Mateyo 15

Mbokweelede kwiisya milawo

(Maako 7.1-25)

1Mpoonya Bafalisi abamayi ba Mulawo bakasika kuli Jesu kuzwa ku Jelusalemu bakati, 2“Nkaambo nzi basikwiiya bako ncobasiya kwiisya kwabasikale? Nkaambo nzi tabasambi maanza ciindi ncobalya?” 3Wakabaingula kuti, “Ino nkaambo nzi nywebo nomusiya mulawo wa Leza akuccilila njiisyo zyanu? 4Kayi Leza wakalailila kuti, ‘Lemeka uso abanyoko, kufumbwa ooyo uusampaula wisi nibaba banyina uleelede kufwa.’ 5Pele nywebo mwaamba kuti, ‘Naa muntu waambila wisi nibaba banyina kuti, “Eezyo nzindali kuyanda kumugwasya ndazipa kuli Leza,” teelede kulemeka wisi pe.’ 6Aboobo akaambo kanjiisyo zyanu mwaubausya majwi aa Leza. 7Muli buyo basikuupaupa aameso. Mbwaakasinsima Izaya kuti,

8‘Aaba bantu balandilemeka amilomo yabo,

pele myoyo yabo ili kule andime,

9Kundikomba kwabo nkwabuyo,

nkaambo balaiisya njiisyo zyabantu mbuli kuti nzizya Leza!’”

Zintu zisofwaazya muntu

(Maako 7.14-23)

10Mpoonya Jesu wakaita bantu banji baya akuti kulimbabo, “Amuswiilile mumvwisye. 11Tacili ceeco cinjila mwida cisofwaazya muntu pe, pele nciceeco cizwa mukanwa cimusofwaazya.” 12Eelyo basikwiiya bakaza kulinguwe akuti, “Sena ulizi kuti Bafalisi babijilwa ciindi ncibamvwa nkani eeyi?” 13Walo wakaingula kuti, “Cisyango cili coonse ncaatakasyanga Taata uuli kujulu ciyoozyulwa. 14Amubaleke buyo, mboofu basololela boofunyina. Kuti naa moofu wasolweda moofunyina, boonse bobilo balawida mudindi.” 15Pita wakati kulinguwe, “Tupandulwide cikozyanyo.” 16Mpawo wakati, “Ani anywebo tamuna kumvwisya? 17Sena tamubwene kuti eeco cinjila mukanwa cilainda mwida mane caakuzwa anze? 18Pele eeco cizwa mukanwa mbocili cizwa mumoyo ncecisofwaazya muntu. 19Nkaambo mumoyo momuzwida miyeeyo mibi, bujayi, bumambe, bwaamu, bubbi, bumboni bwakubeja, akuvwiya. 20Eezi nzezisofwaazya muntu, pele kulya amaanza aatasambide tacisofwaazyi muntu pe.”

Zyalusyomo lwa mukaintu

(Maako 7.24-30)

21Lino Jesu naakazwa ooko, wakaya kuzisi zya Taya a Sidoni. 22Eelyo kwakasika mukaintu Mukenani wakali kukkala ooko. Wakoongolola wakati, “Kondifwida lubomba O Mwami Mwanaa Devedi, mwanaangu musimbi ulinjidwe myuuya mibi minji.” 23Pele Jesu taakwe naakamuvuwa noliba jwi lyomwe. Mpawo basikwiiya bakaboola kulinguwe bamukumbila bati, “Mwaambile mukaintu ooyu ainke nkaambo watusabila.” 24Jesu wakati kumukaintu ooyo, “Ndakatumwa buyo kumbelele zisweekede zyamusyobo wa Isilayeli.” 25Naakaamba boobo mukaintu wakasika akumufugamina wati, “O Mwami ndigwasye.”

26Mpawo Jesu kuti, “Tacili cibotu kunyanga bana cakulya akucifusila babwa.” 27Walo wakati, “Iiyi, O Mwami, abalo babwa balabwezelela bufwefwelenga buloka kuzwa kutebule lyasimalelo wabo.” 28Mpoonya Jesu wakaingula kuti, “Baama, lusyomo lwako ndupati! Akucitwe mbubonya mbuli mboyanda.” Eelyo mwanaakwe musimbi wakapona ciindi eeco nciconya.

Jesu mbwaakaponya bantu banji-banji

29Alimwi Jesu wakazwa ooko, wakainda kumbali aalwizi lwa Galilii. Wakatanta acilundu akukkala aawo. 30Eelyo makamu akasika kulinguwe, akaletelezya balema, bapuutide boofu, basyaataambi abamwi banji. Bakabakkazika munsi aa Jesu, nkabela wakabaponya, 31nkaako bantu boonse bakagambwa, ciindi nibakabona basyaataambi kabaamba, balema kabaponyezegwa, boofu kababona, abapuutide kabeenda. Mpawo bakalumbaizya Leza wa Isilayeli.

Jesu mbwaakasanina lwabili bantu

(Maako 8.1-10)

32Mpoonya Jesu wakaita basikwiiya bakwe akuti, “Bandeetezya bantu aaba, nkaambo bali aandime kwamazuba otatwe, alimwi taakwe ancobalya pe. Nsiyandi kuti mbaambile kuti bainke anzala nkaambo ambweni inga kabaya bunetuka munzila.” 33Basikwiiya bakwe bakati kulinguwe, “Ino tukazijane kuli zilyo zinji omuno munkanda zyakuti bantu aaba bakkute?” 34Jesu wakati kulimbabo, “Ino mujisi zinkwa zyongaye?” Bakati, “Zili buyo ciloba atuswi tuce.” 35Wakaambila makamu kuti akkale ansi.

36Wakabweza zinkwa zili ciloba atuswi, naakamana kulumba Leza wakazikomona akuzipa kuli basikwiiya kuti baabanye bantu. Aboobo bakacita mbubonya mbuli mbobakalaililwa. 37Nkabela boonse bakalya bakakkuta, basikwiiya bakabwezelela zisuwo zili ciloba zyabufwefwelenga bwakasyaala. 38Lino baalumi bakalya bakali zyuulu zyone kutabalilizya bakaintu abana. 39Jesu naakamana kulayana abantu wakanjila mubwato akuunka kucisi caku Magadala.

Currently Selected:

Mateyo 15: Tonga96

Highlight

Copy