Mateyo 24

Mapenzi aakumamanino

(Maako 13.1-2; Luka 21.5-6)

1Lino Jesu naakazwa muŋanda ya Leza kaya bweenda, basikwiiya bakwe bakamutondezya buyake bwaŋanda eeyo. 2Walo wakabaingula kuti, “Tee mwazibona eezi zyoonse? Ncobeni ndamwaambila kuti takukooyoosyaala aawa bbwe atala aalyeenzinyina. Oonse ayookolomonwa.”

Makatazyo amapenzi

(Maako 13.3-13; Luka 21.7-19)

3Lino Jesu naakakkala aacilundu camisamu ya Oliva basikwiiya bakasika kulinguwe cakusisikizya bati, “Twaambile, ino zintu eezi ziyoocitika lili? Alimwi ncinzi ciyooba citondezyo ca kuboola kwako amamanino aaciindi?” 4Jesu wakabaingula kuti, “Amucenjele kuti muntu atamweeni. 5Nkaambo banji bayooboola muzina lyangu kabati, ‘Ndime Munanike ooyo,’ aboobo bayoolubizya banji. 6Muyoomvwa nkondo ampuwo zyankondo, zili kulaale pele nywebo mutakayoowi. Nkaambo eezi zileelede kusaanguna kucitika pele mamanino tanoosikide pe, 7cisi ciyoolwana acisinyina, abwalo bwami abwaminyina. Kuyooba nzala akuzungaana kwanyika mumasena aandeene. 8Eezi zyoonse ngamatalikilo buyo aamapenzi aali mbuli aamukaintu wamyongwa.

9“Eelyo nywebo bayoomunjizya mumapenzi akuyoomujaya. Muyoosulaikwa abantu bamisyobo yoonse akaambo kangu. 10Muciindi eeco banji bayoosiya lusyomo lwabo. Umwi uyooaba umwi akusulana. 11Kuyoosika basinsimi banji babeji, bayoosowa bantu banji. 12Lino akaambo kakuvula kwabubi, luyando lwabantu banji luyoomana. 13Pele ooyo uukakatila mane kumamanino uyoofutulwa. 14Makani Mabotu aabwami bwa Leza ayookambaukwa munyika yoonse, kuti bukabe bumboni kumisyobo yoonse. Ndendilyo mamanino aaciindi nayoosika.

Cisesemyo cipati ciyoosya

(Maako 13.14-23; Luka 21.20-24)

15“Muyoobona cisesemyo cibisya eeco cakaambwa amusinsimi Daniyele kuti, ‘Ciliimvwi mubusena busalala’ (ooyo uubala amvwisisye). 16Aabo bali mu Judiya batijile muzilundu. 17Ooyo uuli aciluli ataseluki kuti akagwisye eezyo zili muŋanda yakwe. 18Awalo uuyoojanwa kumuunda atakasowi ciindi cakupilukila kuŋanda kuyoobweza cibaki cakwe. 19Pele maawe kubakaintu baminsi abaabo aabo bali kuyoonyonsya kumazuba aayo! 20Amukombe kuti kutija kwanu kutakabi ciindi camupeyo nikuba Buzuba bwa Kulyookezya butegwa Sabata. 21Nkaambo kuciindi eeco kuyooba mapenzi mapati, aatanabwenwe kuzwa kumalengelo aanyika kusikila sunu, alimwi takukabi aambi aali boobo pe. 22Lino kuti naa aayo mazuba naatakafwiinsigwa, taakwe muntu naba omwe wali kunoyoofutuka, pele Leza uyooafwiinsya mazuba aaya akaambo kabantu mbaakasala. 23Ciindi eeco, kuti naa umwi akati, ‘Bona ngooyu Kilisito!’ naa ‘Nguulya!’ mutakamuzuminini. 24Nkaambo kuyooba balyaamba kuti, ‘Ndime Kilisito,’ alimwi kuyooba bamusinsimi babeji! Bayoocita zitondezyo azintu zigambya, kuti naa kakukonzeka bakacenge aabo Leza mbaakasala. 25Amuswiilile, ndamwaambilila limwi zintu eezi kazitana citika. 26Nkabela kuti naa bantu bakamwaambile kuti, ‘Amuswiilile, Kilisito uli munkanda,’ mutakainki. Kuti naa bakati, ‘Amuswiilile, Kilisito uli muŋanda mwini,’ mutakazumini. 27Nkaambo Mwanaa Muntu uyooboola mbubonya mbuli lulabo mbolulaba kuzwa kujwe akumweka kuyoosikila kumbo. 28Ooko kuli mutunta nkokubungene basikube.

