Bahibulu 2

Zyalufutuko lupati

1Nkakaambo aako ncotweelede kuswiililisya kapati kuli zeezyo nzyotwakamvwa, kuti ambweni inga twasweeka. 2Majwi aayo Leza ngakaamba kwiindila mubangelo akalisinizizye. Aboobo uuli woonse watakaaswiilila wakaliletela cisubulo ceelede. 3Ino swebo tuyooyokoka buti kuti katutaswiilili zyalufutuko lupati luli boobu? Mwami, mwini nguwakasaanguna kwaamba zyalufutuko oolu, eelyo aabo bakamvwa bakatwaambilisya kuti ngakasimpe. 4Awalo Leza wakali kuyumya bumboni bwabo kwiindila mukucita zitondezyo zyanguzu, zigambya amaleele aamisyobo-misyobo. Alimwi wakabapa zipego zya Muuya Uusalala mbuli mukuyanda kwakwe.

Zyayooyo wakaleta lufutuko

5Lino takuli kubangelo Leza nkwaakapa bulelo bwanyika iiza njotwaamba. 6Pele umwi wakaambisya mu Malembe kuti,

“Ino muntu ncinzi kuti komuyeeya,

muntunsi nguni kuti komukwabilila?

7Nikuba kuti kwakaindi kasyoonto wakamucesya kwiinda bangelo bako,

pele lino wamupa bulemu abwami

8bwakulela zintu zyoonse.”

Lino kwaamba kuti Leza wapa muntu bulelo bwazyoonse caamba kuti kunyina citali mubulelo oobo. Pele kusikila sunu tatuboni muntu keendelezya zintu zyoonse pe. 9Ngotubona buyo ngu Jesu, walo kwakaindi kaniini wakacesegwa kwiinda bangelo, watambula musini wabulemu nkaambo kalufu ndwaakapenga. Zyakaba boobo nkaambo muluse lwakwe Leza wakayanda kuti Jesu afwide bantu boonse. 10Kwakaleelede kuli Leza, wakalenga akukwabilila zintu zyoonse, kuti abikke Jesu kuti alete bana bakwe banji kuzooba aanguwe mubulemu. Wakacita oobo kutondezya kuti Jesu ngo Musololi uulondokede nkaambo kakupenga kwakwe. 11Ooyo uusalazya bantu kuzwa ku zinyonyoono, abaabo basalazigwa kuzinyonyoono, bajisi Wisi omwe boonse. Nkakaambo aako Jesu ncatausi nsoni kubaita kuti bana bokwesu. 12Mbokuli wakati kuli Leza,

“Ndiyoobaambila bana bokwesu makani aanduwe.

Njookutembaula akati kambungano yabo.”

13Alimwi wakati, “Njoosyoma Leza.” Alimwi wakati,

“Ndili waano abantu aabo Leza mbaakandipa.”

14Lino mbokuli kuti bana aabo mbantu banyama abulowa, Jesu lwakwe wakaba muntu mbuli mbabo. Wakacita oobo kuti kwiindila mulufu lwakwe akamunyonyoone ooyo uujisi nguzu zyalufu, uuli ngu Saatani. 15Aboobo wakabaangununa aabo boonse bakali bazike mubuumi bwabo nkaambo kakuyoowa lufu. 16Nkaambo kaako moyo wakwe tuuli kubangelo pe. Pele mbubuli bwaamba Malembe kuti, “Moyo wakwe uli kulunyungu lwa Abulahamu.” 17Eeci caamba kuti wakaba mbuli babunyina munzila zyoonse, mukuti abe Mupaizi Mupati uusyomeka silweengelelo mukumanina Leza milimo kutegwa zinyonyoono zyabantu zilekelelwe. 18Aboobo lino ulakonzya kugwasya aabo basunkwa, nkaambo walo lwakwe wakasunkwa akupenga.

Currently Selected:

Bahibulu 2: Tonga96

Highlight

Copy