Milimo 12

Helodi mbwaakapenzya basyomi

1Ciindi eeci mwami Helodi wakajata bamwi bambungano kuti abapenzye. 2Wakajaya Jemusi, mwanookwabo Joni apanga. 3Naakabona kuti eeci cakababotezya Bajuda, wakaakujata akwaanga Pita. (Eeci cakacitika ciindi capobwe lya Cinkwa Citakwe Mimena.) 4Pita naakajatwa, wakabikkwa muntolongo. Oomo wakali kulindilwa ankamu zyabasilumamba zyone zyakajisi bantu bone-bone. Helodi wakali kuyanda kuya kubeteka Pita antangalala lyamana Pobwe lya Kwiindilila. 5Aboobo Pita wakali muntolongo, pele bambungano bakali kumukombela canguzu kuli Leza.

Pita mbwaakagwisigwa muntolongo

6Lino masiku ngoonya Helodi ngaakali kuyeeya kuti bwaca azoolete Pita kubuleya, Pita wakalede akati kabasilumamba bamulindilila bobilo. Wakaangidwe nketani zyobilo, alimwi kwakali abamwi balindizi kumulyango wantolongo. 7Mpoonya-mpoonya kwakasika mungelo wa Mwami, eelyo mumuni wakamweka muntolongo. Mungelo wakatikimuna Pita akumubusya wati, “Fwamba! Buka!” Mpoonya aawo nketani zyakaloka kuzwa kumaboko aakwe. 8Mungelo wakati, “Anga lutambo lwako, usame ndyasyo zyako.” Pita wakacita oobo. Alimwi mungelo wakati, “Liyabike jansi, undiccilile!” 9Pita wakamutobela kuzwa muntolongo. Pele taakwe naakazi kuti naa eeco ncaakali kucita mungelo cakali kucitika ncobeni. Wakali kuyeeya kuti ncilengaano. 10Eelyo bakainda balindizi bataanzi, alimwi ababili, mane baakusika kumulyango walubulo wamanjililo aamumunzi. Mulyango walubulo ooyo wakajaluka wini, mpoonya bakazwa. Bakeenda kumagolelo amugwagwa, mpawo mungelo wakasiya Pita.

11Aawo Pita wakaziba cakacitika kulinguwe, eelyo wakati, “Lino ndaziba ncobeni kuti Mwami nguwatuma mungelo, wandivuna kuzwa munguzu zya Helodi akuzintu eezyo Bajuda nzibali kuyeeya kuti zilacitika kulindime.”

12Naakazibisya, wakainka kuŋanda ya Maliya banyina Joni Maako. Ooko kwakali bantu banji bakabungene akukomba. 13Pita wakakonkomona acitendele caanze, umwi musimbi mubelesi wakali kwiitwa kuti Loda wakamvwa akuza kumulyango. 14Naakaliziba jwi lya Pita, wakabotelwa kapati. Katana akujalula, wakazuzaanina mukati kuyooambilizya kuti “Pita nkwali anze!” Balo bakaingula kuti, 15“Ulisondokede yebo.” Pele musimbi ooyo wakasinizya kuti cili kasimpe. Bakati, “Nkokuti mungelo wakwe buyo.” 16Pita ciindi eeco wakacili kukonkomona. Kumamanino bakajalula citendele, nibakamubona bakagambwa. 17Pita wakatambika janza lyakwe kuti baumune, wakabalungulwida makani aambuli Mwami mbwaaakamugwisya muntolongo. Alimwi wakati, “Mumwaambile Jemusi abakwesu bamwi makani aaya.” Nkabela wakazwa akuunka kumbi.

18Nibwakaca balindizi bantolongo bakanyongana kapati. Bakati, “Ino Pita waya kuli?” 19Naakamvwa, mwami Helodi wakalailila kuti ayandaulwe. Pele taakwe nibakamujana pe. Helodi naakamana kubuzisisya balindizi wakalailila kuti bajaigwe.

Naakamana makani aaya Helodi wakazwa kucisi ca Judiya akuya kucisi ca Sizaliya nkwaakaakukkala-kkala.

Lufu lwa Helodi

20Lino Helodi wakanyemenede bantu baminzi ya Taya a Sidoni kapati. Bantu baminzi eeyi bakatuma nkamu kuti bakabonane anguwe. Nkaambo cisi cabo cakali kujana cakulya kuzwa kucisi camwami Helodi. Bakanjilila kuli Bilasitusi wakali mupati waŋanda yamwami Helodi. Nibakasika kuli Helodi bakamukumbila kuti kube luumuno akati kabo.

21Mubuzuba bwakasalidwe, Helodi wakasama zyabwami akukkala acuuno cabwami, eelyo wakakanana kubantu aabo. 22Bantu bakapozomoka akuti, “Aaya mmajwi aa Leza kutali aamuntu pe!” 23Mpoonya-mpoonya aawo mungelo wa Leza, wakajaya Helodi, nkaambo taakwe naakapa bulemu kuli Leza. Wakaligwa mvunyu akufwa.

24Lino majwi aa Leza akacili kuzwida anembo mukumwaika koonse-koonse.

25Banabasi a Saulu bakamanizya mulimo ngubakatumidwe, aboobo bakazwa ku Jelusalemu, batolelela a Joni Maako.

Currently Selected:

Milimo 12: Tonga96

Highlight

Copy