Taitasi 1

1Ndime Paulu mubelesi wa Leza, mutumwa wa Jesu Kilisito. Ndakasalilwa kuyumya lusyomo lwabasale ba Leza akubasolweda kukasimpe nkotwiisya, 2kayakidwe alulangilo lwabuumi butamani mbwaakasyomezya kale-kale Leza uutabeji. 3Nkabela muciindi ceelede wakayubununa cisyomezyo eeci mumajwi aakwe. Lino ndakambauka majwi aaya mbuli mbwindakatumwa mukulailila kwa Leza Mufutuli wesu.

4Ndakujuzya Taitasi mwanaangu mwini mulusyomo ndotujisi.

Leza Taata a Kilisito Jesu Mufutuli wesu bakubede aaluse akukupa luumuno.

Zyamilimo ya Taitasi ku Kiliti

5Ncindakakusiila ku Kiliti nkuti ubambulule oonse makani aatanamana mbuli aakusala baalu bazikombelo muminzi yoonse mbubonya mbundakakulailila. 6Mwaalu wacikombelo abe muntu uutakwe kampenda, uukwete mukaintu omwe buyo. Bana bakwe babe basyomi, batali badakwa naa bataswiilili. 7Mweendelezi mbwali mubanzi wa Leza, uleelede kuba muntu uutakwe kampenda. Teelede kuba syaacivulemwangu, nikuba uufwambaana kunyema, naa mukolwi, naa simanyongwe, nikuba sikuyandisya mpindu. 8Pele uleelede kuba sicimwa beenzu, uuyandisya kucita bubotu, uulibatamika, uululeme, uusalala, sikulijata. 9Uleelede kujatisya kapati makani aakasimpe mbubonya mbuli mbwaaiisigwa, kutegwa akonzye kupa malailile anjiisyo zini-zini alimwi kutegwa azunde aabo bazikazya mbubonya.

10Nkaambo mpobali bantu banji-banji batakwe bulaye, baamba majwi aabuyo aakweena, kwaambisya aabo bankamu yabupalule. 11Aaba mbabeelede kuti kukambauka kwabo kulesegwe, nkaambo banyonganya mikwasyi yoonse eeyo njibasikila cakwiimaninizya mukwiisya zintu nzobateelede kwiisya. Balacita oobo kuti bavubile mpawo. 12Umwi musinsimi wabo beni wakati, “Ba Kiliti lyoonse mbabeji, mbabi mbuli banyama, alimwi mbaasindya batolo.” 13Makani aayo ali kasimpe ncobeni. Nkaambo kaako ubatapatile canguzu kutegwa bayume mulusyomo. 14Kutaamba kuti bagame kuswiilila twaambo twabuyo twatunsiya-nsiya twa Bajuda amilawo yabantu buyo bakaka zyamasimpe. 15Kubasalali zintu zyoonse zilasalala, pele kubantu basofweede batazumini, taakwe cintu cisalala niciba comwe pe, nkaambo miyeeyo amanjezeezya aabo alisofweede. 16Balyaamba kuti balimuzi Leza pele balamutama kwiindila mumilimo yabo. Mbantu basesemya, bataswiilili, bateelede kucita milimo mibotu niiba buti pe.

Currently Selected:

Taitasi 1: Tonga96

Highlight

Copy