Milimo 11

Pita mbwaakaakuluula kumbungano yaku Jelusalemu

1Batumwa abasyomi boonse bamucisi ca Judiya bakamvwa kuti bamasi abalo batambula Majwi aa Leza. 2Pita naakabweeda ku Jelusalemu, bankamu yabupalule bakali kuyanda kuti bamasi kabapalulwa abalo, bakamutongooka. Bati, 3“Yebo wakaakunjila muŋanda yabamasi batapalwidwe, alimwi wakalya ambabo!” 4Pita wakabalungulwida makani oonse mbwaakabede, kuzwa kumatalikilo.

5Wakati, “Nindakali kukomba mumunzi wa Jopa, ndakabona cilengaano. Ndakabona cintu cakali kuboneka mbuli ncisani cipati caangidwe muziswi zyone, kaciseluka ansi kuzwa kujulu, mpoonya cakasika mpindakabede. 6Nindakalangisya mulincico, ndakabona kuti cakajisi banyama bavubwa, bamusokwe, bakalaba, abayuni. 7Mpawo ndakamvwa jwi lindaambila kuti, ‘Buka Pita, jaya ulye!’ 8Pele mebo ndakati, ‘Peepe, O Mwami! Nkaambo taakwe cintu cisofweede niciba citasalali ncindakalya kale.’ 9Jwi lyakaamba alimwi kuzwa kujulu lyakati, ‘Cintu ncaakasalazya Leza, yebo utacaambi kuti tacisalali pe.’ 10Eeci cakacitika ziindi zyotatwe, kumamanino cintu eeco cakatolwa kujulu alimwi. 11Lino ciindi eeco nciconya kuŋanda nkondali kukkala kwakasika baalumi botatwe bakatumwa kuzwa ku Sizaliya. 12Awalo Muuya wa Leza wakandaambila kuti ngunke ambabo kaatakwe akumuka-muka. Alimwi bakwesu aaba bali cisambomwe bakainka ambebo ku Sizaliya ooko. Toonse twakaakunjila muŋanda yamwaalumi uutegwa Koneliyasi. 13Wakatwaambila mbuli mbwaakabona mungelo kaimvwi muŋanda yakwe. Mungelo ooyo wakaambila Koneliyasi kuti, ‘Tuma bantu kuya ku Jopa kuti bakaite mwaalumi uutegwa Saimoni Pita. 14Uzookwaambila majwi aatizookufutule yebo amukwasyi wako oonse.’ 15Eelyo mbwindakatalika buyo kwaamba, bakatambula Muuya Uusalala mbubonya mbuli mbutwakautambula aswebo kumatalikilo. 16Aboobo ndakayeeya cakaamba Mwami naakati, ‘Joni wakabbapatizya amaanzi cula, pele nywebo muyoobbapatizigwa a Muuya Uusalala.’ 17Lino kuti Leza kali wabapa abalo cipego nciconya ncaakatupa ciindi nitwakasyoma mu Mwami Jesu Kilisito, ino mebo ndime ni kuti ndikazye Leza?”

18Babupalule nibakaamvwisisya makani aaya, bakazulwa. Bakalumbaizya Leza akuti, “Anu Leza wakabapa bamasi ciindi cakweempa akusanduka kuti abalo babe aabuumi.”

Imbungano yaku Antiyoki

19Basyomi bakamwaika akaambo kamapenzi aakabasikila ciindi Sitivini naakajaigwa. Bamwi babo bakaya ku Fenisiya, bamwi ku Saipulasi aku Antiyoki, kabaya bukambauka ku Bajuda balo. 20Pele bamwi baalumi basyomi bakazwa ku Saipulasi aku Sailini, bakaya ku Antiyoki kuya bwaamba makani ku Bagiliki, kubakambaukila Mulumbe Mubotu wa Mwami Jesu. 21Nguzu zya Mwami zyakali aambabo, bantu banji bakazumina akusandukila ku Mwami.

22Aaya makani akamvwigwa ambungano yakali mu Jelusalemu, yalo yakatuma mwaalumi uutegwa Banabasi kuya ku Antiyoki. 23Naakaakusika akubona mbuli Leza mbwaakabaleleka bantu aabo, wakabotelwa akubayumya-yumya kuti bajatisye mu Mwami cakukakatila amyoyo yabo yoonse. 24Banabasi wakalilomene, wakazwide Muuya Uusalala alusyomo. Ku Antiyoki ooko bantu banji bakaletwa ku Mwami.

25Kuzwa waawo Banabasi wakaya kumunzi wa Taasosi kuyoolangaula Saulu. 26Naakakumujana, wakaakumuleta ku Antiyoki. Aaba bobilo kwamwaka oonse bakali kubungana abantu bambungano, alimwi bakali kwiisya bantu banji-banji. Ku Antiyoki basyomi nkubakasaanguna kwiitwa kuti Bakilisito.

27Ciindi eeco basinsimi bamwi bakazwa ku Jelusalemu bakaya ku Antiyoki. 28Umwi wabo wakali kwiitwa kuti Agabasi, wakaima akusinsima kwiindila munguzu zya Muuya Uusalala kuti kuyooba nzala mpati munyika yoonse. Eeci cakacitika ciindi Kilaudiyasi naakali Muleli Mupati waku Loma. 29Lino basyomi bakayeeya kuti batumine lugwasyo kubasyominyina bakucisi ca Judiya, umwi aumwi wabo ape mbuli mbwaakali kukonzya. 30Eelyo nibakamana kubunganya zipego zyabo, bakazipa kuli Banabasi a Saulu kuti bazitole kubapati bambungano yaku Jelusalemu.

Currently Selected:

Milimo 11: Tonga96

Highlight

Copy