Taitasi 3

Buumi bwa Bukilisito

1Kobayeezya bantu bako kuti kabalibombya kubeendelezi abaleli. Babaswiilile akucita milimo yoonse kabotu-kabotu. 2Batanoosampauli muntu naba ni pe, alimwi kuti batanoozwangani. Baleelede kulibombya alimwi akulemeka bantu boonse. 3Nkaambo aswebo kaindi twakali bafuba-fuba, bataswiilili, basweekede. Twakali bazike bazisusi zyaandeene-andeene. Twakali kukkala muzibi mbuli bbivwe. Bantu bakali kutucimwa aswebo twakali kucimana. 4Pele ciindi bubotu aluyando lwa Leza Mufutuli wesu nizyakayubununwa, 5wakatufutula. Taakatufutula akaambo kamilimo iiluleme njitwakacita pe, pele akaambo kalweengelelo lwakwe. Wakatufutula akusamba kutupa kuzyalwa kupya abuumi bupya kwiindila mu Muuya Uusalala. 6Muli Jesu Kilisito Mufutuli wesu, Leza wakatupa Muuya Uusalala camaanza obilo. 7Wakacita eezi kuti tululamikwe muluse lwakwe akuti tukabone buumi butamani mbotulangila. 8Majwi aaya ngamasimpe.

Njanda kuti zintu eezi uzyaambe anguzu kuti basyoma Leza balipe mukucita zibotu zilaampindu akugwasya bantu. 9Pele kokaka nkazyanyo zyabufuba-fuba, twaambo twamazyalani, kuzwangana, kupampanina zyamilawo nkaambo eezi tazigwasyi alimwi nzyabuyo. 10Muntu uukazya, komucenjezya ziindi zyobilo, naa tamvwi, mufutatile. 11Nkaako ulizi kuti muntu uuli boobo ulipotene, ngusizibi, walizula mwini.

Malailile aamamanino

12Ndaakutuma Aatemasi naba Tikikasi kulinduwe, ukafwambaane kuboola kulindime ku Nikopolisi, nkaambo ndikanzide kuyookkalila nkuko ciindi camupeyo. 13Usungwaale kugwasya Zenasi simulawo a Apolosi mulweendo lwabo, ubone kuti kunyina ncobabula. 14Bantu besu baleelede kwiiya kulipa kumilimo mibotu, kutegwa bakonzye kugwasya aayandika lugwasyo, kuti batabi bantu batakwe mpindu.

15Boonse mbotuli aabo balakujuzya. Ubajuzye aabo batuyanda mulusyomo.

Leza akubede aaluse.

Currently Selected:

Taitasi 3: Tonga96

Highlight

Copy