Bakolose 3

1Naa mwakabusigwa a Kilisito, amubikke myoyo yanu kuzintu zyakujulu, ooko Kilisito nkwabede, ulikkede kubbazu lyalulyo lwa Leza. 2Amuyandaule zyakujulu, kutali zyaansi aano pe. 3Nkaambo nywebo mwakafwa, aboobo buumi bwanu bulibambidwe a Kilisito kuli Leza. 4Kilisito ngobuumi bwanu, eelyo aakulibonya anywebo muzoolibonya mubulemu mbuli nguwe.

Zyabuumi bwakaindi abupya

5Amujaye zyoonse zyabuntunsi zili mulindinywe, mbuli bwaamu, busofwaazi, zisusi, kunyomenena, abusyacivulemwangu. Kuyandisisya eezi kulikozyenye akukomba baleza bapange. 6Akaambo kazintu eezi, bukali bwa Leza bulabazida batamuswiilili. 7Kaindi mwakali mbuli mbabo nimwakali kuzicita.

8Pele lino amuzileke zili mbuli zeezi zyoonse, kunyema, bukali, kukweekana, kubejelezyanya, amatusi. 9Mutanoocengani, nkaambo mwakasiya buumi bwanu bwabuntunsi amicito yabo, 10nkabela mwanjila mubuumi bupya. Buumi oobu Mulengi wanu ulabubambulula buzuba abuzuba kuti mumuzibe mbuli mbwabede. 11Mubuumi oobu taakwe kwiindana akati ka Bajuda abamasi, bapalule abatali bapalule, bataiide, bazilikooko, bazike abazyale. Kwiindana ooku takujisi makani, pele cipati ngu Kilisito uuli muli boonse.

12Lino ndinywe bantu mbaakasala kuti mube basalala abayandwa bakwe. Nkankakaako ncomweelede kuba aankumbu, luzalo, lubomba, batete moyo, alweengelelo. 13Amweengelelane akulekelelana. Kuti naa umwi kajisi kaambo kumweenzinyina uleelede kumulekelela mbubonya mbuli Mwami mbwaakamulekelela walo. 14Nkabela kwiinda eezi zyoonse, amube aaluyando, luli ncecaanzyo cazintu zyoonse mubulondosi. 15Alimwi luumuno lupa Kilisito alweendelezye myoyo yanu. Leza wakamwiita kuti mube aaluumuno oolu nkaambo muli zizo zyamubili omwe. Amube amyoyo yakulumba. 16Majwi aa Kilisito aaendelezye myoyo yanu lyoonse nomwiisyanya akucenjezyanya cabusongo boonse. Amwiimbe antembauzyo, nyimbo, nyimbo zimwi zyamuuya, amwiimbile Leza amyoyo yakulumba. 17Nkabela kufumbwa nzyomucita, nikuba kwaamba, amuzicite zyoonse muzina lya Mwami Jesu, akulumba Leza Taata kwiindila mulinguwe.

Zyabuumi bupya mumukwasyi

18Nobakaintu, amulibombye kubalumi banu mbubonya mbomweelede mu Mwami. 19Nobalumi anywebo, amuyande bakaintu banu, mutabi aalunya. 20Nobana, amuswiilile bazyali banu muzintu zyoonse, nkaambo eeci ncecikondelezya Mwami. 21Anywebo nomawisi, mutanoobanyemyi caali bana banu kuti batali kutyompokelwi. 22Anywebo nobazike, amubaswiilile muzintu zyoonse basimalelo banu ansi aano. Citabi cipa meso mukuti bamulumbaizye, pele amubaswiilile amoyo oonse, nkaambo mulemeka Mwami. 23Kufumbwa cintu ncomucita, amubeleke amoyo woonse uumaninide mbuli kuti mubelekela Mwami lwakwe, kutali bantu buyo. 24Nkaambo mulizi kuti muyookona eezyo Mwami nzyaakasyomezya bantu bakwe. Muli zyoonse mubelekela Mwami wanu Kilisito. 25Pele muntu uucita zitaluleme, uuyoobweedezelwa bubi bwakwe, nkaambo Leza tasalululi.

Currently Selected:

Bakolose 3: Tonga96

Highlight

Copy