1 Timoti 5

Malailile aamwi

1Utanootapatili munene cabukali, pele umulailile mbuli kuti nguuso. Abalo bakubusi kobalailila mbuli bana bokwanu, 2macembele kaalailila mbuli banyoko, balindu kobalailila mbuli bacizi bako amoyo uusalala.

3Kobalemeka bamukabafu aabo bali mbaamukabafu ncobeni. 4Kuti naa mukamufu kajisi bana naa bazyukulu, bana aabo basaangune kucita eezyo Leza nzyayanda kumukwasyi wabo. Mukucita boobo babweedezezye bazyali babo nzibakatambula kuli mbabo. Nkaambo eezi nzezibotezya Leza. 5Lino ooyo mukamufu mwini-mwini uunyina uumulela ubikka buyo lusyomo lwakwe muli Leza, ulakomba cakutaleka masiku asikati kuti Leza amugwasye. 6Pele mukamufu uuyandisya zyakulikkomanisya wafwa kale nikuba kuti ucipona. 7Kobalailila eezi kuti babule kampenda. 8Kuti naa muntu tabambi baluzubo lwakwe kwaambisya bamukwasyi wakwe mwini, ooyu wasowa lusyomo lwakwe alimwi mubi kwiinda uutasyomi.

9Mukamufu woonse uutanaba aamyaka iili makumi aali cisambomwe atalelwi munkamu yabamukabafu, ccita kali wakalikwetwe kumwaalumi omwe buyo, 10alimwi bantu ngobaamba kuti ulaamilimo mibotu. Abe mukaintu wakali kulela bana bakwe kabotu, wakali sicimwa beenzu, wakali kukutaukila bantu ba Leza cakulibombya, wakali kugwasya bapengede, alimwi wakali kulipa kumilimo mibotu yoonse.

11Pele kuli bamukabafu bacili balindu kokaka kubalemba munkamu eeyo, nkaambo zisusi zyabazunda, balasiya Kilisito akukwatwa alimwi. 12Aboobo balabisya nkaambo tiibabamba nzibakasyomezya kusaanguna. 13Alimwi balaba aabutolo akwiide kuzelengana mumaanda aabantu. Mbaasiluvwiyu, banjililila twabambi, baambaamba nzyobateelede. 14Ncenciceeco ncenjanda kuti bamukabafu balindu bakwatwe alimwi bazyale bana, akubamba maanda aabo, kuti basinkondoma babule mbobatubejelezya. 15Nkaambo mpobali kale bamwi bamukabafu bakasanduka akutobela Saatani. 16Kuti naa kakuli mukaintu musyomi uujisi bamukowa bamukabafu, abagwasye kuti mbungano itanyamuni mukuli wakwe. Aboobo mbungano ilakonzya kugwasya bamukabafu banyina babalela.

17Lino baalu beendelezya mbungano kabotu balemekwe kwiindilila, kwaambisya aabo boonda mulimo wakukambauka akwiisya. 18Nkaambo Malembe aamba kuti, “Utamwaangi kumulomo musune uuuma maila.” Alimwi alaamba kuti, “Simulimo uleelede kujana bulumbu bwakwe.” 19Utanoozumini kaambo kaambwa mwaalu ccita kakuli bakamboni bobilo naa botatwe. 20Pele kwaamba baabo bazumanana kucita zibi, kobalaya antangalala kuti boonse bayoowele mpawo.

21Leza a Kilisito, alimwi abangelo basale-sale balizi kuti ngamba zyabwini. Ndakwaambila kuti ubambe eezi zyoonse kakunyina lusalululo, kutabi ncocita mukuyanda umwi. 22Utanoofwambaani kubikka maanza aamuntu akumunjizya mumulimo wa Mwami, kuyoowa kuti ulajanwa kozuminana azibi zyabamwi. Kolibamba lwako omwini, ubule butongo.

23Utanywi limbi maanzi alikke, pele kobelesya atuwaini twakukugwasya mwida nkaambo kakuciswa mboli sibukilwa bulo.

24Zibi zyabantu bamwi zilalibonya, zilabasolweda kukubetekwa, pele zibi zyabamwi zilalibonya musule. 25Mbubonya oobo ayalo milimo mibotu ilabonwa, nikuba kuti tiiyalibonya kufwambaana, pele tiikonzyi kusiswa pe.

Currently Selected:

1 Timoti 5: Tonga96

Highlight

Copy