Jemusi 4

Zyakulibombya kuli Leza

1Ino kuzwangana akupampana akati kanu kuzwa kuli? Sena tazizwi kuzisuzi zyabuntunsi zilwana mulindinywe? 2Mulayandisya zintu pele tamuzijani pe, nkaako mulajaya. Mulanyonokela, pele tamukonzyi kuzijana pe, nkaako mulalwana akupampana. Tamujani zintu, nkaambo tamukumbili kuli Leza. 3Nikuba kuti mulakumbila, tamupegwi nkaambo mulaimpya mukulomba. Nzyomukumbila muzimwaila mukucita ziyanda zisusi zyanu. 4Nywebo nobantu batasyomeki! Sena tamuzi kuti kuyanda zyabuntunsi mbusinkondonyina Leza? Nkaambo kaako ooyo uuyandisisya zyabuntunsi ngusinkondonyina a Leza. 5Ambweni muyeeya kuti Malembe aamba zyabuyo naati, “Muuya uuli mulindiswe ulatuyandisisya kapati.” 6Pele ulatubeda aaluse lunji kapati, ncenciceeco Malembe ncaati, “Leza ulabakaka basikulisumpula, pele ubabeda aaluse aabo balibombya.” 7Lino amulibombye kuli Leza. Amumukazye Saatani, ndendilyo nayoomutija. 8Amuswene kuli Leza, eelyo awalo ulaswena kulindinywe. Amuleke zibi nywebo nobasizinyonyoono. Amusalazye myoyo yanu, nywebo nobasimyoyo yobilo. 9Amoomoke, muungumane, akulila. Kuseka kwanu kube kulila, akwalo kukondwa kwanu kube kuusa. 10Amulibombye ku Mwami, ndendilyo nayoomusumpula.

Batabetekani

11Nobakwesu, mutanoovwiyani pe. Nkaambo ooyo uuvwiya naa kubeteka mweenzinyina ulabisya akubeteka Mulawo wa Leza. Pele kuti naa wabeteka Mulawo, totobeli Mulawo pe, pele uli mubetesi wawo. 12Leza alikke nguupa Mulawo alimwi nguubeteka, alimwi nguukonzya kufutula akunyonyoona. Ino nduweni yebo oobeteka mweenzinyoko?

Batalikankaizyi

13Akaka nywebo nomwaamba kuti, “Sunu naa juunza tuzooinka kumunzi uuli boobu, tukakkale ooko mwaka woonse, tukasambale, tukajane mpindu.” 14Pele tamuzi zyajuunza pe. Ino buumi bwanu ninzi? Nkaambo nywebo muli mbuli sikunku uulibonya mukaindi kaniini buyo, amana ulazimaana. 15Kapati mweelede kwaamba kuti, “Naa Mwami wayanda, twanoocipona, tuzoocita boobuya aboobuya.” 16Pele lino mulalisumpula akulisyoma. Coonse eeci ncibi. 17Lino kufumbwa ooyo uuzi nzyeelede kucita, kwamana taziciti, wabisya.

Currently Selected:

Jemusi 4: Tonga96

Highlight

Copy