Filimoni 1

1Ndime Paulu, mwaange nkaambo ka Kilisito Jesu, tuli a Timoti mukwesu. Tulakujuzya yebo oyandwa Filimoni similimoma. 2Tulajuzya a Apiya mucizi wesu, a Aakiposi silumambama, antoomwe ambungano iibungana muŋanda yako.

3Leza Taata a Jesu Kilisito Mwami wesu bamubede aaluse akumupa luumuno.

Zyaluyando alusyomo lwa Filimoni

4Ndalumba Leza wangu lyoonse nendikuyeeya mukukomba kwangu, 5nkaambo ndilimvwide kuti ulayanda akusyoma Mwami Jesu abasalali boonse. 6Ndakomba kuti ciindi noaba zyalusyomo lwako bantu bazibisye zibotu zyoonse nzyojisi muli Kilisito. 7Omukwesu, luyando lwako lwandikkomanisya akundiyumya-yumya kapati nkaambo wabukulusya myoyo yabasalali boonse.

Mbwaakakumbilila Onesimasi

8Kwalo cali kukonzeka kuti ndikulailile muli Kilisito nzyoelede kucita. 9Pele akaambo kaluyando ndati nkukumbile, mebo lwangu nde Paulu, ndemunene alimwi ndemwaange nkaambo kakubelekela Kilisito Jesu. 10Ndakukumbila nkaambo ka Onesimasi ooyo wakaba mwanaangu nkeli muntolongo. 11Ciindi cakamana katakwe mulimo kulinduwe, pele sunu ulakonzya kutugwasya toonse tobilo andime.

12Lino ndamuboozya kulinduwe, nkabela mukucita boobo kwakoya aanga yebo ndakutumina amoyo wangu woonse. 13Ndali kuyanda kuti kacikkede ambebo, kuti andikutaukile mucibaka cako ciindi nencili mwaange akaambo kakukambauka Makani Mabotu. 14Nsiyandi kukusinikizya kuti undigwasye pele njanda kuti omwini ulisungule kucita boobo.

15Ambweni Onesimasi wakagwisigwa kulinduwe kwakaindi aaka mukuti ampilukila uzookkalilile anguwe lyoonse. 16Atabi mbuli muzike buyo, pele kapati abe mbuli munyoko uuyandika. Wakandigwasya kapati, pele yebo uyookugwasya kwiindilila, nkaambo mmuntu wako amusyominyoko. 17Aboobo kuti koti ndimweenzinyoko mutambule mbubonya mbonga watambula ndime. 18Kuti naa wakakubisizya nikuba kukukweletela, cibe mbuli mulandu wangu. 19Mebo nde Paulu, ndalemba majwi aaya ajanza lyangu ndemwini, ndizookubbadela. Ndacita oobo takuli kukuyeezya ncozi kale kuti cikwelete cako kulindime mbuumi bwako. 20Iiyi, omukwesu, ndiyanda lugwasyo kulinduwe mu Mwami. Ndibukulusye nkaambo ndilasyoma kuti ulacita ncobeni eezyo nzindakukumbila. 21Ndizi kuti ulaindilizya kucita ali nzindakumbila eezi. 22Cabili nceeci, undibambile busena nkaambo ndasyoma kuti Leza ulamvwa kukomba kwanu akundiboozya kulindinywe.

Kujuzya kwamamanino

23Epafulasi walo uuli mbuli mwaangema muli Kilisito Jesu ulakujuzya, 24abalo ba, Maako, Alisitakosi, Dimasi, a Luka basimilimoma balakujuzya.

25Mwami Jesu Kilisito amubede aaluse nyoonse.

Currently Selected:

Filimoni 1: Tonga96

Highlight

Copy