Bahibulu 9

Zyakukomba kwaansi aano akwakujulu

1Lino cizuminano citaanzi cakalijisi milawo yaco yabukombi alimwi busena bwaco bwakukombela bwakayakwa abantu. 2Kwakayakwa tente eelyo lyakasaanguna nkabela mukati mwakali lambe, tebule acinkwa cakapedwe kuli Leza. Lyakali kutegwa busena busalala. 3Kuzwa waawo mukati mwini-mwini kunze aacisitilizyo cabili momwakali kwiitwa kuti busena busalalisya. 4Mubusena oobu mwakali cipaililo cangolida aakali kutentelwa tununkilizyo, alimwi mwakali bbokesi lya cizuminano, lyakazilulwidwe angolida mbolibede. Mukati kabbokesi mwakali kabiya kangolida kajisi mana mukati, amusako wa Aloni wakasonsede matu uulya, alimwi kwakali amabwe obilo aakapapalete aakalembedwe milawo iili kkumi. 5Nkabela atala lyabbokesi eeli kwakalibikkidwe bakelibu bobilo bakali kubonya bulemu bwa Leza. Mababa aabo akali kuvumbilila civunisyo cabbokesi aakalikulekelelelwa zinyonyoono. Pele lino tatukonzyi kumupandulwida zintu eezi zyoonse mbozibede.

6Mboobu mbucakabede mutente. Bapaizi balanjila mukati mukumana milimo yabo yabupaizi. 7Pele Mupaizi Mupati alikke nguwakali kunjila mukati mwini-mwini, lino wakali kunjila lomwe buyo amwaka. Taakali kunjila buyo katatoleleli bulowa. Bulowa oobo wakali kubutuula kuli Leza akaambo kakwe mwini alimwi akaambo kazibi nzibakacita bantu mukutaziba. 8Munzila eeyi Muuya Uusalala ulaiisya cakusalazya kuti kunyina nzila iimbi yakunjila mu Busena Busalalisya naa Busena Busalala kabuciliko. 9Aboobo eeci ncikozyanyo kubantu basunu. Nkokwaamba kuti zipego azituuzyo zyakupaizya kuli Leza tazikonzyi kulondola moyo wamuntu uukomba pe. 10Nkaambo nzyakulya, zyakunywa, azyamilawo yakulisalazya yaandeene-andeene. Aaya oonse mmalailile buyo aaamba zyamubili, zyakujatilila buyo mane kusikila ciindi Leza nayoobamba zintu zyoonse bupya.

11Pele Kilisito wakasika kale, ngo Mupaizi Mupati wazintu zibotu ziliwo lino. Tente oomo mwabelekela ndyabulemu alimwi lililondokede kwiindilila. Tiilyakabambwa amaanza aabantu, nkokwaamba kuti, tente eeli talili lyaansi aano pe. 12Ciindi naakaakunjila mutente akunjilila limwi mubusena busalalisya, taakwe naakatolelezya bulowa bwampongo naa bwaboombe kutuula zipaizyo, pele walo (Kilisito) wakatola lomwe buyo bulowa bwakwe mwini, eelyo wakatubambila lununuko lutamani. 13Lino bulowa bwampongo abwabapoho alimwi atwe lyamoombe mupwizi zisansailwa aabantu batasalali mumulawo. Eezi zilagwisya busofwaazi bwabo. 14Masimpe bulowa bwa Kilisito bulakonzya kutucitila ziinda! Mu Muuya uutamani wakalituula lwakwe mbuli cipaizyo cilondokede kuli Leza. Bulowa bwakwe busalazya myoyo yesu kuzwa kumilimo yabuyo, kutegwa tubelekele Leza Uupona.

Zyacizuminano cipya

15Nkaambo kaako Kilisito wakaba Sikuyanzanya wacizuminano cipya kutegwa aabo bakaitwa a Leza bakatambule lukono lutamani ndwaakasyomezya. Eezi zyakaba boobu nkaambo kalufu lwa Kilisito, lunununa bantu kuzwa kuzibi nzyobakacita kabacili mucizuminano cakaindi. 16Lino kumakani azintu zyakasyomezegwa kukonwa, tazikonwa kacilanga sikukonya pe. Ziyookonwa ciindi aakufwa. 17Nkaambo takukonwa muntu nacipona, kukonwa afwa. 18Nkankakaako acalo cizuminano cakaindi ncicatakacitwa kakunyina kutila bulowa. 19Cakusaanguna Mozesi wakaambila Baisilayeli Mulawo woonse wa Leza. Kuzwa waawo wakabweza bulowa bwaboombe, bwampongo amaanzi, wakasansaila aabbuku lya Mulawo aabantu. Kucita oobu wakabelesya ansinsa yaangidwe aboya bwambelele busalala pyu. 20Lino wakati, “Oobu mbobulowa businizya cizuminano eeco Leza ncaakamulailila kuti muciswiilile.” 21Munzila njiyonya Mozesi wakasansaila bulowa atente aazintu zyoonse zyakali kubelesegwa mukukomba. 22Masimpe, kweendelana a Mulawo, zintu zilasalazigwa abulowa. Aboobo zinyonyoono tazilekelelwi kakutakwe kutilwa kwabulowa.

Cipaizyo ca Kilisito ncecigwisya zinyonyoono

23Lino mbokunga zikozyanyo zyazyakujulu zyakali kusalazigwa munzila iili boobu, nkokuti zyakujulu zini ziyandika cipaizyo cimbi ciinda zeezyo. 24Kilisito taakwe naakanjila mubusena busalala bwakukombela bwakayakwa amaanza aabantu, buli ncikozyanyo buyo cabusena bwakujulu. Pele wakanjila mujulu mwini-mwini, kuti lino katwiiminina kuli Leza. 25Mupaizi Mupati wa Bajuda ulanjila mubusena busalalisya lomwe amwaka abulowa bwabanyama, butali bwakwe. Pele Kilisito taakanjila kuti kalipaizya lyoonse. 26Nkaambo nikwali kunga ulapenga ziindi zinji-zinji kuzwa kumalengelo aanyika. Pele lino wakalibonya lomwe buyo kwiiminina boonse kumamanino aamusela kuti agwisye zinyonyoono kwiindila kukulipaizya lwakwe mwini. 27Muntu omwe-omwe ulafwa lomwe buyo, kuzwa waawo ndubeta. 28Mbubonya awalo Kilisito wakalituula lomwe kuti ayumune akugwisya zinyonyoono zyabantu. Alimwi uyoolibonya ciindi cabili. Tabooleli kugwisya zinyonyoono pe, pele uyooboolela kufutula aabo bamulindilila.

Currently Selected:

Bahibulu 9: Tonga96

Highlight

Copy