2 Timoti 4
4
1Kumbele lya Leza a Jesu Kilisito uyoobeteka baumi abafu aakuboneka mubwami bwakwe, 2ndakulailila canguzu kuti kambauka majwi aa Leza ciindi bantu nibayandide kuswiilila naa nibataayandide pe. Ubazule, ubacenjezye, ubayumye-yumye akubaiisya amoyo uubombede. 3Nkaambo ciindi ciyoosika bantu nibayookaka njiisyo zyabwini pele bayootobela zisusi zyabo akulijanina bamayi baiisya nzyobayanda kumvwa. 4Bayoofutatila njiisyo zyabwini akutobela twaano buyo. 5Pele yebo kolibamba lyoonse. Zuunyana mumapenzi. Kokambauka Makani Mabotu, akubeleka kabotu milimo yako yoonse.
6Kwaamba zyandime, buumi bwangu bulaabwa mbuli cipaizyo, alimwi ciindi cangu cakuunka casika. 7Ndamanizya kulwana nkondo mbotu, ndakalumanizya lweendo, alimwi nsiindakatyompwa mulusyomo lwangu. 8Ciliko lino nkuyootambula musini wabululami ngwayoondipa Mwami, mubetesi uululeme mubuzuba oobo. Eelyo cipego eeci takapi ndime buyo endikke pe, pele abaabo boonse balindila muluyando kuboola kwakwe.
Majwi aamwi
9Usoleke kuboola kulindime cakufwambaana. 10Nkaambo Dimasi akaambo kakuyandisya zyabuntunsi wakandisiya, wakaya ku Tesalonika. Ambebo ndakatuma Kiliseni ku Galatiya, Taitasi ku Dalumesya. 11Luka alikke nguuli aandime. Muletelele Maako uuze aawe, nkaambo ulakonzya kundigwasya kapati. 12Tikikasi ndakamutuma ku Efesusi. 13Lino jansi ndindakasiya kuli Kaapusi ku Tilowasi uliletelele waboola. Undiletele amabbuku, kapati aalya aazikutu.
14Alekizandaa mufuzi wakandibisizya kapati, pele Mwami uyoomusubula mbweelede. 15Ayebo umucenjelele kapati nkaambo wakali kukazya makani eesu canguzu. 16Ciindi nindakabetekwa kusaanguna taakwe wakandiiminina pe, boonse bakandisiya. Leza abalekelele! 17Pele Mwami wakali aandime akundipa nguzu kuti ndaambilizye makani aakwe buzwide kuti bamasi baamvwe. Aboobo ndakazwa mukanwa lya munyama wabutambo. 18Mwami uyoondivuna kububi boonse akundifutula kuti nkanjile mubwami bwakwe bwakujulu. Kulinguwe kube bulemu lyoonse alyoonse kukabe kutamani. Akube boobo.
Kujuzya kwamamanino
19Ubajuzye ba Pulisila a Akwila abamukwasyi wa Onesifolosi. 20Elasitosi wakasyaala ku Kolinti, alimwi ndakasiya Tulofimasi kacisidwe ku Miletusi. 21Ufwambaane kusika kuno mupeyo kuutanasika. Ubulosi, Pudi a Linasi, Kulodiya, abasyomi boonse balakujuzya.
22Mwami abe aandinywe. Leza amubede aaluse.
Currently Selected:
2 Timoti 4: Tonga96
Highlight
Share
Copy
Want to have your highlights saved across all your devices? Sign up or sign in
Tonga Bible © United Bible Societies, 1994.
