Bahibulu 5

1Lino mupaizi mupati uuli woonse ulasalwa kuzwa kubantu, eelyo ulacitwa kuti kababelekela mulimo akubaiminina kuli Leza. Mulimo wakwe ngwakupa zipego azipaizyo zyazinyonyoono zyabo. 2Nkaambo kakuti awalo lwakwe mwini ulijisi buteteete, ulakonzya kubabeda aalubomba aabo banyina ncobazi basweekede. 3Mukuti awalo ulijisi buteteete, nkaambo kaako uleelede kupa cipaizyo cazinyonyoono zyakwe mwini, kutali buyo zyabantu pe. 4Taakwe muntu uulisala lwakwe mwini kuba mupaizi mupati pe. Pele ulaitwa a Leza mbuli bwakaitwa Aloni.

5Mbubonya oobo alakwe Kilisito taakwe naakalipa mwini bulemu bwakuba Mupaizi Mupati pe. Pele Leza nguwakamwaamba kuti,

“Nduwe mwanaangu, sunu ndakuzyala.”

6Mbubonya mbwaamba alimwi kuti,

“Unooli Mupaizi akutamani.

Bupaizi bwako mbwamusyobo wa Melikezedeki.”

7Jesu naakali muntu ansi aano wakali kupa zilombyo akukumbila cakoongolola amisozi kuli Leza. Leza wakalijisi nguzu zyakumufutula kuzwa kulufu, eelyo nkaambo kakuti Jesu wakalitesya akulipa, Leza wakamuswiilila. 8Pele nikuba kuti wakali Mwanaa Leza, wakatondezya kuswiilila kwiindila mukupenga kwakwe. 9Naakamanizizya limwi milimo yakwe, wakaba Silufutuko lutamani kuli baabo boonse bamuswiilila. 10Nkabela Leza wakamubikka kuti abe Mupaizi Mupati, mbubonya mbuuli bwamusyobo wa Melikezedeki.

Wabacenjezya kuti batasiyi lusyomo lwabo

11Lino mpaali makani manji-manji ngotukonzya kwaamba ali zeezi, pele nciyumu kwaapandulula kulindinywe, nkaambo muli basicinguni. 12Nikuba kuti ciindi cakkwana cakuti nimwali kukonzya kwiisya bamwi, pele muciyandika kuti umwi amwiisye ziiyo zitaanzi zya Majwi aa Leza. Mweelede kupegwa mukupa mubusena bwazilyo ziyumu-yumu. 13Lino muntu uuli woonse uunywa buyo mukupa uli mbuli mwana muvwanda, nkokuti tanaziba njiisyo zyaamba zyabululami. 14Pele zilyo ziyumu-yumu nzyabantu basimide. Mukubelesya maanu aabo bakalizibizya kwaandaanya zibotu azibi.

Currently Selected:

Bahibulu 5: Tonga96

Highlight

Copy