Mateyo 25

Cikozyano cabasimbi basongo abafuba-fuba

1Mwanaa Muntu aakuboola mubwami bwakwe ciyooba mbuli cakacitika kubasimbi aaba: “Kwakali basimbi bali kkumi bakabweza malambe aabo, akuunka kuyoocinga sibwiinga. 2Muli baaba bosanwe bakali bafuba-fuba, pele bamwi bosanwe bakalicenjede. 3Ciindi bafuba-fuba nibakabweza malambe aabo, taakwe nibakabwezelezya mafuta aakkwana. 4Pele basongo bakabwezelezya nsazi zyamafuta aamalambi aabo. 5Nkaambo kakuti sibwiinga wakamuka kuboola, boonse bakafukula boona. 6Lino aakati kamasiku kwakamvwigwa kuyobeka kwakuti, ‘Amuswiilile sibwiinga waboola! Amuzwe mukamucinge!’ 7Aboobo basimbi aabo boonse bakabuka, bayasya malambi aabo. 8Nkabela basimbi bafuba-fuba bakati kubasongo, ‘Amutwaabile aswebo kaka mungwimba aanu nkaambo malambi eesu azima!’ 9Pele basimbi basongo bakaingula kuti, ‘Ambweni kuti twamwaabila tatutizulile. Nkaako kamuya kubasambazi mukalyuulile.’ 10Nkabela kabacuula, sibwiinga wakasika. Mpawo aabo bakalibambilide bakanjila anguwe mupobwe lyabwiinga, eelyo mulyango wakajalwa. 11Lino musule aabo basimbi bakasika abalo, bamwaambila sibwiinga bati, ‘Mwami, Mwami tujulile.’ 12Walo wakabaingula kuti, ‘Ncobeni, nsimwizi pe.’” 13Jesu wakati, “Mulindilile nkaambo tamuzi ciindi Mwanaa Muntu nayooboola.”

Cikozyanyo cababelesi botatwe

(Luka 19.11-27)

14“Ziyoocitika ciindi eeco zili mbuli muntu umwi wakabweza lweendo lwakuya kucisi cimwi. Katana talika wakaita babelesi bakwe akubaabila lubono lwakwe. 15Umwi wakamupa zyuulu zyosanwe zyamali, wabili wakamupa zyuulu zyobilo, watatu cuulu comwe. Boonse wakabaabanya ncobakonzya. Amane wakainka. 16Ooyo wakatambula zyuulu zyosanwe wakainka waakwaabelesya akujana mpindu, eelyo wakajana azimwi zyuulu zyosanwe. 17Mbubonya awalo wabili wakajana mpindu yazyuulu zyobilo. 18Pele watatu, wakaya waakusya muvu akusisa mali aasimalelaakwe.

19“Lino nikwakainda ciindi cilamfu simalelo wababelesi aabo wakaboola wabaita kuti bamupandulwide mbubakabelesya mali aayo. 20Ooyo wakatambula zyuulu zyosanwe wakaza waleta mpindu yazyuulu zyosanwe wakati, ‘O Mwami, wakandipa zyuulu zyosanwe zyamali. Bona ndijisi mpindu njindakajana yazyuulu zyosanwe.’ 21Simalelaakwe wakati kulinguwe, ‘Wacita kabotu omubelesi mubotu, uusyomeka, wasyomeka kuzice, lino ndakubikka kuti ulange zinji. Njila usekelele amwami wako.’ 22Ooyo wakatambula zyuulu zyobilo wakaza wati, ‘O Mwami, wakandipa zyuulu zyobilo. Bona ndijisi ampindu njindakajana yazyuulu zyobilo.’ 23Simalelaakwe wakati kulinguwe, ‘Wacita kabotu omubelesi mubotu uusyomeka, wasyomeka kuzice, lino ndakubikka kuti ulange zinji. Njila usekelele amwami wako.’

