Milimo 9

Saulu mbwaakasanduka

(Milimo 22.6-16; 26.12-18)

1Kuciindi eeco Saulu wakali kupezya baccilili ba Mwami akukanza kubajaya. Wakainka kumupaizi mupati 2kuyookumbila magwalo aamuzumizya kuti ainke kuzikombelo zya Bajuda zili ku Damasikasi. Wakali kuyanda kuti naa waakujana batobela Nzila ya Mwami Jesu akabajate akubaanga boonse, baalumi abakaintu, abalete ku Jelusalemu.

3Lino naakasika aafwiifwi amunzi wa Damasikasi, mumuni uuzwa kujulu wakamumwekela. 4Mpoonya wakawida ansi, aawo wakamvwa jwi lyakati, “Saulu, Saulu! Undipenzezya nzi?”

5Saulu wakabuzya kuti, “Ino nduweni Simalelaangu?”

Jwi lyakati, “Ndime Jesu ngopenzya. 6Nyamuka, njila mumunzi, oomo uyooambilwa zyoonse nzyoelede kucita.”

7Baalumi bakali kweenda aa Saulu, bakabwelemana buyo, babula acakwaamba. Kwalo jwi bakalimvwa, pele taakwe muntu ngubakabona. 8Saulu wakanyamuka, wakasola kuti alange pele taakali kukonzya kubona abuniini pe. Aboobo beenzinyina bakamujatilila kujanza akumunjizya mumunzi wa Damasikasi. 9Kwakainda mazuba otatwe kataboni pe, alimwi kwaciindi eeco taakali kulya nikuba kunywa.

10Mumunzi wa Damasikasi, mwakali kukkala musyomi wakali kutegwa Ananiyasi. Mwaalumi ooyu wakabona cilengaano. Mucilengaano eeco Mwami wakamwiita wati, “Ananiyasi!”

Wakaingula kuti, “Mwami.”

11Mpoonya Mwami wakati, “Libambile uunke kumugwagwa wiitwa kuti, ‘Mugwagwa wiimvwi nci.’ Ukainke kuŋanda ya Judasi, ukabuzye muntu uuzwa ku Taasosi uutegwa Saulu. Muntu ooyo ulakomba. 12Eelyo mucilengaano Saulu wakabona mwaalumi uutegwa Ananiyasi kanjila muŋanda akubikka maanza aalinguwe kuti amubonye alimwi.”

13Ananiyasi wakati, “Mwami, bantu banji bakandaambila makani aamuntu ooyu, mbuli mbwacita zintu zinji zibi kubantu bako bali mu Jelusalemu. 14Lino ngooyu waza okuno ku Damasikasi anguzu nzyaakapegwa abapaizi basilutwe kuti azoojate baabo boonse batembaula zina lyako.”

15Pele Mwami wakati kulinguwe, “Koya buyo, nkaambo ndamusala kuti andimanine milimo, azibye zina lyangu kuli bamasi, kubami, akubantu Baisilayeli. 16Alimwi mebo ndemwini njoomutondezya zintu zyoonse nzyeelede kupenga akaambo kangu.”

17Aboobo Ananiyasi wakainka akuyoonjila muŋanda, waakubikka maanza aakwe aali Saulu, akwaamba kuti, “Saulu mukwesu, Mwami wandituma, Jesu lwakwe mwini, ooyo ngookabona munzila nookali kuza kokuno. Wandituma kuti yebo ubone, alimwi kuti uzuzigwe a Muuya Uusalala.” 18Mpoonya aawo kwakazwa zintu zili mbuli makwa aanswi kumeso aa Saulu, eelyo wakakonzya kubona alimwi. Wakaima, wabbapatizigwa. 19Nkabela naakalya, wakaba aanguzu alimwi.

Saulu mbwaakakambauka mu Damasikasi

Saulu wakakkala mazuba mace buyo abasyomi bamu Damasikasi. 20Mpoonya wakanjila muzikombelo zya Bajuda akutalika kukambauka makani aa Jesu. Wakali kwaamba kuti, “Jesu ngo Mwanaa Leza ncobeni.”

21Boonse bakamumvwa bakagambwa akubuzya kuti, “Teensi ngomwaalumi wakali kujaya basyomi bamu Jelusalemu ooyu na? Sena taakaboolela kuzoojata basyomi akubatola kubapaizi basilutwe?”

22Pele kukambauka kwa Saulu kwakaba kwanguzu mpati, wakagambya Bajuda bakali kukkala mu Damasikasi naakabatondezya bumboni bwakuti, “Jesu ngo Munanike wa Leza.”

