1 Bakolinti 10
10
Zyakabonekela Baisilayeli zibe cicenjezyo kubasyomi
1Ndayanda kuti muzibe, nobakwesu, kuti basikale besu bakakwabililwa akkumbi, nkabela boonse bakakosola lwizi. 2Aboobo bakabbapatizigwa mukkumbi amulwizi kuti babe omwe a Mozesi. 3Boonse bakalya cilyo comwe camuuya, 4alimwi boonse bakanywa cakunywa comwe buyo. Nkaambo bakali kunywa kuzwa kumwaala ooyo wamuuya wakabasindikila, mwaala ooyo ngu Kilisito. 5Pele banji-banji Leza taakwe naakabakondelelwa pe, aboobo bakafwida munkanda.
6Lino zintu eezi nzicenjezyo kulindiswe, kuti tutayandi zinyonyoono mbuli mbubakacita balo. 7Mutabi basikukomba mizimo mbuli mbubakacita bamwi babo, mbubonya mbuli mbokulembedwe kuti, “Bantu bakakkala kuti balye akunywa, eelyo bakatalika kucita zisesemya.” 8Tutaciti bwaamu mbuli mbubakacita bamwi babo. Nkabela mubuzuba oobo kwakafwa bantu basika kuzyuulu zili makumi obilo azitatu. 9Tatweelede kusunka Mwami mbuli mbubakacita bamwi babo, eelyo bakalumwa nzoka akufwa. 10Mutatongooki mbuli mbubakacita bamwi babo, nkabela bakanyonyoonwa amungelo uunyonyoona.
11Lino zintu eezi zyakabacitikila kuti cibe cicenjezyo kuli mbabo, pele zyakalembwa kuti zitwiisye swebo notupona cino ciindi mamanino aazyoonse naali afwiifwi. 12Aboobo ooyo uuyeeya kuti uliimvwi acenjele kuti atawi. 13Masunko aamusikila taaindene amasunko aasikila bantu boonse. Leza ulasyomeka, takonzyi kumulekela kuti musunkwe kwiinda nguzu zyanu pe. Pele mwasunkwa, walo ulamupa nzila yamatijilo, kuti mukakonzye kuvunwa.
14Akaambo kaako, nobakwesu, amuleke kukomba mizimo. 15Ndamwaambila mbuli mbokwaambilwa bantu basongo, amwaayeeyesye makani ngindamwaambila. 16Nkomeki njotuleleka notulumba, sena tatuswaangani abulowa bwa Kilisito notunywida mulinjiyo? Cinkwa ncotukomona, sena tatuswaangani amubili wa Kilisito notucilya? 17Akaambo kakuti kuli cinkwa comwe buyo, swebo notuvula buti tuli mubili omwe, nkaambo toonse tulaabana cinkwa comwe.
18Amuyeeye ciyanza ca Baisilayeli. Sena aabo balya zipaizyo tabaswaangani a Leza ngobapaizila? 19Ino ncinzi ncendaamba? Ndaamba kuti zipaizigwa kumizimo taakwe ncozyaamba awalo muzimo mbubonya. 20Amubone, eezyo nzyobapaizya bakunze, balazipaizya kumyuuya mibi kutali kuli Leza. Nsiyandi kuti nywebo muswaangane amyuuya mibi pe. 21Tamukonzyi kunywa munkomeki ya Mwami antoomwe ayamyuuya mibi. Alimwi tamukonzyi kulida atebule lya Mwami alyamyuuya mibi. 22Ambweni tuyanda kunyemya Mwami? Sena tulijisi nguzu kwiinda nguwe?
Zyalwaangunuko lwa musyomi
23“Zintu zyoonse zilazuminika,” pele tacaambi kuti zintu zyoonse zilagwasya. “Zintu zyoonse zilazuminika,” pele tacaambi kuti zintu zyoonse zilayaka. 24Kutabi muntu uuliyandawida bubotu bwakwe mwini, pele bubotu bwamweenzinyina. 25Mulaangunukide kulya kufumbwa ncobauzya mucisambalilo canyama kakutakwe akubuzya-buzya mukuti moyo ulamukatazya. 26Nkaambo kulilembedwe kuti, “Nyika nja Mwami azyoonse zili mulinjiyo.”
27Kuti naa umwi wabatasyomi wamutamba kukulya, mwamana mwainka anguwe, amulye kufumbwa eeco ncimwasombwa kakutakwe akubuzya-buzya mukuti moyo ulamukatazya. 28Pele kuti naa umwi wamwaambila kuti, “Eeci cilyo ncacipaizyo camizimo,” mutalyi pe, nkaambo kayooyo wamwaambila kuyoowa kupenga mumoyo. 29Ngamba moyo wakwe, kutaamba moyo wanu.
Ambweni inga wati, “Sena nsiye lwaangunuko lwangu nkaambo kakuti umwi ulapenga mumoyo? 30Kuti naa ndilalya cakulumba Leza, ino nkaambo nzi ncetongookwa akaambo kacilyo eeco ncindalumbila?”
31Nkaako nikuba kuti mulalya nikuba kunywa, naa kufumbwa eeco ncomucita, amuzicite zyoonse kuti Leza alemekwe. 32Buumi bwanu butabi cilebyo ku Bajuda, nibaba Bagiliki, nikuba kumbungango ya Leza. 33Amucite mbubonya mbuli mbwesoleka mebo kubotezya bantu boonse muzintu zyoonse nzecita. Nsiyandi kuligwasya ndemwini pe, pele ndayandaula kugwasya bantu banji kuti bafutulwe.
Currently Selected:
1 Bakolinti 10: Tonga96
Highlight
Share
Copy
Want to have your highlights saved across all your devices? Sign up or sign in
Tonga Bible © United Bible Societies, 1994.
