Mateyo 6

Kwiisya makani aazipo

1“Amucenjele kuti mutaciti milimo yanu iiluleme ku bantu mumambonwa, nkaambo mwacita boobo tamukwe bulumbu kuli Uso uuli kujulu.

2“Nkaambo kaako ciindi nimupa zipo kubantu bapengede mutasibi mweembo mbuli basikuupaupa aameso mbobacita muzikombelo, mumigwagwa kuti balumbaizigwe abantu. Ncobeni ndamwaambila kuti balijisi kale bulumbu bwabo. 3Pele nywebo ciindi nimupa zipo zyaluzyalo, janza lyanu lya lumwensi litazibi lyalulyo ncolicita, 4kutegwa zipo zyanu zitabonwi abantu. Eelyo Uso uubonena kumbali uyoomulumbula caantangalala.

Kwiisya mbokukombwa

(Luka 11.2-4)

5“Lino ciindi ncomukomba, tamweelede kuba mbuli basikuupaupa ameso pe, nkaambo balayanda kwiima akukomba muzikombelo amuzyooko zyamumigwagwa kutegwa babonwe abantu. Ncobeni ndamwaambila kuti balijisi kale bulumbu. 6Pele nywebo ciindi nomukomba, amunjile muŋanda yanu, mujale mulyango, mukombe kuli Uso Uutabonwi. Eelyo walo Uso uubona zyoonse zicitwa mumaseseke uyoomulumbula.

7“Nkabela mukukomba mutanoovuzyi majwi mbuli mbobacita bakunze bayeeya kuti balamvwigwa nkaambo kamajwi manji. 8Nywebo mutabi mbuli mbabo pe, nkaambo Uso ulizi nzimubulide kamutana kumukumbila. 9Pele mboobu mbomweelede kukomba:

‘Taateesu ooli kujulu,

alilemekwe zina lyako.

10Abuboole bwami bwako,

alucitwe luyando lwako ansi aano

mbubonya mbuli mbolucitwa kujulu.

11Utupe sunu zilyo nzyotubula.

12Utulekelele milandu yesu,

mbubonya mbuli mbotubalekelela aswebo

balaamilandu kulindiswe.

13Utatulekeli mukusunkwa,

pele utuvune kumubi uulya.

Nkaambo bwami mbubwako anguzu abulemu,

kukabe kutamani. Ameni.’

14“Nkaambo kuti naa mwalekelela bantu milandu yabo, awalo Uso uuli kujulu ulamulekela anywebo. 15Pele kuti naa nywebo tamulekeleli bantu milandu, awalo Uso takooyoomulekelela pe.

Kwiisya zyakuliimya kulya

16“Nkabela ciindi ncomuliimya kulya, mutanooungumani mbuli basikuupaupa ameso. Nkaambo balasyulunganya masyu kutegwa kuliimya kwabo kubonwe abantu. Ncobeni ndamwaambila kuti balijisi kale bulumbu bwabo. 17Pele nywebo ciindi nomuliimya munanike mutwe akusamba kumeso, 18kutegwa kuliimya kwanu kutabonwi kubantu, pele kubonwe buyo kuli Uso uutabonwi. Walo Uso uubona zyoonse zicitwa kumbali uyoomulumbula caantangalala.

Makani aalubono kujulu

(Luka 12.33-34)

19“Mutanooliyobwedi lubono ansi aano, mapempya ankalaya mpozinyonyoona ababbi mpobadonkola kubba. 20Pele nywebo amuyobole lubono kujulu, ooko mapempya niiba nkalaya nkozitanyonyooni, ababbi nkobatadonkoli kuti babbe. 21Nkaambo ooko kuli lubono lwanu nkokunooli mizeezo yanu.

Mumuni wamubili

(Luka 11.34-36)

22“Meso ngomumuni wamubili, aboobo kuti naa meso aanu kaali kabotu mubili woonse ulasalala. 23Pele kuti naa meso aanu kaatali kabotu, mubili woonse ulaba aamudima. Eelyo kuti naa wali mumuni wasanduka waba mudima, mudima ooyo uyoosiya mbi citaambiki!

Leza abuvubi

(Luka 16.13; 12.22-31)

24“Taakwe muntu uukonzya kubelekela bami bobilo, nkaambo ulasula umwi akuyanda umwi, naa ulakakatila kuluumwi akusampaula umwi. Tamukonzyi kubelekela Leza alimwi abuvubi pe.

25“Nkaambo kaako ndamwaambila kuti mutalibiliki azyabuumi bwanu, kuti muyoolya nzi naa kunywa naa kusama. Sena buumi tabuli bubotu kwiinda cilyo, awalo mubili tuuli mubotu kwiinda zyakusama? 26Amulange bayuni, tabasyangi, tabatebuli, nikuba kuyobola mumatala. Nikuba boobo Uso uuli kujulu ulabasanina. Sena nywebo tamuyandiki kwiinda mbabo? 27Ino nguni wanu nalibilika buti uukonzya kuyungizya buumi bwakwe naaceya?

28“Ino nkaambo nzi ncomulibilika azyakusama? Amuyeeye maluba-luba aamusokwe mbwaakomena. Taabeleki, taaluki zisani. 29Pele ncobeni ndamwaambila kuti naba Solomoni mubulemu bwakwe boonse taakwe naakasamide mbuli ngawo pe. 30Pele kuti naa Leza kasamika boobo bwizu bunga sunu mpobuli pele juunza bwapya, masimpe nywebo uyoomusamika kwiindilila. Lwaceya lusyomo ndomujisi! 31Nkaako mutalibiliki kuti tukalye nzi, naa tukanywe nzi naa tukasame nzi? 32Eezi nzenzizyo abalo bakunze nzibayandaula, pele Uso uuli kujulu ulizi kuti eezi zintu mulaziyanda. 33Pele amusaangune kuyandaula bwami bwakwe mucite ziluleme, ndindilyo, Leza nayoomupa zintu eezi zyoonse. 34Nkaambo kaako mutalibiliki azyajuunza nkaambo bwajuunza mbwajuunza. Buzuba buli boonse bulijisi mapenzi aabo.

Currently Selected:

Mateyo 6: Tonga96

Highlight

Copy