbuli muntu uuli kwacivumwe.
2Koswiilila kukomba kwangu, ndakwiita kuti undigwasye ciindi netambika
maanza aangu kucikombelo cako cisalala.
3Utandikweleli antoomwe abasizibi, aabo bacita zitaluzi,
baamba cabweenzinyina, kakuli mumoyo bazwide kusulaika.
4Kobabweedezezya bweelede milimo yabo, kweendelana amicito yabo,
mbubonya mbuli zeezyo nzibakacita, baletele cisubulo cibeelede.
5Tababikki myoyo kumilimo ya Mwami Leza, nikuba kuncito zyamaanza
aakwe, ulabanyonyoona, takababukulusyi limbi pe.
6Aalumbwe Mwami Leza, nkaambo wandiswiilila nindamulilila lweengelelo.
7Mwami Leza nenguzu, nentobo yangu, ndilamusyoma cakumaninina,
nkaambo nguundigwasya, moyo wangu uladuntaana cakukondwa kapati,
alimwi walo ndamutembaula munyimbo.
8Mwami Leza nenguzu zyabantu bakwe, nceciyubilo calufutuko kumunanike wakwe.
9Kofutula bantu bako, ubaleleke nkaambo ndukono lwako, ubeembele kobalela lyoonse.
Currently Selected:
Intembauzyo 28: Tonga96
Highlight
Share
Copy
Want to have your highlights saved across all your devices? Sign up or sign in
Tonga Bible © United Bible Societies, 1994.
