Maako 10
10
Makani aakulekana
(Mateyo 19.1-12; Luka 16.18)
1Jesu wakazwa mumunzi wa Kapenaumu, wazubuka mulonga wa Jolodani akuya kucisi ca Judiya. Makamu aabantu akumubunganina, wakabaiisya mbubonya mbuli mbwaakali kucita lyoonse.
2Bamwi Bafalisi bakamuzida kuti bamusunke bakati, “Twaambile, sena muntu uleelede kuleka mukaintu wakwe kweendelana amulawo wesu?”
3Jesu wakababuzya mubuzyo wakati, “Ino Mozesi wakamulailila buti?”
4Bakati, “Mozesi wakazumizya mwaalumi kulembela mukaintu wakwe lugwalo lwakumuleka, mpoonya amuleke.”
5Jesu wakati kulimbabo, “Nkaambo kabuzangi bwanu Mozesi ncaakamulailila boobo. 6Pele kwakaambwa kuti, kumalengelo, ‘Leza wakalenga mwaalumi amukaintu. 7Akaambo kaako mwaalumi uyoosiya wisi abanyina akukakatila mukaintu wakwe, 8nkabela bobilo aaba balaba mubili omwe.’ Tabacili babili, pele baba omwe. 9Aboobo aabo Leza mbaakaswaanganya kutabi muntu uubaandaanya.”
10Nibakajokela kuŋanda, basikwiiya abalo bakabuzya Jesu makani aaya ngoonya. 11Wakabaambila kuti, “Kufumbwa ooyo uuleka mukaintu akukwata uumbi, ulaamulandu wabumambe kulinguwe. 12Munzila yeelene, mukaintu uuzwa kumulumaakwe akukwatwa mwaalumi uumbi, walalikwa.”
Jesu mbwaakaleleka bana
(Mateyo 19.13-15; Luka 18.15-17)
13Bamwi bantu bakaleta bana babo kuli Jesu kuti abaampe maanza akubaleleka, pele basikwiiya bakwe bakalikulesya bantu aabo. 14Jesu naakabona boobo, wakanyemena basikwiiya bakwe wabaambila kuti, “Amubaleke bana baze kulindime, mutabakasyi, nkaambo bwami bwa Leza mbubwabo bali boobu. 15Ncobeni ndamwaambila kuti kufumbwa ooyo uutatambuli bwami bwa Leza mbuli mwana, takooyoonjila mulimbubo pe.” 16Nkabela Jesu wakabakumbata bana wabaampa akubaleleka.
Mulombwana muvubi
(Mateyo 19.16-30; Luka 18.18-30)
17Jesu mbwaakatalika buyo kweenda, kwakamuzuzaanina mulombwana umwi wakamuvuntamina akumubuzya kuti, “O Mwiiyi mubotu, ncintu nzi cibotu ncendeelede kucita kuti ndibe aa buumi butamani?”
18Mpoonya Jesu wakati, “Undiitila nzi kuti ndimubotu? Taakwe muntu mubotu ccita Leza alikke. 19Kayi ulizi milawo ya Leza yaamba kuti, ‘Utajayi, utaciti bumambe, utabbi, utabejelezyi, utacengi, lemeka uso abanyoko?’”
20Mulombwana ooyo wakaingula kuti, “O Mwiiyi kuzwa kubwana bwangu taakwe nuuba omwe wamilawo eeyi ngwindatakabamba.”
21Jesu wakamulangisisya caluyando akumwaambila kuti, “Kwasyaala comwe. Koya ukauzye zyoonse nzyojisi, mali ngotikajane ukape bacete, eelyo uyoojana lubono kujulu, omana uzoonditobele.” 22Amvwe buyo majwi aaya, wakatyompwa, wakainka kauside, nkaambo wakajisi lubono lunji.
23Jesu wakacebaukila basikwiiya bakwe akubaambila kuti, “Nciyumu kubantu bavubi kunjila mubwami bwa Leza!”
24Aaya makani akabagambya basikwiiya. Jesu wakabaambila alimwi kuti, “Beenzuma, nciyumu kunjila mubwami bwa Leza. 25Ncitete kunkamela kunjila mukapulo kanyeleti kwiinda mbocibede kumuvubi kuti anjile mubwami bwa Leza.”
26Basikwiiya bamvwe boobo bakayumwa mukanwa, bakabuzyanya kuti, “Mwati inga kuyooba uyoofutuka buya?”
27Jesu wakabalanga akubaambila kuti, “Kubantu eeci tacikonzeki pe, pele kuli Leza zintu zyoonse zilakonzeka.”
28Ndilyonya Pita wakati, “Kolanga, swebo twakasiya zyoonse twakutobela.”