24“Lino ayooyo wakatambula cuulu comwe wakaza wati, ‘O Mwami ndakalizi kuti yebo uli muntu muyumu moyo. Ulatebula mpootakasyanga akubungika mpootakaminza. 25Aboobo ndakayoowa, ndakainka akuyoosisa mali aako. Nkooko ngaaya!’ 26Pele simalelaakwe wakamwiingula kuti, ‘Yebo omubelesi mubi mutolo! Tee kayi wakaziba kuti ndatebula aawo mpindatakasyanga akubungika aawo mpindatakaminza? 27Nkaambo kaako wakeelede kubikka mali aangu mumaanza aabasimpindu kutegwa ndaboola nzootambule mpindu yangawo. 28Nkaako mumunyange cuulu camali ncaakapegwa mucipe kuli yooyo uujisi zyuulu zili kkumi. 29Nkaambo ooyo uujisi uyooyungizizilwa, nkabela ziyooba zinji pele ooyo uujisi kuce uyoonyangilwa limwi. 30Amumusowe mubelesi uutakwe mulimo ooyu mumudima waanze, nkabela ooko bantu bayoolila akuluma ntwino mukuusa.’

Lubeta lupati

31“Lino Mwanaa Muntu nayooboola mubulemu bwakwe, abangelo bakwe boonse bakujulu, uyookkala acuuno cakwe cabwami. 32Nkabela misyobo yoonse iyoobunganyizigwa kulinguwe, uyoobaandaanya bantu, mbubonya mbuli mweembezi mbwazandula mbelele kuzwa kumpongo. 33Uyoobikka mbelele kululyo lwakwe, pele mpongo uyoozibikka kulumwensi. 34Mpoonya Mwami uyooambila baabo bali kululyo lwakwe kuti, ‘Amuboole nywebo nomulelekedwe a Taata, amunjile mubwami mbumwakabambilwa kuzwa kumalengelo aanyika. 35Nkaambo nindakafwa nzala mwakandipa cakulya, nindakafwa nyota mwakandinywisya, nindakali mweenzu mwakanditambula, 36nindakali aacintanda mwakandisamika, nindakali mulwazi mwakandiswaya, nindakali muntolongo mwakandibona.’ 37Nkabela baluleme bayooingula kuti, ‘O Mwami, ndilili nitwakakubona kofwide nzala twakusanina, naa nookafwide nyota twakupa cakunywa? 38Ndilili nitwakakubona koli mweenzu twakutambula kabotu, naa koli aacintanda twakupa cakusama? 39Naa ndilili nitwakakubona koli mulwazi naa muntolongo twazookubona?’ 40Nkabela Mwami uyoobaingula kuti, ‘Ncobeni mbubonya mbuli mbumwakacitila umwi wabakwesu aaba batayeeyelwi kuti mbaani, mwakacitila ndime.’

41“Lino uyooambila baabo bali kulumwensi lwakwe kuti, ‘Amuzwe kulindime nywebo nomusinganyizidwe, kamuya mumulilo uutazimi ngwabambilidwe Saatani abangelo bakwe. 42Nkaambo nindakafwa nzala taakwe nimwakandipa cakulya, nindakafwa nyota taakwe nimwakandipa cakunywa, 43nindakali mweenzu taakwe nimwakanditambula, nindakali cintanda taakwe nimwakandipa cakusama, nindakali mulwazi anindakali muntolongo taakwe nimwakandibona.’ 44Mpawo abalo bayooingula kuti ‘O Mwami, ndilili nitwakakubona kofwide nzala naa nyota naa koli mweenzu naa koli aacintanda naa koli mulwazi naa muntolongo pele taakwe nitwakakugwasya?’ 45Mpawo uyoobaingula kuti, ‘Ncobeni mbubonya mbuli mbumwatakacitila umwi wabaaba batayeeyelwi kuti mbaani, taakwe nimwakacitila ndime pe.’ 46Nkabela bayooinka mumapenzi aatamani, pele baluleme bayoonjila mubuumi butamani.”

Currently Selected:

Mateyo 25: Tonga96

Highlight

Copy