Bahibulu 3

Jesu Mupati kwiinda Mozesi

1Nobakwesu, muli bakwe Leza, nywebo nomwakaitwa kuti mube aabuumi bwakujulu. Amuyeeye zya Jesu, ooyo Leza ngwaakatuma kuba Mutumwa a Mupaizi Mupati walusyomo ndotuzumina. 2Wakali kusyomeka kuli Leza, ooyo wakamusala kucita mulimo ooyu, mbubonya mbuli Mozesi mbwaakali kusyomeka mumulimo wakwe muŋanda ya Leza mboibede. 3Muntu wayaka ŋanda ulalemekwa kwiinda ŋanda. Mbubonya oobo Jesu ulalemekwa kwiinda Mozesi. 4Masimpe ŋanda iili yoonse ilayakwa amuntu umwi. Pele Leza ngomuyaki wa zyoonse. 5Mozesi wakali kusyomeka kuli baŋanda ya Leza mbuli mubelesi, kuti ape bumboni bwazeezyo Leza nzyazooamba kumbele. 6Pele Kilisito uuli Mwanaa Leza ulasyomeka mukweendelezya baŋanda ya Leza boonse. Lino swebo tuli baŋanda yakwe, kuti katutaleki kuba basicamba balisumpwida eezyo nzyotulangila.

Kulyookezya kwabantu ba Leza

7Aboobo, mbuli Muuya Uusalala mbuuti,

“Nomumvwa majwi aa Leza sunu buno buzuba,

8mutabi basicinguni mbuli basikale banu mbubakazangilide Leza ciindi nibakamusunka munkanda.

9Oomo basikale banu bakandisunka

nikuba kuti bakabona nzindakacita mumyaka iili makumi one.

10Nkaambo kabantu aaba ndakanyema ndakati,

‘Lyoonse mbantu basweekede mumyoyo,

alimwi tabatobeli nzila zyangu.’

11Ndakanyema akukonka cabukali kuti,

‘Tabakooyoonjila mukulyookezya kwangu.’”

12Nobakwesu, amulangisisye kuti kutabi uujisi moyo mubi uutasyomi kuti amuzandule kuzwa kuli Leza muumi. 13Kwaambisya, kutegwa umwi wanu atacengwi a cinyonyoono akuba sicinguni, kamugwasyanya buzuba a buzuba, mucite oobo Malembe naaciti kuli ndiswe “Sunu buno buzuba.” 14Nkaambo toonse tulijisi caabilo muli Kilisito kuti twakakatila mulusyomo mane kumamanino ndutwakajisi kumatalikilo.

15Mboobu mbwaaamba Malembe alati,

“Nomumvwa majwi aa Leza sunu buno buzuba,

mutabi basicinguni mbuli basikale mbubakazangilide Leza.”

16Mbaani aabo bakamvwa majwi aa Leza akumuzangila? Tee mbabaabo boonse bakasolwedwa a Mozesi kuzwa mu Ijipiti? 17Alimwi mbaani aabo bakamunyemya Leza kwamyaka iili makumi one? Tee mbabaabo bakacita zinyonyoono bali aamitumba yakasyaala mikwili-mikwili munkanda? 18Ciindi Leza naakakonka cabukali wakati, “Tabakooyoonjila mukulyookezya kwangu.” Ino wakali kwaambila bani? Wakali kwaambila baabo bakamuzangila. 19Aboobo twabona lino kuti tiibakakonzya kunjila nkaambo tiibakali kusyoma pe.

Currently Selected:

Bahibulu 3: Tonga96

Highlight

Copy