Milimo 10

Pita a Koneliyasi

1Kwakali muntu umwi mucisi ca Sizaliya wakali kutegwa Koneliyasi.

Wakali mupati wankamu yabasilumamba ba Baloma yakali kwiitwa kuti “Lumamba lwa Itali.” 2Muntu ooyu amukwasyi wakwe oonse bakali kukomba Leza. Wakali kugwasya kapati Bajuda bacete, akukomba ciindi aaciindi. 3Bumwi buzuba ciindi cakumazuba Koneliyasi wakabona cilengaano. Mucilengaano oomo wakabona mungelo wa Leza kaza kulinguwe akumwaambila kuti, “Koneliyasi!”

4Koneliyasi naakalanga mungelo ooyo, wakayoowa akwaamba kuti, “Mbuti, Mwami?”

Mungelo wakati kulinguwe, “Leza wabotelwa kukomba amilimo yako yalubomba njocita, aboobo uyanda kukwiingula. 5Lino tuma baalumi ku Jopa kuti bakaite mwaalumi uutegwa Saimoni Pita. 6Ukkede kwa Saimoni musuki wamasalu. Saimoni uuyakide munsi aalwizi.” 7Ciindi mungelo naakainka, Koneliyasi wakaita babelesi bakwe bobilo asilumamba omwe. Silumamba ooyo wakali umwi wabalindizi bakwe, alimwi wakali kuyandisya kukomba Leza. 8Koneliyasi wakabaambila makani oonse aakacitika, eelyo wakabatuma ku Jopa.

9Nibwakaca kabali aafwiifwi kusika ku Jopa, Pita wakatanta atala aaciluli caŋanda kuti akombe. Ciindi eeci lyakali sikati. 10Wakafwide nzala kuciindi eeco kayanda cakulya. Nibakacili kumubambila-bambila cakulya, wakabona cilengaano. 11Wakabona julu lyajaluka, mpawo wakabona cintu ciza buza ansi cili mbuli cisani cipati caangidwe muziswi zyone. 12Mulincico mwakali banyama bamisyobo-misyobo bakalaba abayuni. 13Wakamvwa jwi kaliti, “Buka Pita, jaya ulye!”

14Pita wakaingula kuti, “Peepe, O Mwami! Mebo mbwindakabeda muntu, nsinalide cintu citasalali naa cisofweede.”

15Jwi alimwi lyakati, “Cintu Leza ncaasalazya utacaambi kuti t acisalali pe.” 16Eeci cakacitika ziindi zyotatwe, mpoonya cintu eeco cakatolwa kujulu alimwi.

17Lino Pita wakali kuyeeya akugambwa mumoyo wakwe kuti naa cintu eeco ncaakabona caamba nzi. Ciindi eeco abalo baalumi bakatumidwe a Koneliyasi bakabuzya kwakali ŋanda ya Saimoni, bakasika akwiima amulyango walukwakwa lwayo. 18Baita akubuzya kuti, “Sena kuli mweenzu kuno uutegwa Saimoni Pita?”

19Pita naakacili kuyeeyesya zyacilengaano eeco, Muuya wa Leza wakamwaambila kuti, “Swiilila! Kuli bantu botatwe bakulangaula. 20Nyamuka useluke, utamuki-muki kuunka ambabo pe, nkaambo ndime ndabatuma.” 21Aboobo Pita wakainka kubaalumi aabo wati, “Ndime muntu ngomulangaula. Ino mwatumwa nzi?”

22Bakati, “Mupati wabasilumamba uutegwa Koneliyasi, nguwatutuma. Muntu mubotu uukomba Leza, alimwi ulalemekwa kapati a Bajuda. Pele wakaambilwa amungelo wa Leza kuti akwiite yebo kuŋanda yakwe kutegwa akamvwe eeco ncotikamwaambile.” 23Pita wakabanjizya muŋanda akubabamba.

Nibwakaca Pita wakabweza lweendo, wakainka ambabo, alimwi abamwi basyomi bamumunzi wa Jopa bakainka anguwe. 24Buzuba bwakatobela wakaakusika ku Sizaliya. Ooko Koneliyasi nkwaakali kumulindila, wakali antoomwe abasazinyina abamwi beenzinyina mbaakatambide. 25Pita kayanda kunjila mulukwakwa Koneliyasi wakaya kuyoomucingauzya, wakamuvuntamina. 26Pele Pita wakamukasya, wamwiimika wati, “Ambebo ndi muntu buyo.” 27Lino kaya bwaambaula wakanjila muŋanda wajana bantu banji balibungene. 28Pita wakati kulimbabo, “Nobeni mulizi kuti Mujuda teelede kuswaya naa kuyanzana abamasi. Pele Leza wakandizibya kuti nseelede kwaamba kuti muntu umwi tasalali naa ulisofweede. 29Ncenciceeco ncindaboola kakunyina akusyasyala-syasyala nimwanditumina bantu. Ngaayo aaboole ngakuti nzi?”

