Intembauzyo 19
19
Lwiimbo lwa Devedi Kumweendelezi wanyimbo
1Zyakujulu zyaambilizya bulemu bwa Leza,
julu litondezya milimo yamaanza aakwe.
2Buzuba abuzuba zilaambilizya, masiku amasiku zilatondezya luzibo.
3Nikuba kuti tazyaambauli nikuba kukanana naaceya,
nikuba kuti majwi aazyo taamvwigwi.
4Pele mulumbe wazyo ulimwaikide mbwiili nyika,
kwaambilizya kwazyo kulasika kumagolelo aanyika.
Leza wakayakila zuba ŋanda kujulu.
5Lilazwa mbuli sibwiinga uuzwa muŋanda yakwe,
mbuli sikuzuza uulibambila kusiyana.
6Litalikila kulubazu lomwe lwakujulu,
lyaakubbilila kuli lumwi,
taakwe cikonzya kuyuba kupya kwalyo.
7Ulilondokede mulawo wa Mwami Leza, ulabukulusya muuya,
mbeta zya Mwami Leza zilasyomeka zilasongwaazya batazi.
8Ililuleme milawo ya Mwami Leza, ilatangazya moyo,
malailile aa Mwami Leza alasalala, alapa luzibo.
9Bulondosi bukkalilila lyoonse alyoonse nkulemeka Mwami Leza,
Milawo ya Leza njakasimpe, ililuleme yoonse.
10Ilayandika kwiinda ngolida, kwiinda ngolida iini-ini,
alimwi ilalweela kwiinda ceeya cabuci.
11Njiicenjezya mubelesi wako, aimba ulajana bulumbu bupati.
12Ani nguni uumvwisya ndubizyo zyakwe?
Aboobo ndisalazya kuzwa kundubizyo nzyecita cakutaziba.
13Ndikwabilile kuzinyonyoono zyakucita aacaali, zitandeendelezyi pe,
mbombubo mbwekonzya kubula kampenda, kuti intabi aamulandu mupati.
14Majwi ngekanana amiyeeyo yamoyo wangu,
zitambulike kuli nduwe O Mwami Leza, O mwaala, munununi wangu.
Currently Selected:
Intembauzyo 19: Tonga96
Highlight
Share
Copy
Want to have your highlights saved across all your devices? Sign up or sign in
Tonga Bible © United Bible Societies, 1994.
