1 Pita 3

Zyamumukwasyi

1Anywebo nobakaintu, amulibombye kubalumi banu, kuti naa kakuli bamwi babo bataswiilili Majwi aa Leza inga balakwelelezegwa abukkale bwanu kakunyina akubelesya majwi 2ciindi babona bweende bwanu bweelede bwakulilemeka. 3Kulibotezya kwanu kutabi buyo kwaanze, mbuli kulukana masusu akulisakatizya akwiide kusama zidula. 4Pele kulibotezya kwanu akube kwamukati kamoyo nkokuti kulibotezya kutamani kwamoyo uusitikide uukkede. 5Nkaambo mbubonya akaindi bakaintu basalala mbubakali kulibotezya alimwi bakali kulibombya kubalumi babo. 6Mbubonya Sala mbwaakali kuswiilila Abulahamu akumwiita kuti, “Mwami wangu.” Aboobo nywebo muli bana ba Sala kuti mwacita ziluleme akutayoowa aasyoonto.

7Anywebo nobalumi kamumvwana abakaintu banu. Amubalemeke nkaambo nciinga citete. Nkaambo muyookona ambabo cipego cabuumi cipa Leza muluse lwakwe. Kamucita oobo kuti kutabi ciinga-inga kukomba kwanu.

Zyakupenga akaambo kabululami

8Lino kumanizya ndati amube amoyo omwe, kuyandana kwabunyina, amoyo mutete waluzyalo amiyeeyo yakulitola ansi. 9Kuti naa bantu bamubisizya nikuba kumusampaula, mutabweedezyi pe. Kapati amubaleleke nkaambo Leza wakamwiitila bukkale buli boobu kuti mutambule zileleko zyakwe. 10Majwi aa Leza alati,

“Ooyo uuyanda kukkomanina buumi akubona mazuba mabotu,

alesye mulaka wakwe kububi,

mulomo wakwe utaambi zyakubeja.

11Aleye bubi, acite zibotu.

Alangaule luumuno akulutobela.

12Nkaambo Leza ulanga calumwemwe baluleme,

alimwi ulaswiilila kukomba kwabo,

kwamana Leza mmukali kuli baabo bacita zibi.”

13Ino nguni uuti mucite cibi naa mwasungwaalila zibotu? 14Pele kuti mwapenzegwa nkaambo kubululami, muyoolelekwa. Mutabayoowi bantu nikuba kupenga mumoyo. 15Pele mumyoyo yanu amulemeke Kilisito nkaambo Mmwami wanu. Kamulibambilide lyoonse kuti mubapandulwide boonse bamubuzya makani aalusyomo ndomujisi, pele amucite oobo amoyo mutete akulemeka Leza. 16Amube amoyo uutakwe kampenda kuti ciindi nimusampaulwa akaambo kazibotu nzyomucita muli Kilisito, mubausye nsoni bacita boobo. 17Ncibotu kupenzegwa akaambo kakucita zibotu kuti naa kakuli kuyanda kwa Leza, kwiinda kupenzegwa akaambo kakucita zibi. 18Nkaambo Kilisito wakafwida zibi zyabantu lomwe buyo. Ooyo uululeme wakafwida ndiswe notutaluleme, kuti atulete kuli Leza. Wakajaigwa mumubili, pele wakabusigwa mumuuya. 19Mumonya oomo mwaakainka kukukambaukila myuuya yaangidwe muntolongo. 20Mulinjiyo mwakali yabaabo batakaswiilila kale-kale ciindi Leza naakalindila amoyo walweengelelo mazuba Nowa naakacili kuyaka bwato. Mwalo bace buyo, nkokuti bali lusele bakafutuka kuzwa kumaanzi. 21Maanzi aayo alikozyenye alubbapatizyo lwalo lino lumufutula nkaambo kakubuka kwa Jesu Kilisito. Lubbapatizyo takuli kusanzya tombe pe, pele lulomba manjezeezya aasalala kuli Leza. 22Jesu wakaya kujulu alimwi uli kululyo lwa Leza. Ooko bangelo, basibwami, abasinguzu nkobamuswiilila.

Currently Selected:

1 Pita 3: Tonga96

Highlight

Copy