1 Timoti 1

1Ndime Paulu, mutumwa wa Kilisito Jesu, nindakabikkwa akulailila kwa Leza Mufutuli wesu, a Kilisito uutupa lulangilo.

2Ndakujuzya Timoti mwanaangu mwini-mwini mulusyomo. Leza Taata a Kilisito Jesu Mwami wesu bakubede aaluse alweengelelo akukupa luumuno.

Acenjele abamayi babeji

3Mbubonya mbuli mbwindakakulailila ciindi ncindakali kuya ku Masedoniya, ukkale mu Efesusi akulesya aabo baiisya bumbi. 4Ubaambile kuti baleke kugamide twaano buyo akubanda mazina amazyalani aanyina masimpilo. 5Muzeezo wangu mukukupa malalilile aaya ngwakuti kube luyando luzwa mumoyo uusalala, kuyeeya kululeme, alusyomo lwini-lwini. 6Bantu bamwi bakazwa muli zeezi akulubila nibakaccilila nkazyanyo zyabuyo. 7Balayandisya kuba baiyi bamilawo, pele tabazizi nzyobaamba niziba eezyo nzyobazumina pe.

8Lino swebo tulizi kuti Mulawo mmubotu kuti naa muntu uubelesya bweelede. 9Tweelede kuziba kuti milawo tiili yabaabo baluleme, pele njabaabo bataswiilili, basigama, bantu babi abatakombi Leza, batasalali, basofweede, bantu bajaya bamawisi abamanyina alimwi abamwi, 10basibwaamu bacita zitaambiki abalombwananyina, abasikubba bantunyina, babeji, basikukonka cakubeja, abaabo bacita zintu zimwi zili boobo ziteendelani anjiisyo mbotu. 11Njiisyo eezi zilajanwa mu Makani Mabotu aabulemu aaamba zya Leza uulemekwa wakandipa ngawo kuti ngaiisye.

Ulalumba Leza nkaambo kaluzyalo lwakwe

12Ndamulumba Kilisito Jesu Mwami wesu wakandipa nguzu. Ndamulumba nkaambo wakandisyoma akundipa mulimo wakumubelekela, 13nikuba kuti kale-kale ndakali kumusampaula, kumupenzya, akumutukila. Pele Leza wakandeengelela nkaambo ndakali kucita eezi cakutaziba nketanasyoma. 14Mwami Leza wakandibeda aaluse lunji, eelyo wakandipa lusyomo aluyando nzyotujisi nkaambo tuli muli Kilisito Jesu. 15Majwi aaelede kutambulwa akusyomwa ngaaya, “Kilisito Jesu wakaboola ansi aano kuzoofutula basizibi.” Muli baaba mebo ndime eeindide. 16Pele wakandibeda aalubomba kuti mulindime sizibi kwiinda boonse, abonye lweengelelo lwakwe lupati. Wakayanda kuti mbe citondezyo kuli boonse bayoomusyoma mukuti bakajane buumi butamani. 17Lino ku Mwami walyoonse, uutafwi, uutaboneki, uuli ngo Leza alikke, alemekwe akupegwa bulemu mane kukabe kutamani. Akube boobo.

18Mwanaangu Timoti, ndakupa malailile aaya kweendelana amajwi abasinsimi ngobakakanana kwaamba zyanduwe. Majwi aaya abe zilwanyo nzyolwanya nkondo mbotu. 19Ujatisye lusyomo alimwi ube amoyo uunyina kaambo. Bamwi tiibakaswiilila manjezeezya aabo naakabakazya, aboobo lusyomo lwabo lwakanyonyooka. 20Muli baaba kuli Haimeneyusi a Alekizandaa aabo mbindaaba kuli Saatani. Eeci ciyoobaiisya kuti batasampauli limbi Leza.

Currently Selected:

1 Timoti 1: Tonga96

Highlight

Copy