1 Pita 2
2
Zyabbwe gumi
1Aboobo amuleke bubi boonse alweeno, kuupaupa ameso, abbivwe, akuvwiyana nikuba buti. 2Mbuli tuvwanda mbotulilila mukupa, mbubonya oobo anywebo amuyandisye mukupa wini-wini mukuti mukomene anguwo akufutulwa, 3kuti kamuli mwalabila akuziba bubotu bwa Mwami.
4Lino amuboole kulinguwe uuli ndibbwe lyabuumi lyakakakidwe abantu, pele Leza wakalisala akulilemeka. 5Anywebo amube mbuli mabwe maumi, mukayasigwe kuba ŋanda yamuuya. Oomo mubeleke mbuli bapaizi basalala nomutuula zipaizyo zyapegwa amoyo woonse, zitambulika kuli Leza muli Jesu Kilisito. 6Nkaambo mu Malembe mulilembedwe kuti,
“Amubone, ndasala bbwe liyandisi.
Ndalibikka mu Ziyoni acooko caŋanda,
uumusyoma takooyoofwa nsoni pe.”
7Lino kulindinywe nomusyoma, ulayandika kapati, pele kuli baabo batasyomi, cili mbuli bwaamba Malembe kuti,
“Bbwe ndibakakaka bayaki ndendilyo lyakaba lyaacooko.”
8Alaamba akuti,
“Eeli bbwe lileba bantu,
mwaala uubafumpula.”
Bakalebwa nkaambo kakutaswiilila Majwi aa Leza mbuli mbubakakanzilwa kale.
9Pele kwaamba ndinywe muli musyobo musale, bapaizi babwami, ciinga cisalala, bantu bakwe Leza. Wakamusalila kuti mukakambauke zyamilimo yanguzu yayooyo wakamwiita kuzwa mumudima akumunjizya mumumuni wakwe uugambya. 10Kale-kale tiimwakali bantu ba Leza, pele lino muli bantu bakwe. Kale-kale tiimwakafwidilidwe lweengelelo, pele lino muleengelelwa.
Zyababelesi ba Leza
11Nomuyandwa, mbuli mbomuli beenzu bamwaikide ansi aano, ndamukumbila kuti mulilesye kuzisusi zyabuntunsi zilwana amuuya wanu. 12Amucenjele abukkale bwanu akati kabatasyomi, kuti nikuba kuti kabati milimo yanu mmibi, pele babone kuti mmibotu. Eelyo bayoolemeka Leza mubuzuba Leza mbwayoobeendela.
13Akaambo ka Mwami, amulibombye kubantu boonse babikkwa kuti balele, nikuba kumuleli mupati, 14naa kubeendelezi mbaakabikka kuti kabasubula aabo bacita zitaluleme akulumbaizya bacita ziluleme. 15Nkaambo Leza uyanda kuti nomucita zibotu muumuzye bantu bafuba-fuba banyina ncobazi. 16Mukuti mulaangunukide, mutasanduli lwaangunuko lwanu kuti cibe civumbilizyo cabubi, pele amukacite mbuli babelesi ba Leza. 17Amulemeke bantu boonse. Amuyandane abasyominyoko. Amuyoowe Leza. Amulemeke muleli mupati.
Zyamapenzi aa Kilisito
18Nobabelesi, amuswiilile basimalelo banu akubalemeka, kutali buyo bali kabotu, balomene pe, pele abasikakomo-komo. 19Nkaambo kulalumbika naa muntu wayumina mapenzi kazi kuti Leza nkwali, nikuba kuti wapenzegwa buteelede. 20Ino kuli bulumbu nzi naa wayumina kuumwa akaambo kakuti wabisya? Pele kuti naa wayumina mapenzi wacita ciluleme, nkokuti noocita cibotu kuli Leza. 21Bukkale oobu mbombubo Leza mbwaakamwiitila. Kayi Kilisito wakapenzegwa akaambo kandinywe, eelyo wakamusiila cikozyanyo kuti mutobele. 22Walo taakwe naakacita cibi nikuba kwaamba cakubeja pe. 23Ciindi bantu nibakali kumusampaula, taakwe naakabweedezya pe. Ciindi naakapenzegwa taakwe naakakonga pe. Pele wakabikka zyoonse mumaanza aa Leza uubeteka cabululami. 24Kilisito wakanyamuna zinyonyoono zyesu mumubili wakwe aciingano kuti muleye zibi zyoonse, pele mubikke moyo woonse mukucita ziluleme. Mwaponyezegwa azilonda zyakwe. 25Mwakali mbuli mbelele zisweekede, pele lino mwapilukila kumweembezi weembela myuuya yanu.
Currently Selected:
1 Pita 2: Tonga96
Highlight
Share
Copy
Want to have your highlights saved across all your devices? Sign up or sign in
Tonga Bible © United Bible Societies, 1994.
