Mateyo 5

Jesu mbwaakakambauka acilundu

1Lino Jesu naakabona makamu aabantu, wakatanta acilundu. Akkale buyo basikwiiya bakwe bakasika kulinguwe. 2Eelyo wakatalika kubaiisya kuti,

3“Balilelekedwe bacete mumuuya,

nkaambo bwami bwakujulu mbubwabo.

4“Balilelekedwe aabo balila,

nkaambo Leza uyoobaumbulizya.

5“Balilelekedwe aabo babombe,

nkaambo bayoovuba nyika Leza njaakasyomezya.

6“Balilelekedwe aabo bafwa nzala anyota yabululami,

nkaambo Leza uuyoobapa nzyobabula.

7“Balilelekedwe aabo basilweengelelo,

nkaambo abalo Leza uyoobeengelela.

8“Balilelekedwe basalala mumoyo,

nkaambo bayoobona Leza.

9“Balilelekedwe basikuyanzanya,

nkaambo bayooitwa kuti mbana ba Leza.

10“Balilelekedwe aabo bapenzegwa akaambo kabululami,

nkaambo bwami bwakujulu mbubwabo.

11“Nywebo mulilelekedwe ciindi bantu nibayoomutukila, kumupenzya akumutamikizya zintu zibi zyoonse zyakumubejezya ankaambo kandime. 12Amutangale akusekelela nkaambo bulumbu bwanu kujulu mbupati. Mbombubo mbubonya oobo bantu mbobakabapenzya basinsimi aabo bakali kumbele lyanu.

Jesu mbwaakaamba zyamunyo amumuni

(Maako 9.50; Luka 14.34-35)

13“Ndinywe munyo wanyika, pele kuti naa munyo wasampuka, ino inga walunzigwa buti? Tuucikwe mulimo, ulasoogwa akulyataukwa abantu.

14“Ndinywe mumuni uumunikila bantu bamunyika. Munzi uuyakidwe atala aacilundu tuukonzyi kusiswa. 15Alimwi bantu nibamunika lambe tabalibikki kunsi aacisuwo pele balalibikka aciimikilo, nkabela lilamunikila boonse bali muŋanda. 16Anywebo mbubonya oobo mumuni wanu uumunike antangalala kuti bantu baibone milimo yanu akupa bulemu kuli Uso uuli kujulu.

Kwiisya zyamulawo

17“Mutayeeyi kuti ndakaboolela kuzikumanizya Mulawo wa Mozesi akwiisya kwabasinsimi. Taakwe nindakaboolela kuzikazya pele kucita zilembedwe. 18Ncobeni ndamwaambila kuti julu anyika ziyoomana, pele taakwe noiba yomwe njiisyo ya Mulawo iiyoomana kusikila zyoonse zikacitwe. 19Nkaambo kaako kufumbwa uusotoka nikaba komwe kamilawo eeyi akwiisya bantu kuti bacite oobo, uyooba muniini mubwami bwakujulu. Pele ooyo wiitobela akwiisya uyooba mupati mubwami bwakujulu. 20Ncobeni ndamwaambila kuti takuli buyo boobo, pele, ccita bululami bwanu kabwiinda oobo bwabamayi ba Mulawo a Bafalisi tamukanjili mubwami bwakujulu.

Kwiisya zyakunyema

21“Tee mwakamvwa basikale mbubakaambilwa kuti, ‘Utajayi, nkaambo kufumbwa ooyo uujaya mweenzinyina uleelede kubetekwa.’ 22Mbombubo, pele ndamwaambila kuti kufumbwa uunyemena mweenzinyina uleelede kubetekwa. Ayooyo uusampaula mweenzinyina uleelede kubetekwa munkuta mpati. Pele ooyo uuti, ‘Yebo ociyanga!’ Uleelede kuwaalwa mulilo uutazimi. 23Nkaako kuti watola cipo cako kucikombelo wamana wayeeya kuti ulijisi makani amunyoko, 24siya cipo cako ooko kumbele lyacipaililo uunke. Usaangune kuyanzana anguwe, eelyo notiboole kuzikupa cipo cako.

25“Muleelede kufwambaana kuyanzana asinkondonyoko noceenda anguwe kuya kunkuta. Nkaambo cimwi ciindi inga wakupa kumubetesi, wamana mubetesi wakupa kumulindizi, eelyo ulabikkwa muntolongo. 26Nkasimpe ndakwaambila kuti tokooyoozwa oomo kusikila ukabbadele zyoonse.