Zyakuboola kwa Mwanaa Muntu

(Maako 13.24-27; Luka 21.25-28)

29“Mpoonya-mpoonya aakumana mapenzi aamazuba aayo zuba liyoobola, awalo mweezi mbubonya, nyenyezi ziyooloka kuzwa kujulu, azyalo nguzu zyakujulu ziyoozungaana. 30Eelyo kuyoolibonya citondezyo ca Mwanaa Muntu mujulu, nkabela misyobo yoonse yaansi iyoolila, nkaambo bayoobona Mwanaa Muntu kaboola atala aamakumbi anguzu abulemu bupati. Kuyoomvwigwa mweembo mupati kujulu. 31Nkabela walo nayootuma bangelo bakwe kuti bazoobunganye bantu mbaakalisalila kuzwa kumabazu oonse aanyika mboizulwa.

Ciiyo camukuyu

(Maako 13.28-31; Luka 21.29-33)

32“Amwiiye ciiyo kuzwa kumukuyu. Ciindi mwabona kuti wasyuuka, mulaziba kuti mainza ali aafwiifwi. 33Mbubonya oobo anywebo, ciindi nimuyoobona zintu eezi zyoonse, mukazibe kuti Mwanaa Muntu uli aafwiifwi uli kumulyango. 34Ncobeni ndamwaambila kuti, bantu basunu tabakooyoomaninina kufwa mane zintu eezi zyoonse zikacitike. 35Julu anyika ziyoomana, pele majwi aangu taakooyoomana pe.

Buzuba bwamamanino taakwe uubuzi

(Maako 13.32-37; Luka 17.26-30, 34-36)

36“Pele taakwe naba omwe uubuzi buzuba niciba ciindi. Bangelo abalo tabazi, naba Mwanaa Muntu, pele Taata alikke nguuzi. 37Mbubonya mbuli mbukwakabede mumazuba aa Nowa, akuboola kwa Mwanaa Muntu mbokuyooba. 38Nkaambo mumazuba aa Nowa maanzi naatakana paya, bakali kulya akunywa akukwata akukwatisyigwa, mane do buzuba oobo Nowa naakanjila mubwato. 39Taakwe ncibakazi kusikila maanzi naakabalobya boonse. Mbubonya oobo mbokuyooba kukuboola kwa Mwanaa Muntu. 40Kuti kwaakujanika baalumi bobilo mumuunda, umwi uyootolwa umwi wasyaala. 41Kuti kwaakujanika bakaintu bobilo baziya aziyo umwi uyootolwa umwi wasyaala. 42Aboobo amucenjele, nkaambo tamuzi buzuba Mwami wanu naboola. 43Pele amuzibe eeci, nikwakali kuti mwiniŋanda kazi ciindi mubbi naza naakalindila, naatakalekelela ŋanda yakwe kuti idonkolwe. 44Nkaako anywebo muleelede kulibambila, nkaambo muciindi nciconya ncomutayeeyi nazoosika Mwanaa Muntu.

Mubelesi uusyomeka autasyomeki

(Luka 12.41-48)

45“Ino nguuli mubelesi musongo uusyomeka? Nguyooyo wakabikkwa asimalelo wakwe kuti alange babelesinyina, kuti kabapa zyakulya muciindi ceelede. 46Ulilelekedwe ooyo mubelesi ngwanga simalelo wakwe aboola wajana ucicita oobo. 47Ncobeni ndamwaambila kuti, simalelo wakwe uyoomukkazika kuti abe mulangi walubono lwakwe loonse. 48Pele kuti mubelesi mubi wati, ‘Simalelo wangu wamuka,’ 49kwamana watalika kuuma babalesinyina, kutalika kulya, kunywa abakolwi, 50simalelo wamubelesi ooyo uyooboola mubuzuba mbwatamulangili aciindi ncatazi. 51Uyoomusubula, akumusowela ooko kujanwa basikuupaupa aameso. Ooko bantu bayoolila akuluma ntwino mukuusa.”

Currently Selected:

Mateyo 24: Tonga96

Highlight

Copy