1 Pita 5

Zyabutanga bwa Leza

1Lino ndaambila bapati bambungano akati kanu, mebo ndemupatinyina. Ndime kamboni wamapenzi aa Kilisito, alimwi ndangila kuyootambula bulemu buyooyubununwa oobo. 2Amweembele butanga bwa Leza mbomupedwe, kutali cakusinikizigwa pe, pele calumwemwe mbuli buyanda Leza. Mutabeleki cakulangaula mpindu iiteelede, pele amoyo uumaninide. 3Mutabi mbuli baleli, nimubasololela aabo mbomulangilila, pele amutondezye bukkale bubotu kumbungano. 4Eelyo aakuyubununwa Mweembezi mupati muyootambula cipego citamani cabulemu.

5Anywebo nobakubusi amulibombye kubapati banu. Alimwi nyoonse mulibambilile kubelekelana cakulibombya. Kayi Majwi aa Leza alati, “Leza ulabakaka basikulisumpula, pele batete myoyo ulabafwida luzyalo.” 6Aboobo amulibombye kuli Leza singuzu kutegwa akamusumpule muciindi ceelede. 7Amutole makatazyo aanu oonse kulinguwe nkaambo nguumubamba lyoonse. 8Amulibatamike akupakamana, nkaambo sinkondonyoko Saatani uleendeenda mbuli syuumbwa wabutambo uuya buyandaula ngwatilye. 9Amulwane anguwe kamuli bayumu mulusyomo, nkaambo mulizi kuti mapenzi aaya ngoonya alasikila basyomi bamumasi oonse. 10Nkabela mwamana kupenga kwakaindi, Leza waluse loonse nguutikamulondole, akumubikka antalisyo njumu, akumuyumya-yumya. Ngonguwe wakamwiita kuti mukanjile mubulemu bwakwe butamani buli muli Jesu Kilisito. 11Walo ngu Singuzuzyoonse kukabe kutamani. Akube boobo.

Kujuzya kwamamanino

12Ndamulembela lugwalo oolu lufwiifwi mukugwasigwa a Siluvanasi, walo uuli ngomukwesu uusyomeka. Ndayanda kuti ndimuyumye-yumye akupa bumboni bwakuti oolu ndoluse lwa Leza. Amwiime muluse oolu.

13Balamujuzya basimbungano bamu Babuloni mbimwakasalwa aabo. A Maako uli mbuli mwanaangu ulamujuzya. 14Amujuzyanye muluyando lwini-lwini.

Leza amupe luumuno nyoonse nomuli muli Kilisito.

Currently Selected:

1 Pita 5: Tonga96

Highlight

Copy