Kwiisya zyabumambe

27“Tee mwakamvwa kuti, ‘Utaciti bumambe.’ 28Mbombubo, pele mebo ndamwaambila kuti kufumbwa uulanga mukaintu akumunyomenenwa walalika kale mumoyo wakwe. 29Lino kuti naa liso lyako lyalulyo lyakulebya kuti ubisye, linonkole ulisowe, nkaambo nkubotu kuti wasweekelwa cimwi cipaanzi camubili wako kwiinda kuti mubili woonse wasowelwa mumulilo uutazimi. 30Kuti naa kuboko kwako kwalulyo kwakulebya kuti ubisye, kukosole ukusowe, nkaambo nkubotu kuti naa wasweekelwa cimwi cipaanzi camubili wako kwiinda kuti mubili wako woonse wasowelwa mumulilo uutazimi.

Kwiisya a zyakulekana

(Mateyo 19.9; Maako 10.11-12; Luka 16.18)

31“Alimwi kwakaambwa kuti, ‘Kufumbwa uuleka mukaintu wakwe, uleelede kuti amupe lugwalo lwakumuleka!’ 32Mbombubo, pele mebo ndamwaambila kuti kufumbwa ooyo uuleka mukaintu wakwe, watacita bumambe, wamucitya sibumambe, ooyo uukwata mukaintu wakalekwa wacita bumambe.

Kwiisya zyazikonkezyo

33“Tamubwene kuti kwakaambwa kuli basikale kuti, ‘Utakonkezyi cakubeja. Ucitile Mwami Leza mbubonya oobo mbookonkezya kulinguwe.’ 34Mbombubo, pele mebo ndamwaambila kuti, ‘Utakonkezyi aasyoonto pe, nikuba kuti kujulu,’ nkaambo ncecuuno ca Leza, 35nikuba kukonkezya kuti, ‘ansi buya!’ Nkaambo ncecilyatilo ca Leza, nikuba kukonkezya kuti, ‘Jelusalemu buya!’ Nkaambo ngomunzi wa Mwami mupati. 36Alimwi utakonkezyi kuti, ‘mutwe wangu buya!’ Nkaambo tokonzyi kusandula kasusu kako kuti katube naa kasiye. 37Kwaamba kwanu akube ‘Iiyi,’ naa ‘Peepe.’ Nkwiindilizya kwaamba boobo kuzwa kuli siluuni.

Kwiisya zyakupilusya bubi

(Luka 6.29-30)

38“Mwakamvwa kuti kwakaambwa kuti, ‘Wakujaya liso awalo ajaigwe liso, wakunonkola lino awalo anonkolwe lino!’ 39Mbombubo, pele mebo ndamwaambila kuti, ‘Utamupilusizyi bubi mubi.’ Pele kuti naa muntu wakuuma kusaya lyalulyo mukasampu-sampu, umusandwide alimwi saya. 40Alimwi kuti naa umwi uyanda kukupa kaambo akukunyanzya cibaki atolelele ajansi. 41Alimwi kuti naa sikalumamba wakusungilizya kweenda musinzo wacitulo comwe, uunke aanguwe kwamusinzo wazitulo zyobilo. 42Mupe ooyo uukukumbila alimwi ooyo uuyanda kukolota utamwiimi pe.

Zyaluyando kulibasinkondonyoko

(Luka 6.27-28, 32-36)

43“Tee mwakamvwa kuti, ‘Uyande mweenzinyoko, usule sinkondonyoko?’ 44Mbombubo, pele mebo ndamwaambila kuti, ‘Yanda sinkondonyoko, ubakombele aabo bakupenzya, 45mukuti mube bana ba Uso uuli kujulu.’ Nkaambo walo nguucita kuti zuba lipaswide aabo babi ababotu, akuusizya mvula baluleme abaabo bataluleme. 46Nkaambo kuti naa mwayanda baabo bamuyanda, ino mujisi bulumbu nzi? Sena abalo bakunze tabaciti boobo? 47Alimwi kuti naa kamujuzya buyo bana bokwanu, ino ncinzi ncomucita kwiinda bamwi? Sena abalo bamasi tabaciti oobo? 48Nkaako nywebo muleelede kuba bantu basalala mbubonya mbuli Uso wakujulu.

Currently Selected:

Mateyo 5: Tonga96

Highlight

Copy