1 Bakolinti 9

Zyeelede mutumwa wa Kilisito

1Sena nsyaangunukide? Sena nsili mutumwa? Sena nsiindaamubona Jesu Mwami wesu? Sena teensi ndinywe micelo yamulimo wangu mu Mwami? 2Nikuba kuti bamwi tabandiyeeyeli kuti ndimutumwa, pele kulindinywe ndi mutumwa ncobeni nkaambo nywebo muli cibonesyo cabutumwa bwangu camu Mwami.

3Bantu bandikazya mboobu bwendibaingula, 4Sena tatweelede kutambula cakulya acakunywa? 5Sena tatuzumizigwi kutolelela bakaintu besu munyendo zyesu, mbubonya mbuli batumwa bamwi, bana bokwabo Mwami a Kefasi? 6Sena mebo a Banabasi ndiswe tolikke notweelede kubeleka kuti tulijanine nzyotubula? 7Sena kuli silumamba uulibbadela mwini mumulimo wakwe? Nguni uulima muunda wamisaansa kwamana katalyi micelo yawo? Sena kuli mweeembezi wabutanga uutanywi mukupa wabo?

8Sena aaya majwi ngendaamba ngamuntu buyo? Sena Mulawo tuuambi mbubonya awalo? 9Nkaambo kulilembedwe mu Mulawo kuti, “Utamwaangi kumulomo musune uuuma maila.” Sena Leza uyeeya basune ncobeni? 10Sena naamba boobo, taambi zyandiswe? Ncobeni wakazilembya akaambo kandiswe, nkaambo mulimi naa uuuma maila ulabeleka alulangilo lwakuti uyoovola. 11Swebo twamusyangila zintu zyamuuya, sena ono tacikonzeki kuti tutambule kulindinywe nzyotubula mubuumi bwesu buno? 12Kuti bamwi kabeelede kutambula eezi, ino swebo mbuti tatweelede kubainda na?

Pele tiitwakacita oobo. Twakayumina zyoonse mukuti tutacelesyi bantu munzila niiba buti kutambula Makani Mabotu aaamba zya Kilisito. 13Sena tamuzi kuti aabo bacita mulimo wamuŋanda ya Leza balajana zyakulya kuzwa muŋanda ya Leza, aabo bakutauka acipaililo balaabana zilyo zyazipaizyo? 14Mbubonya oobo, Mwami wakalailila kuti aabo bakambauka Makani Mabotu beelede kutambula nzyobabula mukukambauka.

15Pele mebo nsiindakabelesya nguzu eezi nzyeelede. Alimwi nsiindalemba lugwalo oolu mukuyanda kubelesya nguzu eezi pe. Inga ndafwa buyo mucilawo cakuti umwi agwisye eeco ncelisumpwida. 16Kuti naa nkekambauka Makani Mabotu kunyina nceelede kulisumpwida. Nkaambo Mwami nguwakandilailila kucita oobo. Maawe kulindime kuti naa nketakambauki. 17Nindakaliyandila ndemwini nindali kulangila kutambula bulumbu. Pele mukuti nsiindakaliyandila, mbeleka buyo nkaambo Mwami nguwakandipa. 18Ino kayi bulumbu bwangu ninzi? Mboobu, mbwakuti nkakambauke Makani Mabotu nketavoli mali alimwi nketalangili kutambula zyeelede uukambauka Makani.

19Nikuba kuti ndimuntu waangunukide kubantu boonse, ndalicita muzike wabo boonse, kutegwa ndete banji-banji. 20Akati ka Bajuda ndakatobela ziyanza zya Bajuda mukuti ndete Bajuda. Nikuba kuti lwangu nsyeendelezegwi a Mulawo, pele kuli baabo baitobela ndakaba mbuli wiitobela kuti mbeete. 21Kuli baabo batajisi Mulawo ndakaba mbuli mbabo kuti mbale. Takuli kuti nsitobeli Mulawo, nkaambo nditobela Mulawo wa Kilisito. 22Kubatasimide mulusyomo ndakaba mbuli mbabo, kuti ndikonzye kubaleta. Kubantu boonse ndakaba mbuli mbabo mukuti naa kacikonzeka ndilete bamwi babo.

23Zyoonse eezi ndazicita nkaambo ka Makani Mabotu, kuti alwangu nditambule ambabo zileleko zyawo. 24Sena tamuzi kuti mukuzundana boonse balazuzaana, pele omwe buyo nguutambula bulumbu? Aboobo kuzuza kwanu kube kwakuti mukatambule bulumbu. 25Lino umwi aumwi uuyanda kusobana ulalibatamika muli zyoonse. Ulacita oobo kuti atambule musini uusopoka buyo, pele swebo tulacita oobo kuti tukatambule musini uutasopoki alili. 26Aboobo nsizuzaani buyo, nsili mbuli muntu uuuma buyo luuwo pe. 27Pele ndasubula mubili wangu kapati akuuzunda, nsiyandi kuti ndamana kukambaukila bamwi, mebo lwangu nkasoogwe.

Currently Selected:

1 Bakolinti 9: Tonga96

Highlight

Copy