Bakolose 2

1Njanda kuti muzibe mbuli mbwemupengela kapati, nywebo abaku Lawodisiya, aboonse aabo batana ndibona. 2Njanda kuti eezi zibakkazike myoyo akuti baswaangane antoomwe muluyando akuba aacamba nkaambo kakuzibisya zya Leza, kwaambisya, maseseke kuzibisya aaamba zya Kilisito. 3Mulinguwe momusisidwe lubono loonse lwaluzibo abusongo. 4Ndaamba boobu kutegwa kutabi muntu uukonzya kumuyunga amajwi aabucenjezu. 5Nikuba kuti nsiko mumubili, pele moyo wangu uli kuli ndinywe. Ndakondwa kumvwa kuti zyoonse muzicita kabotu akuti lusyomo lwanu muli Kilisito lulizuunyene.

Zyabuumi buzwide muli Kilisito

6Lino mukuti mwakatambula Kilisito Jesu kuti abe Mwami wanu amukkalilile mulinguwe. 7Musimpye miyanda akuyaka buumi bwanu mulinguwe. Mwiime nji mulusyomo, mbubonya mbuli mbumwakaiisigwa, alimwi kamumutembaula lyoonse.

8Amucenjele kuti kutabi naba omwe uunyonyoona lusyomo lwanu abusongo bwabuntunsi buli mbwalucengo buyo. Kayi eezi zizwa kutunsiya-nsiya twabakaindi akumizeezo yabuntunsi buyo, kutali kuli Kilisito pe. 9Nkaambo mulinguwe buleza boonse bulikkede mumubili wakwe. 10Nkabela mulinguwe anywebo mulijisi buumi buzwide. Nguuinda mami amalelo oonse.

11Mulinguwe mwakapalulwa, kutali kupalulwa kucitwa amaanza, pele kupalula kwa Kilisito, nkokuti kugwisigwa kwabuntunsi bwanu alinguwe. 12Mwakazikkwa a Kilisito nimwakabbapatizigwa mulubbapatizo oolo, alimwi mwakabusigwa anguwe nkaambo mwasyoma nguzu zya Leza wakamubusya kuzwa kubafu. 13Nywebo kaindi mwakalifwide nkaambo kazibi zyanu akutapalulwa kwamyoyo yanu. Pele lino Leza wakamubusya antoomwe a Kilisito, wakatulekelela zibi zyesu zyoonse. 14Wakamwaya mulandu wakuti tubambe zyoonse zyaamba Mulawo mukuubambula aciingano. 15Muli Kilisito, Leza wakagwisya nguzu zyamami amalelo oonse akwaausya nsoni antangalala naakatondezya kuzunda kwakwe.

16Aboobo kutabi muntu naba omwe uumupa kaambo kwaamba nzyomulya naa kunywa naa kaambo kapobwe lyamwaka amwaka, naa mwezi mupya naa buzuba bwa Sabata. 17Eezi zyoonse ncimvule buyo cazeezyo zyabwini ziciboola, pele zyabwini eezyo ngu Kilisito. 18Kutabi muntu naba omwe uumuunina mukulailila kuti bantu balibombye akukomba bangelo. Bali boobo balayanda kwaamba zyazeezyo nzyobati bakabona muzilengaano. Balalisumpula kakunyina akaambo, nkaambo balatobela zyabuntunsi. 19Aabo tabajatilili Kilisito walo uuli ngomutwe wambungano. Kayi muli Kilisito mubili woonse ulatambula nguzu akujatana zizo zyoonse. Nkaako mubili ulakomena mbuli buyanda Leza.

Zyakufwa akuba abuumi muli Kilisito

20Lino mwakafwa a Kilisito aboobo tamujisi lubazu azilengwa zyabuntunsi. Nkaambo nzi ncomucicita mbuli kuti mulaabuumi bwabuntunsi? Nkaambo nzi nomuciswiilila milawo eeyi yakuti, 21“Utajati,” “Utalabili,” “Utagumi?” 22Milawo anjiisyo eezi nzyabantu, zyaamba zyazintu zimana zyamana kubelesegwa. 23Eezi ziboneka aanga nzyamaanu ncobeni, twaambe mbuli nobaamba zya milawo miyumu ya kulibombya akupenzya mubili. Pele tazikwe mpindu mukulesya zisusi zyamubili pe.

Currently Selected:

Bakolose 2: Tonga96

Highlight

Copy