Bahibulu 12

1Lino mukuti kuli bakamboni banji-banji batuzingulukide, atusowe zyoonse zitulemena azinyonyoono zyoonse zitukakatide, pele atwiindilizye canguzu lweendo ndutwatalika kale. 2Mizeezo yesu iibe kuli Jesu walo uuli nentalisyo alimwi nguulondola lusyomo lwesu. Nkaambo kalutangalo lwakali kumulindilila, wakayumina mapenzi aciingano. Taakaba aansoni alufu luli boobu, lino ulikkede kubbazu lyalulyo lwa Leza.

3Amuyeeye yooyo, wakayumina kusulaikwa abantu basizinyonyoono! Mutabi nimutyompwa akuleka pe. 4Mukulwana azibi, tamunasika akujaigwa pe. 5Sena mwaluba majwi aakumuyumya aayo Leza ngaakaamba mbuli kuti waambila bana bazyale? Wakaamba kuti,

“Mwanaangu, utasampauli Mwami nakulaya.

Utanootyompwi nakulailila.

6Nkaambo Mwami uloolola mwanaakwe

woonse ngwatambula, ulasubula woonse ngwayanda.”

7Amuyeeyele mapenzi aanu mbuli kusansaulwa kuzwa kuli uso. Mapenzi aayo atondenzya kuti Leza umulanga mbuli kuti mbana bakwe. Ani mwana nzi ooyo uutalaigwi awisi? 8Kuti nimwatali kusansaulwa mbuli bana bazyale nkokuti nimwatali bana bakwe beni pe, nimwali bamusokwe. 9Bamatata ansi ano bakali kutusansaula nikuba boobo twakali kubalemeka. Tee kayi tweelede kulemeka kapati Wisi waboonse kuti tube aabuumi? 10Matata akali kutusansaula, kwakaindi kasyoonto, mbuli mbobakabona kuti cililuleme kuli mbabo. Pele Leza ulatusansaula kuti tululame akusalala mbuli nguwe. 11Ciindi muntu ncasansaulwa, kulinguwe cisubulo eeco cilausisya taciboti pe. Pele amana kulelwa boobo, musule lyakooko ulaba aluumuno luli ncipego cabuumi bululeme.

Kulailila akucenjezya

12Aboobo amuyumye maboko antoomwe amazwi aanu aatontola. 13Kamuzumenene kweenda munzila iiluzi, kutegwa woonse uulemene atalebuki, pele apone. 14Amusoleke kukkala muluumuno abantu boonse amubusalali, nkaambo kunyina naba omwe uuyoobona Mwami katasalali. 15Amulangisisye kuti kutabi naba omwe uuzwa muluse lwa Leza. Amucenjele kuti kutabi uuli mbuli muyanda uulula uunga wakomena wabisya imwi. 16Amucenjele kuti kutabi mwaamu naa sibwaamu akati kanu, naba uusampaula zya Leza mbuli Isau wakauzya bupati bwakwe nkaambo kacilyo caciindi comwe buyo. 17Mulizi kuti musule naakatiyande kuti wisi amuleleke, wakapiluka cinkwamaanza, nkaambo kakuti taakajana nzila yakucinca ceeco ncaakacita, nikuba kuti wakaciyandaula cakulila amisozi.

18Tamunasika mbuli bwakasika Baisilayeli, kuliceeco ncomukonzya kuguma. Tamuna sika kucilundu ca Sinai, cakali kuyaka mulilo. Mumbali mwakali kusiya mbi, alimwi kwakali guwo libbubbula. 19Kwakamvwigwa mweembo alimwi ajwi. Bantu nibakamvwa jwi eelyo bakakumbila kuti batalimvwi limbi. 20Nkaambo bakayoowa mulawo wakuti, “Naba munyama uuguma cilundu, uleelede kuumwa mabwe kusikila afwe.” 21Akaka, zintu eezyo zyakali kuyoosya kapati cakuti Mozesi wakati, “Ndayoowa kapati akukankamana!”

22Mubusena bwaboobo nywebo mwasika kucilundu ca Ziyoni, kumunzi wa Leza Muumi, ngo Jelusalemu wakujulu, kuli bangelo batabaliki. 23Mwasika kumbungano yalutangalo njobabungene aabo bana ba Leza bataanzi, aabo bali aamazina aalembedwe kujulu. Mwaboola kuli Leza uubeteka bantu boonse, ooko kuli myuuya yabantu baluleme balondokede. 24Mwaboola kuli Jesu, Sikuyanzanya wacizuminano cipya, wakasansaila bulowa bwakwe busyomezya zibotu kwiinda bwa Abela.

25Aboobo amucenjele kuti mutakaki kumuswiilila ooyo uukanana kulindinywe. Baisilayeli tiibakafutuka nibakakaka kuswiilila Leza ciindi naakabacenjezya ansi aano. Ino swebo inga twafutuka buti naa twafutatila yooyo uukanana kulindiswe kuzwa kujulu! 26Ciindi eeco jwi lya Leza lyakazungaanya nyika, pele lino wasyomezya kuti, “Nsikazungaanyi alimwi nyika yalo, pele ajulu alyalo.” 27Lino eeli jwi lyakuti, “Alimwi” lilasalazya kuti zilenge zyoonse ziyoozungaanyizigwa akugwisigwa kutegwa eezyo zitazungaanyizigwi zikasyaale.

28Aboobo mukuti twatambula bwami oobo butakonzyi kuzungaanyizigwa, atulumbe akumanina Leza milimo mibotu cakumubotezya, kumulemeka, akuyoowa. 29Nkaambo Leza wesu ooyu mmulilo uusyukuta.

Currently Selected:

Bahibulu 12: Tonga96

Highlight

Copy