Bahibulu 8

Jesu Mupaizi Mupati

1Makani meni-meni azeezyo nzyotwaamba ngakuti tulijisi Mupaizi Mupati uuli bobuya, uukkede kululyo lwacuuno ca Leza Mupati kujulu. 2Ngonguwe uubeleka mu Busena Busalalisya, nkokuti mutente lini-lini lyakayakwa a Mwami Leza lwakwe, kutali amuntu pe. 3Mupaizi Mupati oonse ulabikkwa mumulimo wakutuula zipego akupaizya banyama kuli Leza. Eelyo awalo Mupaizi Mupati wesu uleelede kuba aacintu cimwi cakutuula. 4Kuti naali munyika, naatali mupaizi akasyoonto pe, nkaambo mpobali kale bapaizi aabo batuula zipego zyaambwa aamulawo. 5Milimo njobacita bapaizi ili mbuli cimvule cikozyanya azyakujulu. Mazuba aalya Mozesi naakali kuyanda kuyaka tente, Leza wakamwaambila kuti, “Bona kuti waliyaka akucita zyoonse mbuli mbookalaililwa akutondezegwa acilundu.” 6Pele lino Jesu wakapegwa bupaizi bupati bwiinda bwakaindi buya, acalo cizuminano nceendelezya akati ka Leza ncibotu kwiinda cakaindi nkaambo zisyomezyo zyaco zilainda.

7Kuti eeco cizuminano cakusaanguna nicalilondokede, nikwatayandika cabili. 8Pele Leza wajana kuti bantu bakwe tabalondokede ncaati,

“Mazuba ayoosika,

mbwaamba Mwami Leza,

nenjoocita cizuminano cipya abantu ba Isilayeli,

abantu ba Juda.

9Tacili cizuminano cili mbuli

ncindakacita kuli basikale babo pe,

ciindi nindakabasolweda kubagwisya mucisi ca Ijipiti.

Pele mukuti balo tiibakabamba cizuminano cesu,

ambebo nsiindakababamba pe,

mbwaamba Leza.

10Lino nceeci cizuminano eeco ncentipange abantu ba Isilayeli mazuba aaza,

mbwaamba Leza.

Njoobikka mulawo wangu mumizeezo yabo,

njooulemba mumyoyo yabo.

Njooba Leza wabo,

abalo bayooba bantu bangu.

11Taakwe uuciyooiisya mweenzinyina.

Taakwe uuciyooiisya munyina kuti azibe Mwami Leza.

Boonse bayoondiziba lwabo beni,

mwana amupati.

12Njoobafwida luzyalo akulekelela zibi zyabo.

Nsikaziyeeyi limbi zinyonyoono zyabo pe.”

13Lino mukwaamba majwi aakuti, “Cizuminano cipya,” Leza watondezya kuti cakaindi tacicikwe mulimo. Alimwi kufumbwa cintu citakwe mulimo akusopoka, cili aafwiifwi kuloba.

Currently Selected:

Bahibulu 8: Tonga96

Highlight

Copy