23Lino nikwakainda mazuba manji, bapati ba Bajuda bakali bunga-bunga kuti babambe makani aakuti bajaye Saulu. 24Saulu wakaambilwa zyamakanze aabo mabi aaya. Bantu aabo bakali kulindilila amilyango yamunzi sikati amasiku kuti bamubona bamujaye. 25Lino bumwi buzuba masiku basikwiiya ba Saulu bakamubikka mucisuwo cipati ncibakainzya acipulo cabwaanda baciselusya ansi anze.

Saulu mu Jelusalemu

26Ciindi Saulu naakaya ku Jelusalemu, wakasoleka kuti asangane abasyomi bankuko, pele balo taakwe nibakamuzumina kuti musyomi awalo pe. Bakali kumuyoowa. 27Lino mwaalumi umwi uutegwa Banabasi wakatola Saulu kubatumwa. Wakabapandulwida mbuli Saulu mbwaakabona Mwami mumugwagwa, ambuli Mwami mbwaakaambaula kulinguwe. Alimwi wakabapandulwida mbuli Saulu mbwaakakambauka muzina lya Jesu cabusicamba mu Damasikasi. 28Lino Saulu wakakkala ambabo alimwi wakeendeenda mu Jelusalemu moonse kaya bukambauka muzina lya Mwami cabusicamba. 29Wakaamba akukazyanya a Bajuda bakanana Cigiliki, pele balo bakayanda kuti bamujaye. 30Basyominyina nibakamvwa boobo, bakatola Saulu ku Sizaliya akuyoomutumya ku Taasosi.

31Ciindi eeco mbungano zyabasyomi mumabazu oonse aa Judiya, Galilii, a Samaliya, zyakali muluumuno. Zyakalikkalikide akuyumizigwa a Muuya Uusalala, nkaako bantu banji balemeka Mwami bakayungizigwa.

Pita mbwaakacita mucisi ca Lida amu Jopa

32Pita naakali kuya bweendeenda mumabazu aandeene-andeene, wakaakusikilizya akubasyomi bakali kukkala mumunzi wa Lida. 33Ooko wakaakujana mwaalumi wakali kutegwa Eneyasi. Muntu ooyu wakayuminide mubili nkaako taakali kukonzya kubuka abulo kwamyaka iili lusele. 34Pita wakati kulinguwe, “Eneyasi, Jesu Kilisito wakuponya. Nyamuka uvunge kasasa kako.” Mpoonya Eneyasi wakanyamuka. 35Lino bantu boonse, bakalikukkala mu Lida amu Syeloni, nibakabona Eneyasi bakasandukila ku Mwami.

36Mumunzi wa Jopa mwakali kukkala mukaintu musyomi wakali kutegwa Tabita. (Mu Cigiliki utegwa Dokasi, nkokuti mbaambi.) Mukaintu ooyu wakapa ciindi cakwe coonse mukucitila bantu milimo mibotu akugwasya bacete. 37Pele ciindi eeco wakaciswa akufwa. Mutumba wakwe bakuusanzya akuubikka muŋanda yamujulu. 38Munzi wa Lida wakali munsi-munsi a Jopa. Basyomi bamu Jopa nibakamvwa kuti Pita mwali mu Lida, bakatuma baalumi bobilo amakani aamba kuti, “Twakomba amuboole kulindiswe.” 39Mpoonya Pita wakalibambila akuunka aabo. Naakasika ooko, bakamutola muŋanda yamujulu. Bamukabafu bakali kugwasigwa a Dokasi, bakabungana bazinguluka Pita. Bakali kulila akumutondezya zisani azibaki zyaakalukide Dokasi naakacili muumi. 40Pita wakabakumbila kuti bazwide anze, mpoonya wakavuntama akukomba. Eelyo wakacengulukila kumutumba wati, “Tabita, buka!” Mpoonya Tabita wakalanga, naakabona Pita, wakabuka wakkala. 41Pita wakatambika janza lyakwe, wajata Tabita kujanza akumwiimika. Eelyo wakaita basyomi abamukabafu, wabapa kali muumi. 42Makani aaya akamwaika mu Jopa moonse, nkaako abantu banji bakasyoma mu Mwami. 43Pita wakakkala mazuba manji mu Jopa, wakasikilide kwa Saimoni musuki wamasalu.

Currently Selected:

Milimo 9: Tonga96

Highlight

Copy