1 Pita 4
4
Zyabuumi bupya
1Lino mbubonya mbuli Kilisito mbwaakapenga mumubili, anywebo amuliyumye, nkaambo mulizi kuti kufumbwa muntu uupenga ulasiya zinyonyoono. 2Aboobo ciindi nomucipona ansi aano mutatobeli zisusi zyabuntunsi, pele amutobele ziyanda Leza. 3Nkaambo muciindi cakale-kale mwalipede kukucita zicita bamasi. Mwakali kweenda muzisofweede, muzisusi, mubukolwi, mubusindya, mukusenga, abukombi busesemya bwamituni. 4Lino sunu bakunze balagambwa nibabona kuti mwaleka kucita zisofwede ambabo, nkankakaako ncobamusampaula. 5Pele bayoolyaambilila mulandu wabo kuli Leza ooyo uuyoobeteka baumi abafu. 6Nkaambo kaako Makani Mabotu ncaakakambaukilwa kuli baabo bafwide kuti nikuba kuti bakabetekwa mumubili mbuli bantu boonse, bamana bakapone mumuuya mbuli Leza.
Babanzi babotu bazipego zya Leza
7Lino mamanino aazintu zyoonse alaafwiifwi. Nkaako amulibatamike kuti musitikile mukukomba kwanu. 8Cipati ncakuti muyandane cakutalengaana nkaambo luyando ndoluvumba zinyonyoono zinji. 9Nomuswayana kamubambana cakutatongookana. 10Aumwi cipego ncaakatambula kuli Leza acibelesye mukugwasya beenzinyina. Mube mbuli babanzi babelesya kabotu zipego zyaandeene-andeene zizwa kuli Leza. 11Naa umwi waamba, aambe majwi aazwa kuli Leza. Naa umwi wabeleka, abeleke anguzu zimupa Leza, kuti muli zyoonse Leza akalemekwe muli Jesu Kilisito. Bulemu anguzu nzizyakwe akutamani. Akube boobo.
Kupenga akaambo ka Bukilisito
12Nomuyandwa, mutagambwi amulilo wamapenzi wamuzida kuti musunkwe anguwo. Mutayeeyi kuti mwasikilwa cintu ceenzu pe. 13Pele amukondwe nkaambo mulapenga mbuli Kilisito kuti bwaakulibonya bulemu bwakwe mukatangale kapati. 14Kuti naa mwasampaulwa akaambo kazina lya Kilisito, mulilelekedwe, nkaambo nkokuti Muuya wabulemu, Muuya wa Leza, ulikkalilide mulindinywe. 15Kutajaniki kuti mulapenzegwa nkaambo kabujayi, kubba, kucita cibyaabi, nikuba kunjililila zyabamwi. 16Pele kuti kamupenzegwa akaambo kakuti muli Bakilisito mutausi nsoni pe, pele mulemeke Leza akaambo kazina eelyo.
17Lino ciindi casika cakuti Leza atalike kubeteka bantu bakwe. Naa lubeta oolo lwatalikila kulindiswe, ino ciyooba buti kuli baabo bataswiilili Makani Mabotu aa Leza? 18Kayi Majwi aa Leza alati,
“Kuti mululami akafutulwe cakupenga,
ino mubi uutaccilili zya Leza uyooba buti?”
19Aboobo aabo bapenga mukuyanda kwa Leza abalipe mumaanza aa Mulengi wabo uusyomeka akutolelela kucita milimo mibotu.
Currently Selected:
1 Pita 4: Tonga96
Highlight
Share
Copy
Want to have your highlights saved across all your devices? Sign up or sign in
Tonga Bible © United Bible Societies, 1994.
