Intembauzyo 20
20
Lwiimbo lwa Devedi Kumweendelezi wanyimbo
1Ciindi ncoli mumapenzi Mwami Leza akumvwe,
likukwabilile zina lya Leza wa Jakobo.
2Akugwasye kuzwa ku ŋanda yakwe iisalala akukwabilile kuzwa ku Ziyoni.
3Zituuzyo zyako zyoonse aziyeeye,
azitambule zipaizyo zyako zyakutenta.
4Eeco cisukeme moyo wako akupe,
makanze aako oonse aacite kuti azwidilile.
5Noyoozunda tuyooyobeka cakutangala,
tuyooululula ndembela zyesu muzina lya Leza wesu,
zyoonse nzyokumbila akupe Mwami Leza.
6Ndaziba lino kuti Leza ulafutula munanike wakwe,
kuzwa kujulu lyakwe lisalala ulamuvuwa,
ulamufutula ajanza lyakwe lyalulyo.
7Kuli bamwi basyoma nkalaki abamwi basyoma mabbiza,
pele swebo tusyoma muzina lya Mwami Leza wesu.
8Aaba balalebwa akuwa, pele swebo tulaima nji.
9O Mwami Leza, kozundya mwami, kotuvuwa notukwiita.
Currently Selected:
Intembauzyo 20: Tonga96
Highlight
Share
Copy
Want to have your highlights saved across all your devices? Sign up or sign in
Tonga Bible © United Bible Societies, 1994.
