1 Timoti 6

1Bazike boonse baleelede kupa bulemu kuli basimalelo babo, kuti bantu batasampauli zina lya Leza anzyotwiisya. 2Bazike babasimalelo basyomi, tabeelede kutabalemeka mukuti mbabunyina. Kapati bababelekele kwiinda kaindi, nkaambo bayoojana mpindu mumilimo yabo basyomi aabo bayandika.

Zyanjiisyo Zyakubeja

Koziiisya akukambauka zintu eezi. 3Kufumbwa muntu wiisya ziteendelani azeezi ngusikulisumpula. Teendelani amajwi eeni-eni aa Mwami wesu Jesu Kilisito anjiisyo zyakulemeka Leza. 4Muntu ooyo taakwe ncazi pe. Pele ncayandisisya nkwiide kukazyanya-kazyanya mumibuzyo iinyina ankoiya. Eezi ziletela buyo bbivwe, kukazyanya, kusampaulana, kuyeeyelana zibi, 5akunyemezyanya akati kabantu bali aamizeezo iisofweede, batakonzyi kuziba zyabwini. Balo bayeeya kuti kukomba Leza nkokuleta buvubi.

6Masimpe kukomba Leza kuleta mpindu, kufumbwa buyo kuti muntu walamwa azeezyo nzyajisi. 7Kayi taakwe ncitwakaleta munyika, alimwi taakwe ncotuyootolelela. 8Pele kuti katujisi cakulya azyakusama mbubo. 9Aabo bayandisisya kuvuba balanjila mukutepaulwa, alimwi balacegwa mukakole kazisusi zinji zyabufuba-fuba zinyonyoona. Nzenzizyo eezi zibbizya bantu mukunyonyooka amukusweeka kuuyosya. 10Nkaambo kuyandisisya lubono ngomuyanda wabubi boonse. Nkaambo kakuluyandisisya, bamwi bakaleya, basiya lusyomo, nkabela macise manji abajaya.

Mbwaakalaililwa Timoti

11Kwaamba zyanduwe, omuntu wa Leza, kozitija zyoonse eezi. Kosoleka kuba abuumi bululeme, bwakulemeka Leza, bwalusyomo, bwaluyando, bwalukakatilo, abwakulibombya. 12Kolwana nkondo mbotu zyakubamba lusyomo kusikila ukatambule buumi butamani. Nkaambo Leza wakakwiitila zeezi ciindi nookaamba antangalala zyalusyomo ndojisi banji kabamvwide. 13Iinkwaambile kumbele lya Leza uupa buumi kuzintu zyoonse alya Kilisito Jesu wakapa bumboni bwini-bwini kuli Pontiyasi Pilato. 14Ndakwaambila kuti, kakunyina kampenda naa cisampuzya, ubambe nzyolaililwa zyoonse kusikila Mwami wesu Jesu Kilisito nayooboola. 15Ciindi ceelede Leza uyoomubonya, Leza uulelekedwe weendelezya alikke, Mwami wabami alimwi Mweendelezi wabeendelezi. 16Walo alikke nguutafwi alimwi nguukkala mumumuni uutaswenwa afwiifwi. Alili taakwe wakamubona alimwi uukonzya kumubona pe. Kulinguwe kube bulemu, nguzu mane kukabe kutamani. Akube boobo.

17Kolaya aabo bavubi ansi aano kuti tabeelede kulisumpula naa kusyoma buvubi bwabo oobo butakkalilili. Pele beelede kusyoma Leza uutufonkweda zintu zyoonse kuti katuligwasya anzizyo. 18Ubalailile kucita zibotu, kuti bantu bazibe kuti mbavubi mukubeleka milimo mibotu, alimwi kabapa amaanza obilo bayanda kwaabana zintu abamwi. 19Mukucita boobo balaliyakila ntalisyo njumu kulibambilila zyaaziciboola kuti bakatambule buumi bwalo buli mbuumi bwini-bwini.

20Yebo Timoti kobambisya eezyo nzyopedwe. Futatila makani aanyina nkwaaya, aataleteli Leza bulemu alimwi amizeezo yakukazyanya bantu njobayeeya kuti njamaanu. 21Bamwi baamba kuti bajisi maanu aali boobo, basweeka akusowa lusyomo lwabo.

Luse lwa Leza lube kulinduwe.

Currently Selected:

1 Timoti 6: Tonga96

Highlight

Copy