2 Pita 1
1
1Ndime Saimoni Pita, mubelesi amutumwa wa Jesu Kilisito, ndalembela baabo bakatambula lusyomo mbuli ndotujisi kwiindila mubululami bwa Leza a Mufutuli wesu Jesu Kilisito. 2Leza amubede aaluse akumupa luumuno lunji kwiindila mukumuzibisisya walo a Jesu Mwami wesu.
Zyakwiita akusala kwa Leza
3Kilisito munguzu zyabuleza bwakwe wakatupa zyoonse zitugwasya kuba aabuumi abukombi bwini-bwini. Wakacita oobo kwiindila muluzibo lwa Leza wakatwiita akaambo kabulemu abubotu bwakwe. 4Mulinzizyo wakatupa zisyomezyo ziyandika zipati kapati kuti mukatambule buumi bwabuleza mwamana kufutulwa kukunyonyooka kwaansi aano nkaambo kazisusi. 5Lino amusungwaale kapati kuti muyungizye bukkale bubotu kulusyomo lwanu, busongo kuluzibo oolu. 6Alimwi muyungizye kulijata kubusongo oobo, kuyuma kukulijata ooko, kukomba Leza kukuyuma ooko, 7bunyina kukukomba Leza ooko, aluyando kubunyina oobo. 8Naa eezi kazili zinji mulindinywe tamukabi batolo, banyina mpindu mukuzibya zya Mwami wesu Jesu Kilisito. 9Pele uutajisi eezi mmoofu, takonzyi kubona pe. Waluba kuti wakasanzigwa kuzwa kuzinyonyoono zyakwe zyakaindi.
10Nkaako, nobakwesu, amusungwaale kapati kuzibisya kuti Leza wakamwiita alimwi wakamusala. Mwacita boobo, tamutiwe pe, 11pele muyoojulilwa mulyango wakunjila mubwami butamani bwa Mwami Jesu Kilisito Mufutuli wesu.
12Aboobo nsikooleka kumuyeezya makani aaya lyoonse nomwaazi kale, alimwi mulasyoma amoyo woonse njiisyo zyabwini nzimwakatambula. 13Ndayeeya kuti ncintu cibotu kumuyeezya eezi nkecipona. 14Nkaambo ndizi kuti ciindi cilaafwiifwi kuti ndizwe mumubili wangu mbubonya mbwaakandaambila Mwami wesu Jesu Kilisito. 15Alimwi ndasoleka kuti ndazwa mebo kamucinooya buyeeya makani aaya lyoonse.
Bakamboni babulemu bwa Kilisito
16Nkaambo nitwakamuzibya makani anguzu zya Jesu Kilisito azyakuboola kwakwe tiitwakali kutobela zyaano zyakapangwa abucenjezu bwabantu pe. Pele twakalibonena ameso eesu bupati bwakwe. 17Jesu naakatambula bulemu akulemekwa kuzwa kuli Leza Wisi, wakasikilwa jwi kuzwa kuli Leza wabulemu liti, “Ooyu ngomwanaangu uuyandwa uundikondelezya lyoonse.” 18Alimwi swebo lwesu twakalimvwa jwi lyakazwa kujulu notwakali aanguwe kucilundu cisalala.
19Lino twaziba masimpe kuti majwi aabasinsimi ngamasimpe. Mulacita kabotu kuti naa mwaaswiilila, nkaambo ali mbuli lambe liyaka mumudima mane kubucedo. Ali, mbuli ntanda iipasula mumyoyo yanu. 20Pele kapati muzibe kuti taakwe muntu uukonzya kupandulula majwi aabasinsimi aalembedwe mu Malembe mbuli mukuyeeya kwakwe mwini. 21Nkaambo majwi aabusinsimi taakaza mukuyanda kwamuntu mwini pe, pele Muuya Uusalala nowakabaambya ndendilyo nibakaamba majwi aa Leza.
Currently Selected:
2 Pita 1: Tonga96
Highlight
Share
Copy
Want to have your highlights saved across all your devices? Sign up or sign in
Tonga Bible © United Bible Societies, 1994.
