Bagalatiya 4

1Ncendaamba ncakuti mwana nguuelede kukona lubono lwawisi. Pele nacili musyoonto taandeene amuzike, nikuba kuti lubono loonse ndulwakwe. 2Mwana weelede kumvwa bamulela bali mbabeendelezya lubono lwakwe kusikila niciyoosika ciindi wisi ncaakaamba. 3Mbubonya oobo mbotwakabede aswebo nitwatakanaziba Kilisito, twakali bazike banjiisyo zyabuntunsi. 4Ciindi ceelede nicakasika, Leza wakatuma Mwanaakwe wakazyalwa amukaintu kali muntu weelede kubamba Mulawo. 5Wakacita oobo kuti anunune aabo bakali bazike ba Mulawo, kuti tube bana ba Leza. 6Lino nkaambo kakuti tuli bana bakwe, Leza wakatuma Muuya wa Mwanaakwe mumyoyo yesu, walo uutucitya kuti tukombe kuti, “Abba! Taata!” 7Aboobo tocili muzike pe, pele uli mwana muzyale muli Leza. Kuti koli mwana uli sikukona.

Paulu mbwaakakalalila Bagalatiya

8Kaindi tiimwakamuzi Leza, aboobo mwakali kubelekela zintu zitali Leza. 9Pele lino mulizi Leza, pe, ngambe kuti Leza ulimuzi, ino kayi mwapiluka buti kunjiisyo zyabuyo eezyo zinyina mulimo? Nkaambo nzi ncomuyanda kubelekela nzizyo? 10Mulabamba amwi mazuba kuti mapati mulacita mbubonya oobo aku myezi, ziindi, amyaka. 11Ndiyoowede kuti ambweni milimo yoonse njindamubelekela njabuyo.

12Nobakwesu, ndamukumbila kuti mube mbuli ndime nkaambo ambebo ndakali mbuli ndinywe. Tiimwakandibisizya pe. 13Mulizi kuti nkaambo kabulwazi ndakakkala kulindinywe akumukambaukila Makani Mabotu kusaanguna. 14Bulwazi bwangu oobu bwakali kumupenzya anywebo mumyoyo, pele tiimwakandisampaula nikuba kusesemwa nkaambo kandime, pele mwakanditambula mbuli mungelo wa Leza ambuli Kilisito Jesu mwini. 15Ncinzi cacitika kulutangalo lwanu luya? Nkaambo ndimasimpe kuti ciindi ciya nicakali kukonzeka, nimwakagwisya meso aanu akundipa. 16Lino sena ndaba sinkondonyoko nkaambo ndamwaambila zyamasimpe?

17Bantu balamusungwaalila, pele busungu bwabo tabuli bubotu pe. Bayanda buyo kumuzandula kuti musungwaale mukubasumpula. 18Ncibotu kuti musungwaale muciyanza cibotu nentako, kutali buyo ciindi neliko pe. 19Nobana bangu, mbubuli mukaintu mbwamvwa kucisa naamyongwa, mbubonya ambebo ndicisidwe akaambo kanu kusikila Bukilisito buzwidilile mulindinywe. 20Nicabota kuba aandinywe lino, ambweni nindacinca majwi aangu. Mwandimana maanu.

Cikozyanyo ca Haga a Sala

21Nkooko amundaambile, nywebo nomuyanda kubelekela Mulawo, sena tamumvwi zyaamba Mulawo ooyo na? 22Kayi Malembe aamba kuti Abulahamu wakalijisi bana bobilo. Umwi wakali wamukaintu muzike, umwi wakali wamukaintu mulubusi. 23Lino mwana wamuzike wakazyalwa mbuli bantunsi, pele ooyo wamukaintu mulubusi wakazyalwa kweendelana acisyomezyo ca Leza. 24Lino makani aaya aali mbuli cikozyanyo, aaba bakaintu bobilo bali mbuli zizuminano zyobilo. Umwi uzwa ku cilundu ca Sinai nkokuti Haga, bana bakwe mbazike. 25Haga uli mbuli cilundu ca Sinai cili mucisi ca Alabiya, alimwi ulikozyenye a Jelusalemu wasunu, uuli mubuzike antoomwe abantu bawo. 26Pele Jelusalemu uuli kujulu ooyo mulubusi, ngobaama. 27Nkaambo kulilembedwe kuti,

“Kosekelela yebo omukaintu uutazyali.

Utangale akoongolola yebo ootanamyongwa.

Nkaambo bana banabutema mbanji, kwiinda bana bayooyo uukwetwe.”

28Lino nywebo nobakwesu, mbubonya mbuli Izaka, muli bana ba Leza akaambo kacisyomezyo ca Leza. 29Ciindi eeco mwana wakazyalwa mubuntunsi wakali kupenzya ooyo wakazyalwa munguzu zya Muuya Uusalala. Mbubonya oobo mbocibede asunu. 30Pele ino Malembe ati nzi? Aamba kuti, “Mutande muzike amwanaakwe, nkaambo mwana wamuzike takonzyi kukona lubono antoomwe amwana wamukaintu mulubusi pe.” 31Aboobo nobakwesu, tatuli bana bamuzike, pele tuli bamukaintu mulubusi.

Currently Selected:

Bagalatiya 4: Tonga96

Highlight

Copy