Bahibulu 10
10
1Lino Mulawo ncimvule buyo cazileleko ziciboola, kutali zileleko zini-zini lwazyo. Zipaizyo zilapegwa munzila yomwe buyo mwaka amwaka. Pele Mulawo tiiwakakonzya kubasalazya baza kuli Leza muzipaizyo eezyo. 2Nikwakali kuti bantu bakomba Leza kabasalazigilwa limwi, nibatali kulimvwa kuti mbaasizibi, alimwi nibatacili kupa zipaizyo. 3Pele mbuli mbokubede, zipaizyo ziyeezya bantu zibi zyabo mwaka amwaka. 4Nkaambo bulowa bwabapoho abwampongo tabukonzyi kugwisya zinyonyoono.
5Nkaambo kaako Kilisito naakasika ansi aano, wakaamba kuti,
“Toyandi zipaizyo azituuzyo,
pele wandibambila mubili.
6Tookabotelwa muzipaizyo zyakutenta azipaizyo
zipaizigwa zyakugwisya zinyonyoono.
7Mpoonya mebo ndakati, ‘Ndime uno, ndaza
kuzoocita nzyoyanda, O Leza, mbubonya
mbuli mbokulembedwe zyandime mubbuku lya Mulawo.’”
8Kusaanguna Kilisito wakaamba kuti, “Yebo Leza, toyandi zipaizyo, niziba zituuzyo niziba zipaizyo zyakutenta, niziba zipaizyo zyakugwisya zinyonyoono.” Wakaamba boobo nikuba kuti Mulawo nguuamba kuti zipegwe. 9Pele musule wakati, “Ndime uno, ndaza kuzoocita nzyoyanda.” Aboobo Kilisito wakagwisya zipaizyo zyakaindi kuti mubusena bwazyo abikke cipaizyo cipya. 10Nkaambo kakuti Jesu Kilisito wakacita eezyo Leza nzyaakayanda kuti acite, twasalazigwa acipaizyo camubili wakwe, ncaakapa lomwe buyo.
11Mupaizi wa Bajuda wakali kwiima akucita milimo yakwe yabupaizi mazuba oonse, alimwi wakali kutuula cipaizyo camusyobo omwe ziindi zinji-zinji. Pele zipaizyo eezi taakwe nizyakali kukonzya kugwisya zinyonyoono pe. 12Nkaako Kilisito wakapa lomwe buyo cipaizyo cakugwisya zinyonyoono. Cipaizyo eeco ncalili alili. Amane wakaakukkala kubbazu lyalulyo lwa Leza. 13Lino ooko ulalindila mane kusikila Leza akabikke basinkondonyina kuti babe cilyatilo camaulu aakwe. 14Acipaizyo comwe buyo wabacita kuti babe balondokede akutamani aabo mbaasalazya. 15Muuya Uusalala awalo ulatupa bumboni oobu. Kusaanguna ulati,
16“Eeci ncecizuminano ncetikapangane ambabo caakumana ciindi eeco,
mbwaamba Mwami Leza.
Njoobikka mulawo wangu mumyoyo yabo,
nkabela njooulemba amizeeezo yabo.”
17Eelyo wakati,
“Nsikaziyeeyi limbi zinyonyoono zyabo amilimo mibi njobacita.”
18Nkaambo Leza walekelela zyoonse eezi, takuciyandiki cipaizyo cakugwisya zinyonyoono pe.
Atuswene aafwiifwi a Leza
19Nkaambo kaako, bakwesu, tulakonzya kunjila mubusena busalalisya nkaambo kabulowa bwa Jesu. 20Wakatujalwida nzila mpya yabuumi kwiinda mucisitilizyo cili mubili wakwe. 21Mukuti tulijisi Mupaizi Mupati uulela ŋanda ya Leza, 22atuswene aafwiifwi kuli Leza amyoyo iilondokede alusyomo lwini-lwini. Myoyo yesu isalazigwe kiitakwe butongo, ayalo mibili yesu kiisambide amaanzi aasalala. 23Atujatisye luzumino lwakulangila nkotujisi, tutabi notuzungaana pe, nkaambo ooyo walo wakasyomezya ulasyomeka. 24Aboobo katunga katuyeeyana, katugwasyanya, katutondezya kuyandana alimwi akucita milimo mibotu. 25Tutaleki cilengwa cakuswaangana antoomwe, mbuli bamwi bali aaciyanza cakulengaana. Pele katuyumizyanya, katucita oobo nkaambo tulibwene kuti buzuba bwa Kilisito buli aafwiifwi.
26Lino kuti naa katubisya caali katuli tulizizi zyakasimpe, kucinyina cipaizyo cimbi cinga capegwa nkaambo kazinyonyoono. 27Aawo casyaala kunyina cimbi pe, pele nkulindila cakuyoowa lubeta amulilo uuyoosya uuzikunyonyoona basinkondonyina Leza. 28Kufumbwa muntu uutatobeli Mulawo, ulajaigwa kakunyina lweengelelo, kuti wajanwa mulandu kukusinizya kwabakamboni bobilo naa botatwe. 29Ino ciyooba buti kumuntu uusampaula Mwanaa Leza, uunyansya bulowa bwacizuminano ca Leza cimusalazya kuzwa kuzinyonyoono zyakwe, uutukana Muuya Uusalala waluse? Cisubulo camuntu ooyo ciyooindilila kapati. 30Nkaambo tulimuzi wakaamba kuti, “Amundilekele, njoolibweedezezya ndemwini.” Alimwi wakaamba kuti, “Leza uyoobeteka bantu bakwe.” 31Ncintu ciyoosya kuwida mumaanza aa Leza Muumi!
32Amuyeeye mazuba aakamana. Mumazuba aayo, nimwakamunikilwa a Leza, mwakapenzegwa azintu zinji-zinji. Nikuba boobo mwakakonzya kwiima. 33Cimwi ciindi mwakali kusampaulwa akupenzegwa caantangalala. Cimwi ciindi mwakali kupenga abaabo bakali kupenzegwa mbubonya. 34Mwakabafwida luzyalo aabo bakali baange muntolongo, alimwi mwakali kubalekela cakubotelwa aabo bakali kumunyanga lubono, nkaambo mwakalizi kuti nywebo mulijisi lubono lubotu kapati oolo luya kuba akutamani. 35Aboobo mutasowi busicamba bwanu, nkaambo ciyoomuletela bulumbu bupati. 36Muleelede kukakatila kuti mucite ziyanda Leza kutegwa mukatambule nzyaakasyomezya. 37Mbuli bwaamba Malembe kuti,
“Kwasyaala kaindi kaniini buyo,
eelyo ooyo sikuboola ulaboola, takoomuka pe.
38Muntu ngwindaamba kuti mululami uyoopona alusyomo.
Pele naa akapilukile musule,
mebo nsikamukkomanini pe.”
39Swebo tatuli baabo bapilukila musule akunyonyoonwa, pele tuli baabo basyoma alimwi bayoofutulwa.
Currently Selected:
Bahibulu 10: Tonga96
Highlight
Share
Copy
Want to have your highlights saved across all your devices? Sign up or sign in
Tonga Bible © United Bible Societies, 1994.
