Mateyo 7

Kubeteka bamwi

(Luka 6.37-38, 41-42)

1“Mutabeteki kuti anywebo mutabetekwi. 2Nkaambo oobo mbomubeteka bamwi awalo Leza mbwayoomubeteka, milawo njomubelesya kuli bamwi njayoobelesya akulindinywe. 3Ino mbuti mbobona kakwa kali muliso lyamunyoko, waleka tanda lili muliso lyako? 4Naa ino ulakonzya buti kwaambila munyoko kuti, ‘Atubone nkufule kakwa kali muliso lyako!’ Kakuli muli tanda muliso lyako omwini? 5Yebo osikuupaupa ameso saanguna kugwisya tanda lili muliso lyako, ndendilyo notibonesye kuti ufule kakwa kali muliso lyamunyoko.

6“Mutapi babwa zintu zisalala inga bapilukila akumuluma. Angale zyanu mutazifusi kungulube, nkaambo zilazilyatauka amaulu.

Makani aazyakukumbila

(Luka 11.9-13)

7“Amukumbile, mulapegwa, amuyandaule mulajana, amukonkomone mulajulilwa. 8Nkaambo kufumbwa ooyo uukumbila ulatambula, awalo uuyandaula ulajana, ayooyo uukonkomona ulajulilwa. 9Ani nguni uunga ulapa mwanaakwe bbwe akumbila cakulya? 10Na uunga akumbila nswi ulamupa nzoka? 11Kuti naa nywebo, nobasizibi kamuzi kupa zintu zibotu kubana banu, ino walo Uso uuli kujulu inga wakacilwa buti kupa zintu kuli baabo bamukumbila?

12“Lino zintu zyoonse zili buti nzimuyanda kuti bantu bamucitile amubacitile mbubonya anywebo. Nkaambo oobu mbwaiisya Mozesi mumulawo alimwi abalo basinsimi mbobaiisya.

Mulyango uusyanikide

(Luka 13.24)

13“Amunjile mumulyango uusyanikide nkaambo mulyango uukwazeme anzila mpati njiitola kukunyonyooka, nkaambo kaako aabo banjila mulinguwo mbanji. 14Pele nzila iizwa kumulyango uusyanikide, iitola kubuumi butamani ninjumu. Nkaambo kaako biitobela mbace.

Makani aamusamu amicelo yawo

(Luka 6.43-44)

15“Amucenjele abasinsimi babeji. Aabo baboola kulindinywe kababombede mbuli mbelele anukuti mukati mbaaumpe babutambo. 16Muyoobaziba mumicelo yamilimo yabo. Sena nsaansa zilacelwa kuzwa kumuunga naa nkuyu kuzwa kumutubetube? 17Musamu mubotu tuukonzyi kuzyala micelo mibi, awalo musamu mubi uzyala micelo mibi. 18Musamu mubotu tuukonzyi kuzyala micelo mibi, awalo musamu mubi tuukonzyi kuzyala micelo mibotu. 19Musamu uuli woonse uutabi aamicelo mibotu ulatemwa akuwaalwa mumulilo. 20Nkaako muyoobaziba muli nzyobacita.

Zyabuzuba bwalubeta

(Luka 13.25-27)

21“Takuli kuti boonse bandiita kuti ‘Mwami, Mwami’ bayoonjila mubwami bwakujulu pe, ccita buyo ooyo uucita nzyayanda Taata uuli kujulu. 22Mubuzuba oobo banji-banji bayoondaambila kuti ‘O Mwami, Mami wangu, sena tiitwaakakambauka muzina lyako, kugwisya myuuya mibi, akucita milimo yanguzu minji?’ 23Lino ndiyoobaambila kuti, ‘Nsimwizi pe! Amuzwe nywebo nobasizibi.’

Zyamaanda obilo

(Luka 6.47-49)

24“Nkaambo kaako kufumbwa muntu uuswiilila majwi aangu aaya akwaatobela uli mbuli muntu uucenjede wakayaka ŋanda yakwe atala aamwaala. 25Mpawo mvula yakawa, milonga yakazula akupaya amuwo wakabbubbula kwiinda kuŋanda eeyo, pele taakwe niyakawa pe, nkaambo yakayakidwe atala aamwaala.

26“Pele kufumbwa uumvwa majwi aangu aaya akutaatobela, uli mbuli muntu mufuba-fuba wakayaka ŋanda yakwe amusenga. 27Lino mvula yakawa, milonga yakazula akupaya, amuwo wakabbubbula kwiinda kuŋanda eeyo, eelyo yakooleka.”

Kwiisya kwa Jesu kwanguzu

28Lino Jesu naakamana kwaamba majwi aaya, bantu boonse bakagambwa akwiisya kwakwe. 29Nkaambo majwi aakwe akali kuyasa kutali mbuli bwakali aabamayi ba Mulawo.

Currently Selected:

Mateyo 7: Tonga96

Highlight

Copy