1 Bakolinti 8

Makani aazilyo zipaizigwa mizimo

1Lino kwaamba zyamakani aazilyo zipaizigwa mizimo, tulizi kuti, “Toonse tulaaluzibo.” Pele luzibo lulikke lutuntaizya muntu. Luyando ndoluyaka. 2Kuti naa kuli muntu uuliyeeya kuti ulizi cintu, tanaziba mbuli mbweelede kuziba pe. 3Pele kuti naa umwi kayanda Leza, ooyo muntu ulazibwa a Leza.

4Lino kwaamba makani aakulya zilyo zipaizigwa kumizimo, tulizi kuti mizimo taakwe, akuti taakwe Leza uumbi pele omwe buyo. 5Nikuba kuti kuli baabo bategwa baleza mujulu naa ansi, iiyi, mbanji-banji, abalo bategwa bami mbanji-banji. 6Pele swebo tujisi buyo Leza omwe, Taata wakalenga zyoonse alimwi uuli ngotuponena. Alimwi tujisi Mwami omwe Jesu Kilisito. Kwiindila mulinguwe Leza wakalenga zyoonse, alimwi swebo tulapona nkaambo kanguwe.

7Takuli kuti boonse balizizi eezi pe. Pele bamwi bakazibila kukomba mizimo, eelyo kusikila sunu balya zilyo zipaizigwa kumizimo baciyeeya kuti cilyo eeco capaizigwa. Lino nkaambo kakudonaika, myoyo yabo ilabisigwa acilyo eeco. 8Masimpe ngakuti kulya takutusisyi kuli Leza pe. Kuti naa tatulyi tatusweekelwi cintu, alimwi twalya tatujani cintu. 9Amucenjele kuti lwaangunuko ndomujisi citabi cilebyo kuli baabo batasimide mulusyomo. 10Nkaambo kuti naa umwi wakubona, yebo oolaaluzibo kolya mukaanda kamizimo, sena eeci tacikwe kumusungula kuti awalo alye zilyo zipaizigwa kumizimo? 11Aboobo lusyomo lwayooyo uutasimide lulasweeka akaambo kanduwe oolaaluzibo. Wacitya boobo kumukwesu ooyo Kilisito ngwaakafwida. 12Lino ciindi ncomubisizya boobo basyomi akulubizya badonaika, mwabisizya Kilisito. 13Akaambo kaako kuti naa cilyo calebya mukwesu, nsikooyoolya limbi nyama, kuti intakalebyi mukwesu pe.

Currently Selected:

1 Bakolinti 8: Tonga96

Highlight

Copy