30Koneliyasi wakaingula kuti, “Sunu mbuzuba bwane kuzwa nindakali kukomba muŋanda yangu ciindi cakumazuba. Mpoonya ndakabona mwaalumi wakasamide zisani zinyengema uliimvwi kumbele lyangu. 31Wakati, ‘Koneliyasi! Leza wakakumvwa kukomba kwako akuyeeya milimo yalubomba njocita. 32Tuma bantu ku Jopa kuti bakaite mwaalumi uutegwa Saimoni Pita, mweenzu wa Saimoni musuki wamasalu uukkala aafwiifwi alwizi.’ 33Mbombubo mbwindakabatuma bantu oobo, lino cabota mboosika omwaalu wangu. Ono toonse tuli aano kubusyu bwa Leza kulindila kuti tumvwe kufumbwa cintu ncaalailila Mwami kuti waambe.”

Kwaamba kwa Pita

34Pita wakatalika kwaamba kuti, “Lino ndazibisya kuti masimpe ncobeni Leza tasalululi bantu pe. 35Ulatambula kufumbwa muntu uumukomba akumucitila ciluleme, taakwe makani naa ngwamusyobo nzi. 36Mulizi makani aayo Leza ngaakatuma kubantu ba Isilayeli, aakukambauka Mulumbe Mubotu waluumuno luli muli Jesu Kilisito, ooyo uuli ngo Mwami wabantu boonse. 37Alimwi mulizi zyakacitika mu Judiya yoonse, kutalikila mucisi ca Galilii, musule aciindi Joni naakali kukambauka zyalubbapatizyo lwakwe. 38Mulizi zya Jesu waku Nazaleta, mbuli Leza mbwaakamunanika a Muuya Uusalala akumupa nguzu. Nkaambo kakuti Leza wakali aanguwe, wakeendeenda koonse-koonse kaya bucita milimo mibotu akuya buponya aabo bakali kupenzegwa a Saatani. 39Ndiswe bakamboni bazintu zyoonse nzyaakacita mu Jelusalemi amucisi coonse ca Bajuda. Pele bakamujaya kwiindila mukumukankamina aciingano. 40Nikubaboobo Leza wakamubusya kuzwa kubafu mubuzuba bwatatu, Jesu wakaboneka kali muumi. 41Pele taakabonwa abantu boonse pe, wakabonwa buyo andiswe tobakamboni aabo Leza mbaakasalide kale. Swebo nitwakalya anguwe ciindi Leza naakamubusya kuzwa kubafu. 42Alimwi Jesu wakatulailila kuti tukambauke Mulumbe Mubotu kubantu, tubaambile kuti walo ngonguwe ngwaakasala Leza kuti abe ngomubetesi wabantu baumi abafu. 43Basinsimi boonse bakali kwaambilizya zyanguwe, bakati kufumbwa uusyoma mulinguwe uyoolekelelwa zinyonyoono zyakwe kwiindila munguzu zyazina lyakwe.”

Bamasi mbubakatambula Muuya Uusalala

44Pita naakacili kwaamba, Muuya Uusalala wakasika kuli baabo boonse bakali kuswiilila makani. 45Nkabela Bajuda basyomi bakaza a Pita kuzwa ku Jopa bakagambwa kubona kuti Leza wakapa cipego cakwe ca Muuya Uusalala akuli bamasi. 46Nkaambo bakabamvwa kabaamba misyobo iimbi akulumbaizya kuti Leza mupati. Mpoonya Pita wakati, 47“Aaba bantu batambula Muuya Uusalala mbubonya aswebo mbutwakatambula. Sena kuli muntu umwi uukonzya kubakasya kuti batabbapatizigwi amaanzi?” 48Eelyo wakabalailila kuti babbapatizigwe muzina lya Jesu Kilisito. Nibakamana, bakamukumbila kuti akkale ambabo mazuba mace buyo.

Currently Selected:

Milimo 10: Tonga96

Highlight

Copy