Bahibulu 4

1Cisyomezyo ca Leza cakuti tunjile mukulyookezya nkwaakatubambila nkocicili. Aboobo amucenjele kuti kutabi umwi wanu uutikakacilwe kunjila. 2Kayi aswebo twakamvwa Makani Mobotu mbubonya mbuli mbabo. Pele balo tiibakajana mpindu mubukambausi oobo, nkaambo bakamvwa buyo, tiibakasyoma pe. 3Swebo notusyoma lino twanjila mukulyookezya ooko mbubwaamba Leza kuti,

“Ndakakalala akukonka cabukali kuti,

‘Tabakooyoonjila mukulyookezya kwangu.’”

Wakaamba oobo nikuba kuti wakalimanizizye kale milimo yakwe yoonse naakalenga nyika. 4Tee amwi kulaambwa mu Malembe zyabuzuba bwaciloba kuti, “Leza wakalyookezya mubuzuba bwaciloba kuzwa kumilimo yakwe yoonse.” 5Tee kujatikizya makani aaya wati, “Tabakooyoonjila mukulyookezya kwangu.” 6Leza wakabamba kuti bamwi banjile mukulyookezya ooko. Pele aabo bakamvwa Makani Mabotu tiibakanjila nkaambo tiibakaswiilila. 7Ncenciceeco Leza ncaakabikka bumwi buzuba, oobo mbwati, “Sunu buno buzuba.” Leza wakali kwaamba zyabuzuba oobu ciindi muli Devedi, nikwakainda myaka minji, naakaamba majwi aalya ngutwaamba kale kuti,

“Nomumvwa majwi aa Leza sunu buno buzuba,

mutabi basicinguni.”

8Kuti naa Josyuwa naakasolweda bantu mukulyookezya ooko, Leza musule lyakooko naatakaamba zyabuzuba bumbi pe. 9Mbombubo kuli kulyookezya kubantu ba Leza mbubuli mbwaakalyookezya Leza buzuba bwaciloba. 10Nkaambo kufumbwa ooyo uunjila mukulyookezya kwa Leza walyookezya kuzwa kumilimo yakwe, mbuli Leza mbwaakalyookezya kuzwa kumilimo yakwe. 11Aboobo aswebo atusoleke kunjila mukulyookezya ooko, kuti ambweni inga umwi ulakacilwa kunjila akaambo kakutaswiilila.

12Nkaambo Majwi aa Leza ngabuumi alimwi nganguzu. Alabosya kwiinda panga likwengedwe koonse-koonse. Alayasa mane kwaandaanya buumi amuuya alimwi kwaandaanya zifuwa amooma. Alimwi alabeteka mizeezo aziyanda moyo. 13Taakwe niciba comwe cisisidwe kuli Leza, pele zyoonse zili antangalala akuvumbulwa kulinguwe, ngotweelede kupandulwida zyoonse nzitwakacita.

Jesu Mupaizi Mupati kwiindilila

14Lino atujatisye lusyomo ndotuzumina. Nkaambo tulijisi Mupaizi Mupati kwiindilila, walo wakainka akuyoosika kujulu kwini-kwini kwa Leza. Ooyo ngu Jesu, Mwanaa Leza. 15Tatujisi Mupaizi Mupati uutakonzyi kutufwida lubomba mubuteteete bwesu. Mupaizi wesu wakasunkwa munzila zyoonse, mbubuli mbotusunkwa swebo. Pele taakwe naakabisya pe. 16Lino atube aacamba swebo, tuswene kucuuno cabwami ca Leza waluse. Ooko tuyootambula lweengelelo akujana luse lwakutugwasya ciindi notubula.

Currently Selected:

Bahibulu 4: Tonga96

Highlight

Copy