29Jesu wakati kulimbabo, “Iiyi mbombubo, alimwi ndamwaambila kuti kufumbwa uuyoosiya ŋanda yakwe, nibaba bana bokwabo, nibaba bacizi, nibaba banyina, naba wisi, nibaba bana bakwe, niiba myuunda akaambo kandime aka Makani Mabotu, 30uyootambula zinji-zinji kuciindi eeco, myaanda-myaanda yamaanda, bamanyina, bana, myuunda, alimwi kuzwaawo mapenzi. Pele ciindi ciboola uyootambula buumi butamani. 31Pele bataanzi banji bayoosyaalila limwi, pele basyaalizi bayooba mbabataanzi.”
Jesu mbwaakasinsima zyalufu lwakwe ciindi catatu
(Mateyo 20.17-19; Luka 18.31-34)
32Nibakali kuya bweenda munzila iiya ku Jelusalemu, Jesu wakali kweenda kumbele lyabasikwiiya bakwe bakalibilikide. Abalo bantu bakabatobede munsi bakaliyoowede. Eelyo Jesu wakaita basikwiiya bakwe bali kkumi ababili kumbali akubaambila zintu ziyoocitika kulinguwe. 33Wakati, “Tuya ku Jelusalemu, ooko Mwanaa Muntu nkwayooabwa mumaanza aabapaizi basilutwe abamayi ba Mulawo. Balo bayoomupa mulandu walufu akumwaaba kuli bamasi. 34Bayoomunonga, kumuswida mate, kumukwabbaula akumujaya. Nkabela mumazuba otatwe uyoobuka kuzwa kubafu.”
Kukumbila kwa Jemusi a Joni
(Mateyo 20.20-28)
35Lino Jemusi a Joni, bana ba Zebedii, bakasika kuli Jesu. Bakati, “O Mwiiyi, kuli cintu ncotuyanda kuti utucitile.”
36Jesu wakababuzya, “Ino ncinzi ncomuyanda kuti ndimucitile?”
37Bakati, “Tuyanda kuti waakukkala acuuno cako cabulemu, ukatuzumizye kuyookkala umwi kululyo umwi kulumwensi lwako.”
38Mpawo Jesu wakabaambila kuti, “Tamuzi ncomukumbila. Sena mulakonzya kunywida munkomeki yamapenzi njenywida mebo? Sena inga mulakonzya kubbapatizigwa mumapenzi mbweyoobbapatizigwa mebo?”
39Bakamuvwiila kuti, “Tulakonzya.” Jesu wakabaambila kuti, “Ncobeni muyoonywa munkomeki njeyoonywida, alimwi muyoobbapatizigwa mbuli mbweyoobbapatizigwa mebo. 40Pele kukkala kubbazu lyangu lyalulyo antela kulumwensi lwangu teensi ndime eempa pe. Ngu Taata uuyoopa mabazu aaya kuli baabo mbaakasala.”
41Lino basikwiiya aabo bamwi bali kkumi nibakamvwa makani aaya, bakanyemena Jemusi a Joni. 42Mpoonya Jesu wakabaita boonse wakati, “Mulizi kuti bami babamasi balida aamitwe yabantu abalo beendelezi mbubonya. 43Pele kuli ndinywe takweelede kuba boobo pe. Kufumbwa uuyanda kuba mupati uleelede kuba mubelesi wanu. 44Kufumbwa uuyanda kuba mutaanzi, uleelede kuba mutwanga waboonse. 45Nkaambo Mwanaa Muntu taakwe naakazida kuzoobelekelwa, wakazida kuzoobelekela bamwi milimo akusanga buumi bwakwe kuti anunune bantu banji.”
Jesu mbwaakaponya Batimeyusi moofu
(Mateyo 20.29-34; Luka 18.35-43)
46Mpoonya bakasika kumunzi wa Jeliko. Jesu naakali kuzwa aawo antoomwe abasikwiiya bakwe abantu banji, mwaalumi umwi moofu, zina lyakwe Batimeyusi, nkokuti, mwanaa Timeyusi, wakalikkede kumbali aamugwagwa kakumbila. 47Naakamvwa kuti Jesu uuzwa ku Nazaleta nguuenda, wakatalika koongolola kuti, “Jesu, O Mwanaa Devedi, ndibeda aalweengelelo!”
48Nkabela bantu bakamukalalila, bakamwaambila kuti aumune. Pele walo wakoongololesya kwiinda, wakati, “Akaka, O Mwanaa Devedi, ndibeda aalweengelelo!”
49Mpoonya Jesu wakaima wati, “Amumwiite.” Lino bakamwiita. Bamwaambila kuti, “Botelwa! Nyamuka, koza ulakwiita.”
50Mpoonya wakasotoka, wasowa cibaki cakwe, wainka kuli Jesu.
51Jesu wakamubuzya kuti, “Ino uyanda kuti ndikucitile nzi?” Moofu wakati, “O Mufundisi, ndiyanda kubona.” 52Jesu wakamwaambila kuti, “Koya, lusyomo lwako lwakuponya.” Mpoonya-mpoonya wakakonzya kubona, eelyo wakatobela Jesu.
Currently Selected:
Maako 10: Tonga96
Highlight
Share
Copy
Want to have your highlights saved across all your devices? Sign up or sign in
Tonga Bible © United Bible Societies, 1994.
