Baefeso 4
4
Lukamantano lwambungano iili mubili wa Kilisito
1Mebo, ndemwaange nkaambo kakubelekela Mwami, ndamukumbila kuti mbuli Leza mbwaakamwiita mweende munzila njaakamwiitila. 2Amulibombye, akulitesya akukakatila lyoonse. Mweetelelane muluyando 3alimwi lukamantano lupa Muuya Uusalala, musoleke kulubamba muluumuno lukuswaanganya. 4Kuli mubili omwe a Muuya Uusalala omwe, mbubonya mbuli mbokuli lulangilo lomwe Leza ndwaakamwiitila. 5Kuli Mwami omwe, lusyomo lomwe, alubbapatizyo lomwe. 6Kuli Leza omwe uuli ngo Wisi wabantu boonse. Walo ulabainda boonse, ulabeteka kwiindila muli boonse, alimwi uli muli boonse. 7Pele umwi aumwi wesu wakatambula cipego cabuyo kuzwa kuli Kilisito kweendelana acaabilo ncaakayanda. 8Mbuli mbwaaamba Majwi aa Leza kuti,
“Ciindi naakatanta kujulu,
wakatola baange banji, wakapa zipego kubantu.”
9Lino jwi lyakuti, “Wakatanta,” ino lyaamba nzi? Lyaamba kuti kusaanguna wakaselukila ansi eeni-eni. 10Ooyo wakaseluka ngonguwe wakatanta kwiinda kujulu kwini kutegwa azuzye zintu zyoonse. 11Lino ngonguwe wakapa zipego kubantu zyakuti bamwi babe batumwa, bamwi babe basinsimi, bamwi babe bakambausi, bamwi babe beembezi, bamwi babe bamayi. 12Wakacita oobo kuti abambile limwi bantu ba Leza kuti bakamukutaukile akuyaka mbungano iili mubili wa Kilisito. 13Aboobo kumamanino toonse tuyooba aalukamantano lomwe mukusyoma akuziba Mwanaa Leza. Ndendilyo notuyooyuma akuba aabukkale buzwide bwa Kilisito. 14Tatukabi mbuli bana bapepaulwa aluuwo lwanjiisyo zyababeji basiluuni, basowa bantu akucenjela kwabo. 15Pele kwaambisya tuleelede kwaamba zyabwini muluyando kuti muli zyoonse tukomene muli Kilisito. Walo ngomutwe, 16nguuendelezya mubili woonse akuuswaanganya antoomwe muzizo zyoonse. Alimwi cizo cili coonse cilabeleka mulimo waco, eelyo mubili woonse ulakomena akuliyaka lwawo muluyando.
Buumi bupya muli Kilisito
17Lino muzina lya Mwami ndamwaambila cakusinizya kuti tamweelede kunoopona mbuli mbobapona bakunze pe. Maanu aabo ngabuyo, 18alimwi mizeezo yabo ili mumudima. Nkaambo mbaasicinguni batazi Leza, balafutatila buumi bupa Leza. 19Bacinyina nsoni, balalipa lwabo beni kuzisofweede akucita zibi noziba buti kakunyina kulilesya.
20Nywebo tiimwakaiya boobo makani aa Kilisito pe! 21Mwakamvwa zyanguwe ncobeni, mwakaiisigwa kweendelana azyabwini zili muli Jesu. 22Amuleke bukkale bwanu bwabuntunsi bwakale, bumunyonyoona nkaambo kabusofwaazi bwalucengo. 23Mizeezo amyoyo yanu ibe mipya. 24Musame buntu bupya, oobo bwakalengwa mucinkozya ca Leza mubululami bwini-bwini abusalali. 25Nkaambo kaako, amuleke bubeji. Muntu umwi aumwi aambe zyakasimpe kumweenzinyina nkaambo swebo toonse tuli zizo zyamubili omwe. 26Nomunyema mutabisyi pe, alimwi zuba litabbili kamunyemede. 27Mutapi Saatani busena bwakumusunka. 28Mubbi atabbi limbi, pele abelesye maanza aakwe mumilimo mibotu, kutegwa akonzye kupa cimwi cintu kuli baabo babulide. 29Mutaambi majwi aajazya bweeme, pele ziindi zyoonse amwaambe majwi aaelede aakonzya kuyaka, kuti boonse aabo baswiilila bagwasigwe. 30Alimwi mutausyi nsoni Muuya Uusalala wa Leza, ngonguwe cizibyo cakuti muli bakwe Leza mane kusikila kubuzuba bwalununuko. 31Amugwisye nduti-luti akunyema, bukali akuzwangana, kutamizyanya akusulana kuli buti koonse. 32Amufwidilane luzyalo, mube batete myoyo akulekelelana, mbubonya mbuli Leza muli Kilisito mbwaakamulekelela anywebo.
Currently Selected:
Baefeso 4: Tonga96
Highlight
Share
Copy
Want to have your highlights saved across all your devices? Sign up or sign in
Tonga Bible © United Bible Societies, 1994.